It(em) cond sij allen lieden dat aert vander dylen soen jans wilen vander dylen van/ wijchmale es comen in jegewordichheit der scepen(en) van loven ende heeft genome(n) ende/ gekent dat hij genome(n) heeft van meester thoemase van wynge wonen(de) te loven/ thof des selfs meester thoemas van wynghe gelegen t(er) straten inde p(ro)chie van holsbeke/ metten huysen hoven wynnenden landen beemde(n) eeusselen en(de) met allen sine(n) toebehoerte(n)/ uutgenomen een stuck bosch gelegen bove(n) ee(re)nboudegem daer inne de voirs(creven) aernt/ negheen recht hebben en sall Te houden te hebben en(de) te wynne(n) van halfmeerte/ lestvoirleden eenen t(er)mijn van negher neghen jaren langc deen na dander
//
sonder myddel volgende elcx jaers dae(re)n bynnen Te weten de wy(n)nende lande/ om achtendertich mudde rox goet en(de) payabel der mate(n) van loven(e) sente/ andries misse apostels te betalen alle jae(r) den voirs(creven) t(er)mijn due(re)nde en(de) tot love(n)/ t(er) wony(n)gen des voirs(creven) meest(er) thoemas te leve(re)n alle jae(re) den voirs(creven) t(er)mijn due(re)end(e)/ en(de) telken t(er)mijne als vervolghde schout en(de) de voirs(creven) beemde omme twentsev/ tween(de)seventich hollantsche gulden goede [en(de)] geve alle alle jae(re) hie(re)n by(n)nen/ tsente m(er)tens misse inden wynter te betalen en(de) telke(n) t(er)mijne als v(er)volghde/ schout Item sal de voirs(creven) wynne jairlix hie(re)n bynnen geven en(de) betalen een/ voeder hoeys den godshuyse van vliederbeke sond(er) cost des vors(creven) meest(er) thoemas/ van wynghe It(em) sal de voirs(creven) wynne den voirs(creven) t(er)mijn due(re)nde dragen allen/ den last en(de) dienst diemen onsen gened(ichen) hee(re) den h(er)toge van brabant vand(en)/ wagen goeden des selfs meest(er) thoemas aldaer sculdich es sond(er) cost ende/ last des selfs meester thoemas van winghe It(em) selen de voirs(creven) meest(er) thomas/ van wynge en(de) de wynne alle doeft dat int voirs(creven) hof jaerlix wassen/ sall deylen en(de) hebben te gelijc half en(de) half en(de) die wynne sal des/ voirs(creven) meest(er) thoemas helcht tot loven leve(re)n ald(aer) hem meester thoemas/ segggen sall sonder des voirs(creven) meest(er) thoemas cost It(em) sal de voirs(creven) wynne jairlix/ den voirs(creven) t(er)mijn due(re)nde meest(er) thoemase leve(re)n een mudde gerste(n) goet en(de)/ payabel der maten van loven(e) om des voirs(creven) meest(er) thoemas duven mede te/[vueden] wynne(n) en(de) tduven mest dat sal de voirs(creven) wynne op te voirs(creven) lande vue(re)n slants/ meeste(n) p(ro)fijte It(em) sal de voirs(creven) wynne jaerlix int voirs(creven) hof leve(re)n veertich/ mandelen walme(re)n te weten xv walme inde mandele It(em) es vurwerde dat/ de voirs(creven) wynne den werckluden den montcost geven sal als men daer dect/ oft plect en(de) die meest(er) thoemas sal die dachue(re)n betalen Item es/ vurwerde dat de voirs(creven) wynne de huysinge aldaer houden sall den t(er)mijn/ due(re)nde vander onderster rikelen nederw(er)t op sine(n) cost en(de) last It(em) sal de/ voirs(creven) wynne den voirs(creven) meest(er) thomase jairlix leve(re)n vi hondert willige(n)/ wijng(ar)t staken en(de) hem die leve(re)n ald(aer) hem dat genuege(n) sall op sijn wijng(ar)de/ sond(er) des voirs(creven) meester thomas cost oft last It(em) sal de voirs(creven) wynne den/ voirs(creven) meest(er) thoemase een half boender hoeys thuys vue(re)n alst meest(er)/ thoemas hem sal late(n) wete(n) It(em) sal de voirs(creven) wynne alle die poten/ jairlix vanden willigen come(n)de ten behoerlike(n) tijde setten op die goede/ voirs(creven) daer dat behoeve(n) sal It(em) sal de voirs(creven) wynne en sal egheen/ mest uut vue(re)n noch stroe dan ten p(ro)fijte van meest(er) thoemas lande/ It(em) sal de voirs(creven) wynne dat selve mest dat in de messie bliven sal/ te sine(n) afsceiden aldair late(n) It(em) sal de voirs(creven) wynne ten uutganc vand(en)/ voirs(creven) sine(n) t(er)mijne int voirs(creven) hof laten veertich mandele(n) ond(er) roggen stroe/ en(de) gersten stroe ongheect te weten xvi scoeve voer elke ma(n)dele gerekent gelijc/ hij die oec ald(aer) vant te sine(n) income(n) en(de) desgelijx oec ten mynste(n) x mandele(n) oereete(n)
//
ald(aer) laten It(em) sal de selve wynne die wat(er)leiden hoege(n) [vaghen] en(de) h(er)maken jairlix ald(aer) dat behoeve(n)/ sal It(em) sal de wy(n)ne de weege houden loflic dat daer gheen becroen af en come It(em) de voirs(creven)/ meest(er) thoemas sal den voirs(creven) wynne ov(er) ande(re) jair geven iiii ellen lakens den t(er)mijn due(re)nde/ tot eene(n) tabbarde It(em) es vurw(er)de dat de voirs(creven) wy(n)ne den voirs(creven) meest(er) thoemase sal houde(n)/ ii verkene jairlix sine(n) t(er)mijn due(re)nde op des wyns cost en(de) last en(de) die sal de voirs(creven) meest(er)/ thoemas hem senden te m(er)te en(de) hij salse meest(er) thoemase brenge(n) sente denijs missse It(em) noch/ sal de voirs(creven) wy(n)ne den vors(creven) meest(er) thoemase jairlix saeyen een halst(er) ly(n)saets wel en(de) loflic en(de) dat hem/ te love(n) tsine(n) huys leve(re)n met sijnd(er) behoerte(n) Item w(ar)t so d(at) meest(er) thomas ty(m)me(re)n woude te holsbeke so sal den/ vors(creven) meest(er) thomase volge(n) de halfschue(re) mette(n) aenhanxelle en(de) mette(n) halve(n) bloke in afslage van sine(n) pachte t(er)/ t(er)minacie(n) van goede(n) ma(n)nen en(de) voert [so] soude hem volge(n) vi dach(mael) beemts vand(er) g(ro)ten eeussele in afslage van sine(n) weygeld/ t(er) t(er)mi(n)acie(n) van goede(n) ma(n)ne(n) It(em) es vurw(er)de dat de vors(creven) wy(n)ne de vors(creven) goede wel en(de) loflic wy(n)ne(n) meste(n) en(de) wi(n)nen/ sal gelijc sine(n) reengenoete(n) bove(n) en(de) benede(n) en(de) die late(n) te sine(n) afsceide(n) gelijc hij die vant te sine(n) income(n) Te wete(n)/ dblock acht(er) thof een halfboend(er) lants gehete(n) trodeke(n) vii dach(mael) lants gehete(n) padde(n)berch ii dach(mael) opt kerchofveld/ tween(de)dertich roede(n) lants gehete(n) [op] tcleyn roedeken seventhien roede vierdschoefs It(em) iiii(½) dach(mael) lants opden/ meersberch een halfboend(er) opde delleputte en(de) een half boend(er) opden vordriesch besaeit met wy(n)t(er) rogge/ op sijn getidege vore(n) It(em) derdalf dach(mael) en(de) xxv roede(n) lants geleg(en) opde(n) vorsten meersberch/ besait met stoppel rogge It(em) drie dach(mael) lants opden delleputte geleg(en) wel gedreve(n)/ en(de) met g(er)ste(n) besaeit en(de) al vand(er) [dand(er)] storte eens o(m)me gedae(n) en(de) de brake geheel welke/ vurwerde punte(n) en(de) condicie(n) bove(n) bescr(even) de voirs(creven) wy(n)ne heeft geloeft den voirs(creven)/ meest(er) thoemas van wynge wel en(de) volcomelic te houden en(de) te voldoen talle(n) tijde(n)/ als sij valle(n) en(de) v(er)schine(n) zulle(n) en(de) telke(n) t(er)mijne als v(er)volghde schout en(de) des sijn borge(n)/ des voirs(creven) arnts vand(er) dylen als principale sculde(re)n ongezund(er)t en(de) ongesceide(n) jan vander dyle(n)/ wille(m) vand(er) dylen sijn brued(er) de welke de voirs(creven) arnt geloeft heeft scadeloes tontheffe(n) cor(am)/ keye(noe)[ge] vy(n)ckenbosch sept(embris) x sept(embris) ix