Nae dien dat gheert van coudenberghe voir den raide vand(er)/ stad hadde doen daghen janne van coudenberghe sine(n) bruede(r) die/ nae den rechte der selver stat come(n) en(de) geleit es tot allen den/ goeden beyde have en(de) erve des vors(creven) gheerts sijns brued(er)s en(de) de/ beleitbrieve alnoch in sine(n) hande(n) heeft Beghe(re)nde sijne voirs(creven)/ brieve vanden selve(n) sijne(n) bruede(r) ov(er)gelev(er)t te hebben(e) oft onder/ de stad geleit te hebben(e) Daer op de vors(creven) jan seyde kennen(de)/ dat hij geleit es totten goede(n) des vors(creven) gheerts sijns brueders en(de)/ dat hij de brieve in sijne(n) handen heeft tot alsulker meyni(n)gen/ Want hij an alherande div(er)se p(er)sone voir den selve(n) sijne(n) brued(er)/ borghe bleve(n) es alse voir viii rijders lijfpensien dat hij die/ behoude(n) soude en(de) niet d(aer)aff sceiden voir dat hem de selve gheert/ vande(n) voirs(creven) viii rijders geheelic en(de) all gelost soude hebben/ Ende voirt seide de selve jan van coudenberghe dat hij uut/ machte vanden selven beleide seke(re) gedinghen gehadt heeft/ vanden goede(n) des voirs(creven) gheerts tot hev(er)le geleg(en) ende/ dair o(m)me v(er)dinct ende cost geleden van c en(de) xiiii rinsche/ guld(en) of d(air) omtrint meynen(de) oic mids dier redenen de vors(creven)/ brieve te behouden(e) tot aend(er) tijt toe de vors(creven) gheert hem/ van dien rastoir gedaen soude hebben Op dwelc gheert van/ coudenb(er)ghe allegeerde dat hij wael geloefde dat jan sijn/ brueder seke(re) gedinghen gehadt mocht hebben om zeke(re) goede/ tot hev(er)le geleg(en) hen toebehoe(re)nde mair dat dat geschiet/ ware buyten sijne(n) consente en(de) weten en(de) hoepte d(air)om vande(n)/ costen die hij d(air) o(m)me gedaen heeft ongehouden te wesen/ Soe heeft den raidt vand(er) stad get(er)mineert voir recht met/ vollen ghevolge dat de vors(creven) jan van coudenb(er)ghe de vors(creven)/ brieve behouden sall in sijne(n) handen tot aend(er) tijt toe hem/ de vors(creven) gheert vande(n) vors(creven) viii rijders lijfpens(ien) gelost sall/ hebben oft metten selven beleide soe vele vanden goeden/ des vors(creven) gheerts vercopen dat hij hem vande(n) selve(n) viii rijd(er)s/ gelost sall hebben en(de) hem ghelost wesen(de) sall hij de selve br(ieve)/ sine(n) bruede(r) overgeve(n) en(de) tlivereren ende [alse] vanden coste/ vande(n) vors(creven) ghedinghe die loept op c en(de) xiiii r(insche) guld(en)/ sette de raidt vander stadt de vors(creven) ghebruede(re)n voir meye(r)/ en(de) scepen(en) van loven(e) ald(air) van dien recht te geve(n) en(de) te/ nemen P(rese)nt(ibus) lud(ovico) roelofs joh(anne) prijke(re) burg(i)m(a)g(ist)r(is) god(efrido)/ roelofs lud(ovico) uut(er)helicht egidio vos (et) aliis de (con)silio ja(nua)[rii]/ penult(ima) a(nn)[o] lv[o]