It(em) ter meerder vestich(eit) den voirs(creven) barthelmeeuse en(de) jorijse te doene/ van des voirs(creven) es soe sijn bij handen jans de coninck vorst(er)s te loeven(e)/ vanden voirs(creven) h(er) anthonijse janne madea tot behoef barth(elmeeus) en(de) jorijs voirs(creven)/ in handen ghesedt ende voir tvoldoen der voirs(creven) brieve(n) verobligeert te/ weten(e) ix zilve(re)n schale(n) wegen(de) vi marct te dien eynde ghevuerdert/ den voirs(creven) barth(elmeeuse) ende jorijse in toecomen(de) tijden ind(er) betalinge(n) vander/ voirs(creven) lijfrinte(n) oft bewijsenisse der selv(er) e(n)nic ghebreck te hebbene Soe/ zullen sij oft yemant and(er)s van hue(re)n weghe(n) recht hebben(de) moghe(n)/ sijn ghebreck aen de voirs(creven) juwelen verhalen en(de) die vercoepe(n) voir/ alsulken prijs als e(n)nich goutsmet oft juwelier ind(er) stad van lov(ene)/ d(air) voe(r) sal wille(n) geve(n) ende d(air) mede ghestaen zond(er) den voirs(creven) h(er)/ anthonijse vanden selve(n) juweele(n) meer oft vorder te v(er)antw(er)dene/ rekeninghe oft restitucie te doene En(de) oft ov(er) huer ghebreck yet ov(er)schote/ dat soude(n) sij den voirs(creven) h(er) anthonijse wed(er)keeren ende oft dair/ yet ghebrake dat soude(n) sij met hue(re)n scep(enen) brieve v(er)hale(n) eisd(em)