It(em) dit es al sulken voirwaerde en(de) al sulken comescape(n) als dese viere goede ma(n)ne verstaen hebben/ Inden iersten claes de crudeneere en(de) gheert lips jan de bruekere en(de) jan vanden boechoute/ ende met desen vier goede manne heeft dese voers(creven) jan deraet en(de) peter sijn broeder wel te vred(en)/ gheweest te dier tijt Als van al sulken handelinghen en(de) ghescille als sij hadden deen tseghen dande(re)/ jan de raet en(de) peter voirs(creven) van erven en(de) van haven als van versterffenessen van vader en(de) moed(er)/ Welke ghescilt altemale te nyeute en(de) doot es met al sulken comescapen en(de) voirwaerden als hier na/ vercleeren sal/ Item inden iersten so hebben dese vier goede ma(n)ne verstaen als dat peter de raet heeft/ ghenoet janne sinen broeder voirs(creven) te coepe sijn hofstat te domont gheleg(en) met huse en(de) met hove/ met harer toebehoerten Dats te wetene ee(n) half dachwant leens daer de huse op staen ende ee(n) (½)/ dachwant erfs naest den leen gheleg(en) ende ee(n) dachwa(n)t tseys goets op tsavel velt gheleg(en) Ende/ noch een dachwant lants gheleg(en) neven tsavel velt Dwelke dachwant lants in neghenen deelde/ daer af heeft hem peter vercocht sijn deel en(de) alle deele die hij daer inne vercreg(en) hadde/ Ende [deser] poertseele waren sij te vreden in aller manyeren d(at) sij gheleghen sijn/ Item doen peter de raet dese comescap noedde janne sinen broeder doen ghelief dese janne wel te/ .ene? maer hij seide datsij hem soude sijn te swaer om datter vi rijders op waren vercocht/ Ende [doe(n)] presenteerde hem peter sijn broeder waer jan is? sterc ghenoech van goede als voir de vi/ rijders So soude hem peter voirs(creven) hulpen zeker doen met sinen goede ende daer op wert een/ mi(n)nelijcke dachvaert gemaect ende doen hadde jan de raet ghesproken minen hee(re) den proefst/ binnen desen middelen tide Also hij seide d(at) m(ij)n hee(re) de proefst wel te vreden was aen janne de raet/[voirs(creven)] ende daer op so ghinc dese comesscap voert Item dat es te wetene dat jan de raet heeft/ ghecocht al sulken hofstat met haren toe behoerten als voirs(creven) es Dats te wete om [c] rijders en(de) ii/ Ende jan hadde op dit goet vii cronen te voren die hem sijn vader ghemaect hadde eens wechs/ draghens en(de) die gaen in dese comescap quijte Aldus soude petere(n) noch bliven c rijders en(de) ii/ Item soe gheloefde de voirs(creven) peter dat hij dese voirs(creven) goede suveren soude van tseyse van renten/ van alderhande onloste die op was te diere tijt En(de) voert meer so gheloefde peter voirs(creven)/ alsulken brieve als peter hadde onder hem die den voirs(creven) janne oft sinen goede soude mog(en) letten/ datmen die doden soude ende te nyeute doen die te dier tijt ghemaect waren Ende so waest/ voirwaerde d(at) jan de raet minen hee(re) den proefst te vreden setten soude binnen veertinnachten/ als van desen vi rijders Ende oec waest voirwaerde d(at) peter voirs(creven) janne erve(n) soude binnen/ veertinnachten ende so wie hier af in ghebreke wae(re) so ondersprakense d(at) alle den cost en(de)/ comen soude op den ghenen die daer af in ghebreke wae(re)/ Item noch al sulken ghescilt alse hadden van alderhande goede va(n) hafelleeken goede/ van costen van gheding(en) van allen onloste die sij deen den anderen heyschende waren/ toet op den dach dat sij comescaepten Daer af so sal jan gheven peter voirs(creven) xxv s(tuvers)/ Ende voert meer so sal peter voirs(creven) op heffen al sulken ghelt als peter heeft staende onder/ de wet van haffelghem ende dat sal sijn te deser (con)dicien d(at) dese vier goede ma(n)ne voi(rt)?/ hebben aenghesett d(at) sij selen trecken beide te gadere en(de) draghen haer behulp biden hee(re)n van/ huckele ocht daert hem ghelieft daer sijs te vreden sijn Ende so wie men bevant van desen/ wetteg(en) costen en(de) van desen xxv s(tuvers) voirs(creven) soe wie dan deen dander tachter es/ die sal dan betalen/ Item voert meer soe heeft jan de raet v(er)pacht tseg(en) petere(n) voirs(creven) al sulken core(n) op velt als/ voirs(creven) hadde te dyer tijt om xv sac rox Ende voert meer soe heeft hij v(er)pacht in ja(nuario)?/ ene(n) termijn van xv jare(n) peters voirs(creven) mersch en(de) vyvers en(de) elsbroech en(de) vand(en) elsho(uten)? (die)?/ peter voirs(creven) behouden de heelt alst ghemaect es van jae(re) te jae(re) alst houwens tijt es/ Ende dit heeft [jan] hij ghehuert elcs jaers in pachte om xxi s(tuvers) fort (et)c(etera)/ Dit was ghedaen int jaer xliii des donder daechs na sinte mertens dach