Allen den ghenen dier dese onse l(ette)ren ghethoent zullen wordde(n)/ burg(er)meeste(re)n scepen(en) ende raid der stad van loven(e) saluyt met ke(n)nisse(n)/ der wairheit doen te weten(e) dat opden dach van heden voir ons come(n)/ sijn vrouwe anne vander calste(re)n meestersse ende tconvent des groet gasthuys/ van loven(e) metgad(er)s den momboe(re)n desselfs gasthuys Ende hebben aldaer/ in behoirlijker vormen ende manie(re)n soe dat nae recht best dienen mach/ ende behoe(re)n van weghen des voirs(creven) gasthuys volcomelick ghemechticht/ ghesedt gheordineert ende gheconstitueert ende met desen l(ette)ren vermechtighe(n)/ setten ordinee(re)n ende constituee(re)n he(re)n hectoren pauwels prieste(r) jacoppe/ vander noeyen en(de) roelove de witte buerduerwercke(r) ende elken van hen/ besundert hue(re)n p(ro)cureurs ende zunderlinghen boden om alle des voirs(creven)/ gasthuys goede erfchijse erfrenten erfpachten thienden ende schulde(re)n/ tot wat plaetssen aen wat goeden oft p(er)soenen dat dat sij oft ghebue(re)n/ sal te eysschene te manene op te buerene ende inne te heffene Ende/ van allen ghehaven(en) goede renten pachten schulden ende chijsen behoirlijke/ ende behoeflijke den ghenen dies behoeft quitan(cien) te gheven(e) ende die/ goede erfchijsen erfrente(n) pachten thienden ende schulden ofts noot zij/ met rechte tallen plaetssen ende voir alle gherichten dair dat gebue(re)n/ oft behoe(re)n sal moghen te v(er)volghen(e) ende derflicheit ende p(ro)prieteyt/ van dien te bedinghen(e) alle pointen ende artijclen van rechte dair/ toe nae recht oft costume vander plaetssen dienen(de) te houden(e) ende te/ verwae(re)n totten ynde uute vanden rechte met vonnissen te wynnen(e) en(de)/ te v(er)liesen(e) die goede te verpachten(e) oft in jairscharen oft in helicht/ wynne(n)ghe(n) uut te geven(e) ende den pechtene(re)n ende wynnen dair af/ behoefte ende vesticheit te doene uutsedt ende composicie te maken(e)/ ende alle tghene dair inne te doene en(de) te vorderen(e) inden rechte/ ende anderssins ghelijck de voirs(creven) meestersse ende convent t mette(n)/ voirs(creven) momboe(re)n selve doen souden oft mochte(n) waert dat sij voir/ oeghen wae(re)n Gheloven(de) de voirs(creven) meestersse ende co(n)vent ende de/ voirs(creven) momboe(re)n van weghen des voirs(creven) gasthuys vast en(de) van weerde(n)/ te houden(e) ende te hebben(e) soe wes bijden voirs(creven) p(ro)cureurs oft/ e(n)nighen van hen dair inne ende in des dair aen cleven mach/ ghedaen ende ghevordert sal wordden in e(n)nig(er) manie(re)n alle/ arghelist hier inne uutghescheyde(n) dese p(ro)curacie voirs(creven) totten/ wederroepe der voirs(creven) meesterssen convente ende momboe(re)n due(re)nde/ ende niet langhe(r) cor(am) tybe burg(imagistr)[o] vos wynghe scab(inis) sept(embris) xxii