Want wout(er) vand(er) straten die nae den rechte d(er) stad van loeven(en) come(n) en(de) / geleit is tot alle(n) den haeflike(n) goeden jans wile(n) fijten opden dach van / heden hadde doen inne scrijve(n) d(er) weduwen des vors(creven) wile(n) jans met hue(re)n / kind(ere)n die hem ongebr(uyc) dede aende haeflike goede h(ier) nae bescr(even) te wete(n) / Inde(n) iersten aen v bedde(n) met hue(re)n toebehoerte(n) viii ee(re)n potten iiii ketele / ii sidele(n) ii scrijne(n) i dossine cussene (½) dossine oircussene aen ald(er)hande(n) / huysraet ene(n) wage(n) met iiii p(er)de(n) met den getouwe xiiii v(er)ke(n)ne ii / pluege met hue(re)n toebeh(oerten) x stucke(n) horenvees lxxxvi scape(n) It(em) / aen alle de vruchte(n) va(n) alle(n) den lande toebehoren(de) den hove geleg(en) / tot bierbeke gelijc die vruchte(n) ald(aer) inde schue(re) liggen(de) sijn Ald(aer) de / vors(creven) p(er)soene(n) niet come(n) en sijn Soe hebbe(n) de h(ere)n scepen(en) va(n) loven(en) / t(er) manissen smeyers gewijst voir een vo(n)nisse datme(n) den voirscr(even) / wout(ere)n vande(n) vors(creven) goede(n) houde(n) sal in sine(n) beleide alsoe v(er)re alst / noch voir hen come(n) is cor(am) g(ra)ve(n) abs(oloens) witte willem(air) hasenb(er)ge oct(obris) / xxi /