Tvo(n)nisse tusschen pete(re)n der kinde(re)n aenlegghe(r) in deen zijde ende/ willem vanden cloeste(re) gheheete(n) cobbelgier in dand(er) zijde alse van dien/ dat de voirs(creven) willem vanden cloeste(re) de lande ende goede die hij vanden/ voirs(creven) pete(re)n in helicht wynninge(n) ghenome(n) hadde eene(n) t(er)mijn van vi/ jairen meswonne(n) soude hebben oic niet volcomelick ghemest en soude/ hebben nocht oic ghemerghelt nae inhouden der vurw(er)den vand(er) helicht/ wy(n)ni(n)gen voirs(creven) dair af de selve willem de c(on)trarie dede segghe(n) want/ hij die goede ghewonne(n) ende gheworve(n) hadde ghelijck sijns selfs goide/ ende ghelijck reghenoeten boven en(de) beneden ende bat dan reghenoete(n) boven/ en(de) beneden ende alsoe dat de erghste van dien goeden nu beet(er) wae(re)n ende/ oic de vruchte(n) van dien dan te voe(re)n de beste goede van dien oft e(m)mer/ alsoe goet als de beste te voe(re)n wae(re)n ende dat hij oic die ghemest hadde/ wale ende loflick ghelijck regenoete(n) boven en(de) beneden ende dat hij als vande(n)/ merghelene den voirs(creven) pete(re)n hadde doen aensueken dat hij nae volghen(de)/ der vurw(er)den vand(er) helicht wynninghe(n) den merghel hadde willen coepen/ opde cuyle hij souden d(aer) op ghehaelt hebben Ende op drie dach(mael) lants vande(n)/ voirs(creven) lande jairlix ghevuerdt hebben op (½) mudde eeven(en) dair af te hebben(e)/ bieden(e) dat te bewijsene soe hem dat nae recht soude moghen ghenoech sijn/ P(rese)nteren(de) noch den voirs(creven) merghel opde cuyle te halen(e) en(de) nae vurw(er)de(n) vander/ helicht wynni(n)ge(n) opde lande te vueren(e) eve(n)v(er)re de voirs(creven) peet(er) den selve(n) m(er)gel/ op de cuyle gheliefde te copen(e) Es ten uut(er)sten ghewijst nae aensprake v(er)antw(er)de(n)/ en(de) thonisse van beyde(n) p(ar)tijen dat de voirs(creven) willem nae bewijsenissedie hij/ ghedaen heeft met sijne vorsc(reven) p(rese)ntacien ghestaen sal cor(am) roelofs roelofs/ meld(er)t vos most augusti pe(nulti)[ma]