Cond sij allen lieden dat gord [henr(ick)] lodewijcs [sone gords wilen lodewijx] van meerhout es come(n) in jegewordicheiden der/ scepen(en) van loven(e) en(de) heeft genome(n) en(de) bekent dat hi genome(n) heeft van m(ijn) vrouwen/ der abdissen vanden cloeste(r) van meeghdendale bij linte(r) en(de) vanden convente des selfs/ cloesters hair hof van meerhout met lande(n) beemden tsijsen pontgelden en(de) ande(re)n pachte(n)/ ende dair af sal de voirs(creven) wynne betalen alle de chijse en(de) pacht die de voirs(creven) goede/ sculdich sijn ende die thiende vande(n) widen velde ghelijc dat sij daer toe behoirt en(de)/ alle de cleyne thienden die m(ijn) voirs(creven) vrouwen toebehoiren bynne(n) den dorpe van/ meerhout Te houden te hebben en(de) te wynne(n) van s(int) jans misse bap(tis)[ten] dat sijn sal int/jaer ons he(re)n m cccc en(de) sesthien [naestkomende] ene(n) t(er)mijn van ix ja(r)en lang deen na dander/ daer nae staphans volgen(de) elx jaers dae(re)nbynnen alle de voirs(creven) goede o(m)me hond(er)t/ en(de) achtendertich rijnssche gulden(en) van goude goede en(de) gheeve of de weerde dair af/ alsoe sij van hande te hande gaen selen half te kersavonde en(de) half tsinte jans misse/ bap(tis)[ten] te betalen en(de) daer toe om xxiii oude groete jaerlix te kersmesse te betalen/ alle ja(r)e den voirs(creven) termijn due(re)nde en(de) telken t(er)mine als vervolghde schout Voert/ sal de voirs(creven) wynne bove(n) de voirscr(even) so(m)me jaerlix betalen den p(er)soen van meerhout/ x(½) mudden rogs en(de) x(½) mudde evenen alsoet m(ijn) vrouwe voirs(creven) sculdich es Item hi/ sal jaerlex int cloester leve(re)n te lyntre ix ganse en(de) x stene vlas Item sal hi geve(n)/ jaerlex den honden mijns gened(ichs) he(r)en [sh(er)togen] van brabant xvi gulden rijnssche en(de) over/ twee jaer altoes houden twe welpen Item sal de voirs(creven) wynne ontfaen de gaste ons/ gened(ichs) he(re)n voirs(creven) gelijc datse tvoirs(creven) hof sculdich es tontfane en(de) soe waer van dien/ ontfane oft van quader fisteringen e(n)nige scade gheschiede den voirs(creven) cloeste(r) of ha(r)en/ ande(re)n hoven dat soude de voirs(creven) wynne oprichten en(de) des gelijx soudemen den/ voirs(creven) wynne weder o(m)me doen quame hem e(n)nige schade van quader fisteringen/ vanden cloeste(r) voirs(creven) oft van ha(r)en ande(re)n hoven Item en sal de voirs(creven) wynne/ gheen opgaende hout aenveerden moigen noch houwen noch truncken maer/ alle de gheerdwasse sal hi altoes houwen te behoirliken tide en(de) die spruten/ vreden Voert sal de wynne dagelijx en(de) jaerlex houden op sinen cost enen/ conveersbrued(er) en(de) gheven hem tetene en(de) te drincken genoech van biere ende/ tweerhande broet eens corens en(de) van eyeren haringhe en(de) ande(re)n zuvele en(de)/ die broeder sal daghelijcs di nae die goede en(de) tyende(n) sien en(de) vii werf tsjaers/ sal de voirs(creven) brueder int voirscr(even) hof hebben i peert dair hi mede ten voirs(creven)/ cloeste(r) weert riden sal mogen en(de) soe wa(n)neer de voirs(creven) wynne gheenen brued(er)/ en houdt int voirg(eruerde) hof soe sal hi jaerlex gheven voe(r) sbrueders cost xii/ rijnsche gulden(en) Item sal de wynne jaerlix ontfaen m(ijn) vrouwen dabdissen voirs(creven)/ als sij daer comt nae ha(r)en staet behoudelic dat sij b(ri)ngen sal broet en(de) wijn/ en(de) die ghene die m(ijn) vrouwe daer seynden sal sal hi oec on[t]faen op sine(n) cost/ Voert sal de voirs(creven) wynne jaerlix int hof voe(re)n alle die corne die vande(n) voirs(creven)
//
goeden comen selen en(de) tstroe daer af te walme(re) en(de) te meste beke(re)n bi rade des brued(er)s/ die daer sijn sal Item sal de selve wynne sine(n) t(er)mijn due(re)nde de voirs(creven) goede huy/ singen grachte et [en(de)] tunen altoes houden in goeden state en(de) ten eynde van sine(n)/ voirseide(n) termine de voirs(creven) goede laten alsoe hise vinden sal in sinen innecome(n)/ En(de) waert alsoe dat den voirs(creven) hove e(n)nige ty(m)meringe gebrake daer af soude/ m(ijn) vrouwe thout en(de) yser leve(re)n en(de) den werclieden hoe(r) dachue(re)n betalen en(de)/ de wynne soude hen den montcost gheve(n) dats te weten van ouden wercke/ en(de) niet van nuwen Item waert dat m(ijn) vrouwe voirs(creven) woude doen decken/ met nuwen dake meer dan de wy(n)ne stroes hadde bynnen den hove soe/ soude m(ijn) vrouwe voirs(creven) stroe coepen en(de) den decker loenen en(de) die wynne/ soude hem dienen en(de) den cost gheven Voert meer van orloge hagelslage/ tempeesten en(de) van ande(re)n ongewoenliken costen sal m(ijn) vrouwe voirs(creven) hoe(re)n/ wynne doen nae usagen der kerken van ludeke Item waert alsoe dat int/ voirs(creven) hof e(n)nich versuemen gheviele van brande vande(n) voirs(creven) wynne of van/ sine(n) boden dat soude hi m(ijn) voirs(creven) vrouwe(n) oprichten Item sal de voirs(creven) wy(n)ne/ noch gheve(n) jaerlix sine(n) t(er)mijn due(re)nde m(ijn) voirs(creven) vrouwen xii hamels/ die hi te meye hoir leve(re)n sal goet uut sine(n) cudde Item den selve(n) wynne/ sal jaerlix afgaen iii dachmael voerten [voertten] die hebben sal de wynne vande(n) leemputte/ Voertmeer sijn dit de beesten die m(ijn) vrouwe voirs(creven) opt voirs(creven) hof ghelaten heeft/ en(de) die sij den voe(r)g(eruerde) t(er)mijn hoe(re)n voirs(creven) wynne gheleent heeft en(de) die hij h(aer)/ moet leve(re)n ten eynde van sine(n) t(er)mine alsoe goet als si hier nae getaxeert/ sijn inden yersten vi peerden getaxeert op xxii gulden(en) iii oude scilde voe(r) iiii/ gulden(en) gherekent Item xii coeye getaxeert op xlviii gulden(en) Item vii calve(re)/ getaxeert op iiii gulden(en) Item i paer ossen en(de) i paer stire ghetaxeert op xxii/ gulden(en) Item v hoet ledich veets getaxeert op viii gulden(en) Item cc en(de) xii/ hoetscape getaxeert op l xcvi gulden(en) Item lxviii la(m)mere getaxeert op/ xii gulden(en) Item i soch met cuddene(n) getaxeert op ii gulden(en) Item voert sijn/ getaxeert iii wagen(en) i wagen getouwe tot v peerden en(de) dande(r) wagen/ getouwe tot iiii ossen al yse(re)n en(de) den iii [derden] wagen sonder getouwe Item iii/ ploege en(de) ii eechden met allen den toebehoirten van zeelen getaxeert/ op xii gulden(en) Item i strijcpluech niet getaxeert Item vii bedden i paer/ slapelaken en(de) iiii oude declaken(en) ghetaxeert op xii gulden(en) Item alsoe [alle] dese/ goede boven bescreven ghelevert en(de) ghetaxeert met goeden cnapen salme(n)/ ten lesten ja(r)e weder leve(re)n en(de) taxeren der voirs(creven) vrouwen nae p(ri)sen van/ goeden knapen maer si sal hebben core weder sij wilt beesten of gelt Item/ sal de voirs(creven) wynne den arden vande(n) voirs(creven) lande wel en(de) loflic besaeyt laten/ te sinen uutgane alsoe hise vint te sine(n) innecome(n) sonder argelist Item
//
noch xxxvi ellen linens lakens werken gheleent den selven wynne dwelc hi/ wedergeven sal ten lesten ja(r)e Voertmeer sijn dit de ande(re) aenleene die tot/ den voirs(creven) hove beho(r)en en(de) die de wynne verantw(er)den moet Inden yersten iii/ laken(en) op der knechte(n) tafele Item ene(n) handoec Item ii maelsacke nuwe Item/ ene(n) groeten cope(re)n pot Item ii cleyne Item ene(n) groten ketel ene(n) hantketel/ Item een vischspaen Item een watervat Item een baertbecken Item ene(n) groete(n)/ hael en(de) ene(n) cleynen Item een tange Item ene(n) roester ene(n) crauwel een hangh/ yser Item v scaepscheeren Item iii rieke een scuppe een spade twe mest/ hake een hoygaffle Item een stocaex een bijl twe halste(re) een quaet levervat/ Item iii eeme(re) gebonden met yse(r) Item ene(n) te(n)nen derdendeelpot een te(n)nen/ soutvat Item ene bot(er)stande nuwe mett(er) tridelen Item een bot(er)vat nuwe/ Item ii coevate Item iii harincvate Item iii tynen en(de) iiii zaenvate teylen/ eerden Item ii groete eerdteylen inde keescame(r) en(de) alrehande ander dinc/ dat dair toebehoirt Item i scotelvat met xxii scotelen en(de) ix lepelen/ Item ii soutvate hulten Item ene(n) crudewagen Item ene(n) volge(r) Item/ een morselsteen en(de) een hout Item ene(n) goeden wan item ene goede lant(er)ne/ Item een aschvat Item twe vete(re)n met kethen(en) Item een vetere sonder/ ketene Item xi slote int hof Item omtrent een voederhoys oft ene(n) oude(n)/ schilt daer voe(r) Item die scaepcoyen wel ghestoffeert tot derdalfhondert/ scapen Item twe biercruken eene(n) beeker en(de) iii melcpotte En(de) alle/ dese voirg(eruerde) vorw(er)den condicien en(de) geloeften heeft gheloeft de voirscr(even)/ wynne m(ijn) vrouwe(n) der abdissen voirg(enoemd) en(de) hoe(re)n convente vaste en(de)/ gestedich te houden en(de) hoir daer af altoes te voldoen tallen tyden en(de) t(er)mine(n)/ als sij vallen en(de) verschine(n) selen en(de) telken t(er)mine als vervolghde schout/ Hier af sijn borgen des voirs(creven) henrix lodewijcs als p(ri)ncipael sculde(re)n onge/ sund(er)t en(de) ongesceyden en(de) elc voe(r) al jannes claes vanden rode henric/ belmans arnt van laerhoven dieme(n) heet van donghenen jannes van/ gompel jan vander ramen jan mangelsgoets jan en(de) henric belmans ge/ brueders henric wouter gheerts soen vander beke jan lodewijcs soene/ wilen jans henric soene pet(er)s wilen lodewijx jan van loemel jan goes/ inde middelt en(de) henric jan heyns soen welke borgen de voirs(creven) henric/ lodewijx hier af geloeft heeft co(m)merloes tontheffen en(de) scadenloes quijtte/ houden Hier wa(r)en over jan vanden borchoven en(de) jan van oppendorp soen/ wilen wouters scepen(en) van loven(e) Gegeven xxiiii dage in aprille int jaer/ ons he(re)n dusent cccc en(de) xxv