Het sijn comen in rechte voir meye(r) ende scepen(en) van loeven(e) inde banck/ aldair daneel vander rivie(re)n in deen zijde ende arnt vanden hulze gheheete(n)/ van halle in dand(er) zijde aldair de voirs(creven) daneel den voirs(creven) arnde aen sprack/ segghende dat hij vortijden als hij vorste(r) was tot zichen(e) den voirs(creven) arnde/ in hachten hadde ten versueke jans van ost als vermechticht van diericken den/ grobbe(re) voe(r) de so(m)me van xxxii l(i)b(ra) gr(oten) xiii schillinge(n) iiii pe(n)ninghe(n) der mu(n)te(n) van/ vlaende(re)n ende dat de voirs(creven) dierick op dach van rechte dair toe dienende/ den voirs(creven) arnde met rechte aensprack eysschende xxxii pont xiii s(chillingen) iiii d(enieren)/ gr(oten) vleemschs die hij hem schuldich was met sine(n) zeghele ende brieve(n) den/ selve(n) diericke dair aff verlient ende ghegheve(n) Ende dat tusschen den/ selve(n) diericke ter eenre ende den selven arnde ter ande(re) aldair voir/ scepen(en) van zichene met rechte soe verre gheprocedeert es gheweest/ dat de scepen(en) van zichen(e) heeft daensprake van van diericke voirs(creven) en(de)/ tverantw(er)den desselfs arnts verhoort hebbende die saken wijs noch/ vroet en wa(r)en en(de) begheerden van dien cost ende gheleyde voir den/ scepen(en) van loeven(e) als voir huer hoot ende dat doen de meye(r) van/ zichene als hee(re) beyde den p(ar)tijen dach beschiet van inte settene [ende eene(n) dach d(air)toe stelde die ter moete(n) des voirs(creven) arnts diende ende als die(n) dach van insettene] quam/ dat de voirs(creven) dierick doen insette en(de) de voirs(creven) arnt niet Ende dat/ dair nae ter naest(er) ghenechten bij manissen smeyers van zichene de scep(enen)/ van zichene(n) met vonnissen wijsden dat dierick sine(n) eysch verreyct sal/ hebben op arnde voirs(creven) nae inhoudt sijns briefs ghelijck hij aengesproke(n)/ heeft Seggen(de) voort de selve daneel dat de voirs(creven) arnt nae den/ voirs(creven) ghewijsden vonnissen hem uuter voirs(creven) hachten ende vroenten/ vluchtich ghemaect heeft ende ontbrooken tot inder kercken ende voort/ uuter kercken hem ontwrachte en(de) soe ontcome(n) Ende dat dair nae/ es come(n) de voirs(creven) dierick ende heeft de vroente des voirs(creven) daneels/ voir de voirs(creven) schout van xxxii pont xiii s(chillingen) iiii d(enieren) grote hem metten/ voirs(creven) vonnisse aenghewesen sijnde en(de) voir cost en(de) co(m)mer d(air) op gheloepe(n)/ met rechte beleyt Seggen(de) voort dat dair nae de meye(r) van zichen(e)/ alle de goede desselfs daneels dair voe(r) in rastime(n)ten ghedaen heeft/ ende dat de selve goede oic met mandamente ons gened(ichs) she(re)n dair/ voe(r) in rastimenten ghedaen sijn ende alsoe noch in rastimente staen/ Bieden(de) alle de pointen voirs(creven) te thonen(e) en(de) mette(n) mynste(n) hopen(de) soe wair/ hij die ghethone(n) coste dat de voirs(creven) arnt ghehoude(n) zoude sijn hem de voirs(creven)/ xxxii l(i)b(ra) xiii s(chillingen) iiii pe(n)ninge(n) gr(ote) vlem(schs) op te leggen(e) en(de) te betalen(e) oft de(n) selve(n)/ daneele en(de) sij(n) goede d(air) af te lossen(e) en(de) voort de voirs(creven) costen te betalene
//
ende ghegheve(n) Van welker aenspraken de voirs(creven) arnt onghehoude(n)/ meynde te zijne ghemerckt dat hoe wale hij met sine(n) brieve(n) (ende) zegele/ bekent ende verseghelt hadde den voirs(creven) diericken de voirs(creven) schout/ schuldich te zijne soe mochte hij die schout wel betaelt hebben/ want een quade schuld es die men niet betalen en mach met/ meer ande(re)n woorden luttel oft niet in rechte jeghen den voirscr(even)/ daneele dienen(de) Soe es ten uuterssten nae dat daneel tot/ sine(n) thonisse ghewesen was ende hij ten daghe van thoenen mett(er)/ wet van zichene en(de) hue(re)n secretar(is) thoende tghene des hij hem/ voe(r) vermete(n) hadde ghewijst dat arnt ghehouden sall sijn daneele/ vander rivie(re)n betalinghe te doene vanden xxxii ponde(n) groete(n) xiii/ schillinge(n) iiii pe(n)ninghe(n) vleemschs oft hem en(de) sijn goede van/ dien aen diericken den grobbe(re) te lossene ende voort ghehouden/ sijn inde coste(n) van rechte februarii xii cor(am) lyeminghe(n)/ witte pynnoc vyncke cok(eroul) ouder(ogghe) febr(uarii) xii