Item het sijn comen in rechte voir meye(r) en(de) scepen(en) van loeven(e)/ henric tangisaert als geleit totten goeden he(re)n jans wilen loirnir/ van grave(n) priest(er)s p(ro)chiaen van dioen le vail in deen zijde en(de) jan/ masalynne en(de) marie sijn huysvrouwe nat(ur)like docht(er) des vors(creven)/ wilen he(re)n jans die de selve wilen h(er) jan hadde van m(ar)grieten/ wilen le sohier in dande(re) alsse vande(n) goede(n) h(ier) ond(er) bescreve(n)/ Inden yersten van eene(n) huyse en(de) hove met sijnre toebehoirten/ gelegen te dyoen le vail acht(er) de kerke tusschen de goede eens/ geheeten le chondier? en(de) den hoff geheten le quardier Iten/ van eene(n) dachmael lants geleghe(n) neve(n) de vors(creven) goede/ tussche(n) de goede philips de dyoen en(de) de goede alarts pochet/ Ende na dien dat de selve henric v(er)socht hadde inde vors(creven)/ goede gehouden te worden soe spraken de vors(creven) jan met/ marie(n) sijnd(er) huysvrouwe(n) vors(creven) de selve goede aen seggen(de) de/ selve jan dat marie vors(creven) sijn wettich wijf is ende ten tijde(n)/ als hij met hue(r) wetteliken nae staet der heyligher kerken/ in huwelike v(er)gade(re)n soude soe waren de vors(creven) goede in/ den selven huwelike bijden vors(creven) wilen h(er) jan(n)e loirnir en(de)/ margriete wile(n) le sohier vader en(de) moeder marien sijnre/ huysvrouwe(n) in huweliker vurw(er)den v(er)loeft en(de) ghegeve(n)/ op welke vurw(er)de en(de) ghifte den huwelijc toeghinc ende/ ghesloten was Seggende voirt dat h(er) jan en(de) m(ar)griete wile(n)/ vors(creven) ten tijden dat sij die vors(creven) goede alsoe in huwelike(n) gaven/ der selver goede wael mechtich waren te geven(e) te v(er)copen(e) en(de)/ anderssins hue(re)n vrien wille mede te doene biedende de voirscr(even)/ poenten alle te thoenen(e) metten minsten (et)c(etera) hopen(de) waer [hij] dat/ gethoene(n) conste dat hem met marien sijnre huysvrouwen/ de vors(creven) goeden volgen souden en(de) sculdich waren te volgene/ Daer op de voirs(creven) henric tangisart de cont(ra)rie meynde ende/ dat jan masalyne ne(m)mermeer thoene(n) en soude des hij/ v(er)meten hadde niet min want hijt boot te thoene(ne) soe gaff/ over de selve henric oft hijt gethoene(n) conste hem die goede/ te laten volgene want hij nyemande en soude willen/ defraude(re)n int tghene des hem doeghdeliken geonne(n) oft
//
ghegeve(n) ware Ende na dat de voirs(creven) jan masalynne gewesen/ is tot sijnen thoenisse ende hij ten daghe van thoenen hem nae/ recht dienen(de) met goeden mannen die bij en(de) over de(n) voirs(creven)/ huweliken gheweest hadden thoende die voirs(creven) ghifte ende/ ande(re) poenten voirs(creven) soe hebben de he(re)n scepen(en) ghewijst voir/ een vo(n)nisse dat janne masalynne met marien sijnre huysvr(ouwe)/ dese goede volgen sullen na dat die waerheit ghedragen/ heeft cor(am) roelants jasp(ar) abs(oloens) smachts hortbeke meersberghe/ aprilis xxviii