Allen den ghenen die dese l(ette)ren sullen sien oft hoiren/ lesen burgermeesteren scepen(en) ende raidt der stad van/ loeven(e) saluyt ende alle vrientscap doen cont dat voir/ ons comen es in p(er)sone peter beyardt secretar(is) der stad/ van loeven(e) wederroepen(de) alsulcken procuratie ende mech/ ticheyt als hij vormaels gegheven heeft henricke hoze/ oft yemande anders Ende heeft voirt geconstitueert volcomen/ mach procuratie ende auctoriteyt gegeven ende gemaect/ met desen goirde lyndeman wonende te bierbeke om sijn/ meyere ende rentmeester te sijne van sijnen renten die hij/ heeft te hagersrode omder bierbeke gheleghen gehouden te/ lene van edelen ende waelgeboiren(en) here den here van croye/ in sijnen dorpe van bierbeke Te manen teysschen optebueren/ ende tontfanghen dair vore te panden te daghen ende rasta/ mente te doen legghen die met rechte te v(er)volghen de/ late des voirs(creven) peters te eeden ende guedinge(n) te doene te/ manen p(ar)tien als hijs v(er)socht sal wordden te goeden ende/ tontgoeden de pontpe(n)ninghen tot behoef des voirs(creven) peters/ dairaf tontfanghen(e) opden behoirlicken salaris dairop van outs/ staen(de) den sculders te quiteren ende quitancie te geven Ende/ al te doene des de selve peeter in p(er)sone soude moeghen/ doen oft hij tegenvoirdich ware P(ro)mitt(ens) rat(um) salvo/ iusto calculo Willen(de) voirt de voirs(creven) peeter dat de laten desselfs/ peeters den voirs(creven) meye(re) onderhoirich sijn cor(am) tybe burgi/ mag(ist)ro scoonhove(n) vynck aug(usti) iiii