It(em) mits den ov(er)goidene vander tocht der voirs(creven) goeden bijder voirs(creven) katlinen/ den voirs(creven) jaspe(re)n hue(re)n zone ov(er)ghegoeyt ghelijck voirs(creven) steet hebben de/ selve jaspar ende margriete spapen sijn wijff over ende te henw(er)t ghenome(n)/ alsulken rijder lijftochte(n) als jan vander varent tot sine(n) live ende ten live brued(er)/ peet(er)s ackerman ende ten live des lanxten leven(de) van hen beide(n) opden xxvii[e(n)] dach/ van aprille int jair van lxvii teghen katline(n) sproit(er)s weduwe barthelmeeus/ wijlen comelinx ende der voirs(creven) katline(n) huer(er) docht(er) moeder des voirs(creven) jaspars/ vercreghen ende ghecocht heeft aen ende op de goide h(ier) onder bescreven Inde(n)/ yersten op huys ende hoff gheleghen beneden den blauwenputte tusschen janne vand(er)/ varent ende den hoff toebehorende der capelle(n) vand(er) heiligher drievuldich(eit) op/ deen zijde ende de goide jans die scepe(re) in dand(er) zijde Item (...) een stuck lants gelege(n)/ int sproit(er)s block tusschen de goide alijten vleeminx ende de goede lijsbetten rix/ Ende hebben ghelooft indivisim de voirg(enoemde) ghehuysschen der voirsc(reven) katline(n) des/ voirs(creven) jasp(er)s moeder dat sij sullen jairlix ten behoirlijken tijden den selve(n) rijder/ ghelden ende betalen ende de voirs(creven) onderpande dair af schadeloes houden ende/ ontheffen Hebben voort ghelooft de voirs(creven) ghehuysschen der selver katlinen/ alle jaire alsoe langhe als de selve katline leve(n) sal huer wael ende loflic te/ wynne(n) ende te werve(n) omtrent drie dach(mael) lants ghelijck sij gheleghe(n) sijn in/ twee stucken beneden den blauwenputte zonder e(n)nighen cost oft last der selv(er)/ katlinen ende dat de selve katline de vruchten dair aff huer leve(n) due(re)nde trecken/ sall met vurw(er)den dat de selve katline allet stroe dat jairlix dair af come(n) sal/ met hue(re)n beesten sall etten ende slijten ende dair aff mest maken welck mest/ jairlix den voirs(creven) jasp(er)en volghen sal zonder dat de voirs(creven) katline [d(aer)] af af yet/ sal moghen v(er)coepen oft ewech gheve(n) Ende h(ier) op zulle(n) de voirs(creven) jaspar ende/ sijn wijff op hue(re)n cost ghehoude(n) sijn de voirs(creven) goede wel ende loflick gelijck/ hue(re)n p(ro)pren goeden ende reghenoete(n) boven ende beneden ten behoirlijken tijden
//
te mestene zonder arghelist Met vurw(er)den oic oft de selve katline/ voir huer beesten metten stroe dat jairlix vanden voirs(creven) iii dach(mael) come(n)/ sall niet voeders ghenoech en hadde dat sij altoes tghebreck van dien/ voort halen sal moghen inder schue(re)n oft woninghen des voirs(creven) jasp(er)s/ ende sijns wijfs dwelck sij der selv(er) katline(n) alsoe gheconsenteert/ hebben ende dair af ghelooft leveringhe te doene Behoud(elic) dat dmest/ van dien altoes den voirs(creven) ghehuysschen volghen sal zond(er) argelist/ cor(am) eisd(em)