Item tvo(n)nisse tusschen daneele daneels alse geleidt tot den haefliken/ goeden jans van opleeuwe voer zijn deughdelick gebreck van dien/ dat de selve jan van opleeuwe den voirs(creven) daneele gelooft heeft scadel(ois)/ te houden ende tontheffen van eenen vie(re)ndeele van v pet(er)s lijft(ochte)/ ten live wouters meynen droeghscheerd(er)s d(air) inne de selve daneel/ met meer ande(re)n verbonden steet met scepen(en) brieven van loeven/ in deen zijde en(de) den voirs(creven) janne van opleeuwe in dande(re) aldair/de voirs(creven) [welck] daneel dede p(ro)duce(re)n in rechte eenen scepen(en) brief van lov(en)/ vander daet xiiii[c] lxvi opten xiiii dach van julio inhouden(de) dat/ de voirs(creven) jan van opleeuwe hem vanden voirs(creven) vie(re)ndele der vors(creven)/ lijftocht gelooft heeft scadelois te houden en(de) tontheffen gelijc/ de selve brieve dat voirder uutwisen ende begripen En(de) dede/ voert p(ro)duce(re)n hoe dat hij bij rigoe(re) van rechte vanden voirs(creven) wout(ere)n/ met rechte bedwonghen tvoirs(creven) vie(re)ndeel heeft afgequeten met gad(er)s/ den acht(er)stelle der selver metter so(m)men van xxiiii(½) gulden(en) te x/ stuv(er)s tstuck en(de) vii(½) stuv(er)s gelijc de brieve van dien dairop gemaict/ januarii xxix lestleden dat inhouden ende begripen Dair tegen/ de voirs(creven) jan van opleeuwe hem opponeerde seggende dat hij zeke(re)/ pe(n)ninghe opten wissel gesett hadde om de voirs(creven) lijftocht te betale(n)/ meynende mids dien te gestaene Dair op de voirs(creven) daneel repliceerde/ dat tgelt alleene vanden pachte en(de) niet vander principaelre quiti(n)ge(n)/ aldair gesett was en(de) es oic den selven pacht gesett na dien/ dat de selve daneel ten v(er)suecke des voirs(creven) wout(er)s met brieven/ vander stad versocht es te voldoende So es ten uut(er)sten gewijst/ dat den voirs(creven) daneele en(de) zijnen beleide de haeflike goede des/ voirs(creven) jans van opleeuwe volgen selen tot behoef zijnre wettig(er)/ gebreke voirger(uert) absoloens miles blanckairt abs(oloens) m(er)cels hoeven/ lynden fe(bruarii) xii