It(em) nae dien dat questie come(n) es voir den raide vander stadt/ tusschen tgodshuys van sinte g(er)truyden te loven(en) t(er) eenre zijde(n)/ ende gielijse gouthuys t(er) ande(r) zijde(n) alse van dien dat de scape/ desselfs gielijs bevonden wae(re)n opde bossche des voirs(creven) godshuys/ ghelegen te lynden(en) vinde dair omtrent en(en) vanden selven bosschen gheschudt/ ende ghecalengiert voir die schadde die sij dair op ghedaen hadde(n)/ vanden welken de selve gielijs meynde onghehouden te zijne ghem(er)ct/ dat de voirs(creven) bosschen dair de scape op bevonden wae(re)n out wae(re)n iii/ jair ende dair boven Ende aenghesien oic dat ghewoenlick is en(de)/ es gheploghen ende ghehanteert over xxx jair ende daghen datme(n)/ inde voirs(creven) bossche ende ande(re) dair omtrent te hosbeke ende oic dair/ omtrent gheleghen heeft moghen drive(n) ende houden scape zonder/ calengie(re)n oft afghepant te wordden(e) toesiende eene(n) yeghelijken ghelijck/ de selve gielijs dat boot te thonen(e) Soe es ten ut(er)sten nae allegacie(n)/ van beyde p(ar)tijen ende thonisse des voirs(creven) gielijs ghet(er)mineert/ dat de selve gielijs vanden voirs(creven) calangien van sine(n) scapen nu t(er)/ tijt sal onghehouden sijn Cor(am) judoco absoloens vice burg(imagistr)[o] et/ hoeven burgima(ist)ro et aliis de ple(n)o (con)silio julii xv