It(em) t(er) meerder vestich(eit) den voir(screven) janne boxhoe(re)n ende sine(n) kynde(re)n/ voirs(creven) te doene soe sijn bij handen jans bailge vorst(er)s te loven(e)/ vanden vors(creven) janne carpentier den voirg(enoemde) janne boxhore(n) tot behoef/ van hem en(de) sine(n) kinde(re)n voirscr(even) in handen ghesedt ende v(er)obligeert/ voir tvoldoen der voirg(eruerde) lijfrenten verobligeert de juweelen h(ier) nae besc(re)ve(n)/ Inden yersten xi silve(re)n croesen de boorde v(er)gult weghen(de) vi merct troys/ It(em) vi silve(re)n schalen met sonnen de boerde en(de) de sonne(n) v(er)gult weghen(de)/ xi(½) m(er)ct It(em) een mans gorddel met zilve(r) v(er)gulde(n) beslaghe(n) It(em)/ een vrouwen onder gorddel met silve(r) beslaghe(n) It(em) een gespe ende eene(n)/ m(ar)chant van eene(n) vrouwen gorddele v(er)gult weghen(de) te same(n) metten/ webben ende leeren iiii m(er)ct ii oncen It(em) eene(n) vrouwen sangwine(n) webbene(n)/ borstriem [v(er)gult] It(em) eene(n) vrouwen ryem van roeden webbe v(er)gult weghen(de) te
//
same(n) xi oncen It(em) een gulden cruyce met vijff p(er)len een gulde(n)/ span met vijff p(er)len met eene(n) amantiste ende eene(n) dyamante wegen(de)/ te gade(r) ii oncen It(em) vi p(er)len vorspanne weghende mette(n) voederinghe(n)/ der selv(er) vi oncen It(em) xii zilve(re) lepele weghen(de) xiiii oncen It(em) ii/ dobbele gulden(e) la(m)meren ende twee oude gulden lewe Te dyen/ eynde ghebuerdet den voirs(creven) janne boxhoe(re)n oft sine(n) kinde(re)n vorscr(even)/ inde voirs(creven) lijfrente ind(er) bewijsenissen der selv(er) oft inde(n) vors(creven) scep(enen)/ brief in toecomenden tijde(n) e(n)nich ghebreck te hebben(e) dat sij oft/ yeman and(er)s recht dair inne hebben(de) sijn ghebreck aen de vors(creven)/ juweele(n) v(er)halen sal moghe(n) ende die met rechte te prijse van/ juweliers oft goutsmede(n) hen des v(er)staen(de) v(er)coepen ende he(n) aen de/ pe(n)ninghe dair af comen(de) verrichte(n) Ende oft de voirs(creven) jan boxhoe(re)n/ en(de) sijn kinde(re) and(er)s dan met v(er)coepen(e) der selv(er) juweele(n) vernueght/ wordden soe sal de vors(creven) jan boxhoe(re)n ghehoude(n) sijn den vors(creven)/ janne carpentier de voirg(eruerde) juweelen ov(er) te leveren(e) ghelijck hij die/ ontfanghen heeft cor(am) eisd(em)