Allen den ghenen die dese letteren sullen sien oft ho(r)en lesen/ burgermeeste(re)n scepen(en) en(de) raide der stat van loven(e) saluyt/ en(de) alle vrientscap Doen cont en(de) te weten(e) dat op den/ dach datum van desen voir ons comen en(de) gestaen zijn/ in propere p(er)sonen her jan [vanden] zande gheheten luycx priester/ en(de) laureys van maelcote [priesters] capellaen der kercken van sinte/ peters te loven(e) raes vander lynden jan van berthem/ jacop van vertrike als man en(de) momboir katlijnen mager/ mans zijns wyfs henric van mulcke jan de coste(re) jouffr(ouwe)/ yde ysacx professe inden godshuys vand(er) banc bij loven(e) met/ wille en(de) ten bijsijne van der vruwen vanden voirs(creven) godshuyse/ jouffr(ouwe) gertruyt sangewijns lijsbeth ysacx weduwe lodewijx/ wilen vanden meersberge en(de) marie scosters weduwe/ vranx wilen kemel ende hebben geconstitueert volcome(n)/ macht procuracie ende auctoriteit gegeven tyboute steenweechs/ onsen gesworen(en) bode en(de) ingeseten(en) poirte(r) om inden name/ en(de) tot behoef van hen te manen teysschen opte boren en(de)/ tontfangen alle alsulke gevallen(en) ende verschenen renten/ die den selven p(er)sonen verschenen zijn en(de) namaels/ verschijnen zullen uut saken vand(en) lijftocht die de selve/ p(er)sone hebben en(de) jairlix heffen(de) zijn tot hue(re)n liven na/ uutwisen der brieve(n) beseghelt metten seghel ten saken der/ vorsc(reven) stat van ts(her)togenbossche [die sij d(aer) af hebbe(n)] aen en(de) op de proffijten en(de) demanie(n)/ ons gened(ichs) he(re)n ts(her)togen in zijnd(er) vors(creven) stat vand(en) bossche en(de)/ opde selve stat En(de) van zijnen ontfanghe te quiteren ende/ volcomen quitancie te gheven En(de) vortaen generalic en(de)/ specialijc allet ghene in des voirs(creven) is te doene en(de) te/ vorde(re)n des de selve p(er)sone(n) oft zij tegenwordich wae(re)n/ souden mogen doen. Geloven(de) de voirs(creven) p(er)sone en(de) elc/ van hen besunder zoe verre het eenen yegeliken aengaen/ mach opde verbintenisse en(de) ypoteke van allen hue(re)n/ goeden beruerlic en(de) omberuerlic tegenwordich en(de) toecomen(de)/ goet vast gestentich en(de) van weerden te houden allet ghene/ des bijden voirs(creven) tyboute steenweeghs van desen voirs(creven) is [sijnen ontfange]/ gedaen en(de) gevordert sal wordden in e(n)nigher manie(re)n/ behoudelic dat de selve tybout gehouden sal zijn van/ zijnen ontfange in deesen elcke vanden vors(creven) p(er)sonen goede/ rekeninge bewijs en(de) betalinghen te doen cor(am) tybe jud(oco)/ abs(oloens) lynden nove(m)bris xvi