It(em) want de voirs(creven) joffr(ouwe) magriete den voirs(creven) gielijse hue(re)n/ brued(er) mits wettighen (con)tracte tussen hen ghemaect aengenome(n)/
//
heeft te huysen en(de) te hoven ligghen en(de) sitten vier en(de) liecht/ en(de) sijnen montcost tot huer(er) tafelen te gheven soe langhe hem/ dat ghelieven sal en(de) niet langhe(r) Soe heeft de voirs(creven)/ gielijs de voirs(creven) p(ro)curacie der voirs(creven) sijnre sust(er) v(er)leden en(de)/ gegeven o(m)me in betalinghe(n) van des voirs(creven) es huer daer/ mede jaerlix ende tallen t(er)mijne(n) als de voirs(creven) lijftocht rinten/ inder voirs(creven) p(ro)curacien begrepen ghevallen ende verschenen/ sijn sullen te behulpen ende die te heffene en(de) te bue(re)n int/ gheheele Behoudelic dat sij daer af voer huer/ betalinghe ierst aftrecken sal twintich rinssche gulden(en)/ en(de) tsurplus wassen(de) boven last en(de) co(m)mer soe wanneer/ sij dat ghebuert sal hebben den voirs(creven) gielijse uutreiken/ ende alsdan sal de selve gielijs gehouden sijn den sculders/ oft de goede die inde voirs(creven) lijftochte gehouden sijn in meerd(er)/ vesticheit en(de) in ratificacien der voirs(creven) p(ro)curacie(n) quitan(cie)/ te gheven Ende desgelijx der selv(er) sijnre suster vanden/ surplus voirs(creven) wassen(de) als voe(r) oic quitan(cie) te gheven/ Behoud(elic) in desen soe wanneer den voirs(creven) gielijse gelieve(n)/ sal vander voirs(creven) sijnre suster te sceiden en(de) van des voirs(creven)/ steet hem van huer te doene te v(er)dragen dat hij dat/ sal moeghen doen wa(n)neer hij wilt betalen(de) nochtan/ der voirs(creven) sijnre suster van allen acht(er)stelle ende nae/ ghelande vanden tijde ende hem alsoe ghesceiden ende/ der voirs(creven) sijnre suster voldaen sijnde salmen de voirs(creven)/ p(ro)curacie te nyeute doen en(de) niet eer en(de) tot des(er) meyni(n)ge(n)/ sal dese p(ro)curacie bliven liggen(de) onder scepen(en) van loeven(e)/ tot dien ynde dat die bijden voirs(creven) gielijse niet en sal moge(n) wed(er)roepen wordden ten sij dat der voirs(creven) sijnre suster voldaen/ sij tghene des voe(r) gheruert es ende ten ynde van desen/ sal sijn sust(er) gehouden sijn hem in sijne(n) handen ov(er) te gheven/ alsulke brieve als sij onder heeft der voirs(creven) lijft(ochten) aengaende/ op behoeflijke en(de) behoirlijke ke(n)nisse(n) oft quitan(cie) van ontfange/ soe dat behoirt en(de) sond(er) arghelist cor(am) eisd(em)