Cond sij allen lieden dat jan van breetzijp sone symoens wilen van dyeve breetzijp/ van dyeve(n) uuter prochien van rotselair es comen in jegewordich(eit) der scepen(en) van/ loven(en) en(de) heeft genomen en(de) bekent dat hi genomen heeft van jannes en(de) lod(ewijck) van/ oppendorp gehete(n) van ralenbeke gebruede(re)n thof der selv(er) gebruede(re) geleghen te/ ralenbeke inde prochie van hev(er)le met den wy(n)ne(n)den lande daer toe hoe(re)nde Te/ houden te hebben en(de) te wy(n)ne(n) van halfm(er)te naest comen(de) ene(n) t(er)mijn van vi/ jae(re)n lang deen nae dand(er) sond(er) middel volgen(de) Elx jaers dae(re)nby(n)ne(n) op de helcht/ van allen den corne en(de) vruchten op de voirs(creven) goede jaerlix wassen(de) op alsoe/ dat toeghste als tcoren en(de) de vruchten tijtverdich sijn dat de voirs(creven) jan van/ breetzijp de wy(n)ne die sal doen afdoen en(de) inde(n) bant leve(re)n en(de) dan selent de/ voirs(creven) gebruede(re) en(de) de wy(n)ne deylen dat ghedeilt sijnde sal de voirs(creven) wy(n)ne der/ voirs(creven) gebruede(re) helcht inde schue(re) vue(re)n eer hi sijn deel invue(re)n sal It(em) sal hebbe(n)/ de voirs(creven) wy(n)ne de beemde der voirs(creven) gebruede(re) gelegen aen tvoirs(creven) hof te wete(n)/ dov(er)ste beemde en(de) tcleyn beemdeken gelege(n) ne op de dile neve(n) den groten/ beemt die de voirs(creven) gebruede(re) daer selve behoude(n) elx jaers dae(re)nby(n)ne(n) om/ neghen cronen der munte(n) sconynx van vrancr(ijck) goet van goude ende/ swaer van gewichte of de werde daer af te s(ent) m(er)tens misse inde(n) wynt(er) te/ bet(alen) alle jae(re) den voirs(creven) t(er)mijn due(re)nde en(de) telken t(er)mine als vervolghde schout/ It(em) es vorwerde dat de voirs(creven) gebruede(re) den voirs(creven) wy(n)ne ten ingaen vande(n)/ voirs(creven) t(er)mine leve(re)n selen dlant acht(er) tvoirs(creven) hof en(de) een half bo[e]nd(er) lants/ gelegen aen blancarts streetken op de side te outhev(er)le wert met rogghe/ besaeyt op vier ghetideghe voren de storte eens om ghedaen en(de) de brake oec/ eens om gedaen Daer om heeft geloeft de voirs(creven) wy(n)ne dat hi ten uutgaen/ vande(n) voirs(creven) t(er)mine dlant acht(er) thof en(de) thalf boend(er) lants voirgh(eruert) laten sal/ met rogghe besaeyt wel en(de) loflic op vier ghetidege voren de storte eens/ om gedaen en(de) de brake eens om ghedaen en(de) sijn mest dan uutvue(re)n op tvoirs(creven)/ lant daers best te doen sal sijn Voert heeft geloeft de voirs(creven) wy(n)ne dat hi de/ voirs(creven) lande alle jae(re) den voirs(creven) t(er)mijn due(re)nde ghetidichlic wy(n)ne(n) en(de) werven/ sal wel en(de) loflic en(de) met goede(n) zade besaeyen te weten den rogge op vier/ voren de gherste op drie voren en(de) devene op twe voren Ende alle stroe/ en(de) voesteringe vande(n) voirs(creven) goede(n) comen(de) sal de voirs(creven) wy(n)ne int voirs(creven) hof/ b(re)ngen en(de) dat aldaer etten en(de) verthe(re)n met sine(n) beesten en(de) mest maken/ daer af maken en(de) dmest jaerlix ghetidichlic uutvue(re)n op tvoirs(creven) goet lant/ slants meesten p(ro)fite uutgenomen xxviii mandelen walme(re) die de voirs(creven)/ wy(n)ne alle jae(re) daer uut maken en(de) leve(re)n sal de huyse vande(n) voirs(creven) hove mede/ te decken en(de) also men die verdect sal de wy(n)ne den wercliede(n) hoe(re)n cost gheve(n)/ en(de) de gebruede(re) voirs(creven) selen de dachue(re)n betalen heeft oec geloeft de voirs(creven) wy(n)ne/ dat hi ov(er)tijt den voirs(creven) t(er)mijn due(re)nde op tvoirs(creven) goet houden en(de) vueden sal
//
hondert scape [die mest maken mogen] Ende es ond(er)sproken dat de voirs(creven) gebruede(re) en(de) de wy(n)ne/ jaerlix copen selen xl mandelen roggens stroes daer af dat de selve/ gebruede(re) betalen selen de tweedeel en(de) de wy(n)ne sal terde deel betalen/ en(de) tselve stroe halen daer ment copen sal op de mile nae den hove voirs(creven)/ en(de) int selve hof b(re)ngen en(de) aldaer etten en(de) te meste maken met sinen/ beesten en(de) dmest op tvoirs(creven) lant vue(re)n ten meesten p(ro)fite It(em) es vorwerde/ dat de voirs(creven) gebruede(re) den voirs(creven) wy(n)ne de lande en(de) beemde voirs(creven) ten ingaen/ vande(n) voirs(creven) t(er)mine wel bevreedt en(de) vermaect leve(re)n selen daer om heeft/ geloeft de voirs(creven) wy(n)ne dat hi die oec jaerlix vermaken sal daers te doen is/ en(de) die ten eynde vande(n) selven t(er)mine wel bevreedt laten en(de) den wijng(ar)thof/ wel ghegricht en(de) beloken desgelijx dbloc op de beke ghegricht en(de) beloken en(de)/ de beemde voirs(creven) sal de voirs(creven) wy(n)ne jaerlix wel [vermaken] ruymen en(de) vaghen van allen/ ryolen en(de) grechten uutgescheiden de grote grecht jegen den groten beemt/ en(de) den thuyn jegen den wuwe(re) die de voirs(creven) gebruede(re) op hoe(re)n cost ende/ dachue(re)n selen doen graven en(de) maken en(de) deerde die uut den grechten aldaer/ geworpen sal worden selen de voirs(creven) gebruede(re) doir de voirs(creven) beemde ter mynst(er)/ schaden mogen doen vue(re)n op hoe(re)n wijng(ar)t aldaer Voert es vorw(er)de dat de/ voirs(creven) wy(n)ne den derssche(r) die der voirs(creven) gebruede(re) coren en(de) vrucht uut/ dersschen sal sinen cost sal gheve(n) dies sal de selve wy(n)ne hebben tallen/ drien daghen een molevat corens van dies de dersscher dersschen sal en(de) de/ gebruede(re) voirs(creven) selen hem sijn dachue(re)n betale(n) en(de) alst gedorsschen sal sijn/ sal de voirs(creven) wy(n)ne jaerlix dat coren en(de) vrucht te loven(en) b(re)ngen It(em) sal de voirs(creven)/ wy(n)ne jaerlix saeyen op de brake een dachmael rapen en(de) die selen de gebruede(re)/ half hebben en(de) de wy(n)ne sal hen hoe(re) helcht te lo(ve)n b(re)ngen Oec sal de wy(n)ne/ voirgh(enoemt) den voirs(creven) gebruede(re)n jaerlix saeyen en(de) lant bereyden en(de) [hen] saeyen i/ halst(er) lijnzaets en(de) sij selen hem tsaet daer toe gheven en(de) de wy(n)ne mach/ hem selve(n) i halst(er) lijnzaets saeyen op dat hi wilt en(de) daer nae op sinen/ vlasgart rapen saeyen en(de) die allene behoude(n) Item doeft inden ouden bogart/ aldaer wassende selen de voirs(creven) gebruede(re) en(de) de wy(n)ne hebben half en(de) half en(de) op/ hoerre beyd(er) cost ter eerde(n) leve(re)n de en(de) de helcht der voirs(creven) gebruede(re) sal hen de/ wy(n)ne te loven(en) b(re)ngen met den oefte van hoe(re)n jonghen bog(ar)de aldaer en(de) de / selve wy(n)ne en sal gheen recht hebben ind(er) [oeft vanden] jongen bog(ar)de noch gheen coeye of/ p(er)de daer in laten gaen die scade doen mochten aen de boeme It(em) de voirs(creven) wy(n)ne/ en sal niet meer willeghen noch boeme truncken op de voirs(creven) goede dan hi/ behoeft de goede mede te bevrede(n) en(de) die hi behoeft sal hi truncke(n) te behoirleken/ tide daer hem de voirs(creven) gebruede(re) wisen selen en(de) verdroeghden daer enige willege(n)/ die soude de wy(n)ne hebben en(de) voir elke verdroeghe twe levende poten setten vande(n)/ selve(n) arde Es oec vorwerde dat de voirs(creven) wy(n)ne by(n)ne(n) den voirs(creven) t(er)mine gheen hout/ verdingen en sal vande(n) bossche te vue(re)n daer hi mede verlette(n) mochte tvoirs(creven) goet/ getidichlic te wy(n)ne(n) of te besaeyen It(em) sal de voirs(creven) wy(n)ne den voirs(creven) gebruede(re)n jaerlix/ viii corweyde(n) doen met sine(n) waghen en(de) p(er)den en(de) te wijntide hoe(re)n wijn op / hy(n)nenberch halen en(de) den wijn wassen(de) acht(er) tvoirs(creven) hof sal de wy(n)ne te wijntide tot/ int selve hof b(re)ngen en(de) daden side sij[de gebruede(re) voirs(creven)] enige staken maken inde voirs(creven) beemde die soude
//
de wy(n)ne vue(re)n tot voir den hoe(re)n wijng(ar)t aen tvoirs(creven) hof ghelegen en(de) des sal/ de wy(n)ne [allene] hebben dned(er) lant tusschen beneden den bog(ar)t tot aen den wuwe(re) te wy(n)ne [te graven en(de) te wy(n)ne(n)]/ tot sinen p(ro)fite [en(de) de weyde vanden bogarde] den voirs(creven) t(er)mijn due(re)nde en(de) de selve wy(n)ne sal oec den jonghen/ bogart moghen graven en(de) erweten of bone(n) daer in setten en(de) die allene behoude(n)/ op alsoe dat hi daer noch op dned(er) lant voirs(creven) [uut den voirs(creven) hove] gheen mest vue(re)n en sal [dan op den jongen bog(ar)t dier dien sal hi by(n)ne(n) den voirs(creven) t(er)mine eens mogen overmesten] It(em) gebrake/ int voirs(creven) hof enigen leem by(n)ne(n) den voirs(creven) t(er)mine dien soude de voirs(creven) wy(n)ne halen/ en(de) als men da aen de stallagien aldaer yet plect of maect van ouden werke/ dan sal de wy(n)ne den werclieden hoe(re)n cost gheve(n) en(de) de gebruede(re) voirs(creven) de dachue(re)n/ It(em) geviele int voirs(creven) hof enige schade van brande die toequame in ocsuyne tvoirs(creven)/ wynnen of van sine(n) liechte of viere dat soude de voirs(creven) wy(n)ne den voirs(creven) gebrue/ deren oprichten te goed(er) knapen prise desgelijx souden hem de voirs(creven) gebruede(re)/ oec doen geschiede daer [scade van] brande in ocsuyne van hen Oec en sal de selve wy(n)ne sine(n)/ oven aldaer met ghenen stroe heyten noch laten heyten hebben oec ond(er)sproken/ de voirs(creven) gebruede(re) te behouden decht(er)ste came(re) opt hoer huys aldaer int en [int wat(er) staende] met den/ hoghen corensolde(r) met den wuwe(re) en(de) savoe(re) omtrent den voirs(creven) huyse de huy duyfhuse/ en(de) doude syne spynde biden scaepstalle en(de) tcam(er)ken aen den ovenboer hoe(re)n wijn in/ te leggen Hier af sijn borghen des voirs(creven) wy(n)ne(n) als p(ri)ncipael sculde(re)n/ onv(er)scheyden [en(de) elc voir al] mychiel en(de) symoen van breetzijp des selfs wy(n)nen bruede(re) welke/ borghen de selve wy(n)ne hier af geloeft heeft scadeloes tontheffen roelants/ py(n)noc no(vem)[br(is)] xvi