Cond zij allen lieden dat h(er)wout(er) van hug(ar)den proefst scloesters van perke/ in jegewoirdicheit der scepen(en) van loven(e) gestaen heeft gegeven/ en(de) bekent dat hij gegeven heeft van des selfs cloesters weghen/ stasse halladee thof des voirs(creven) cloesters geheten thof van coriaul/ met den wynne(n)den lande beemden eeuselen en(de) allen sijne(n) toebeh(oirten)/ gelijc dat wynne(n) voirtijts gehoude(n) hebben Te houden te hebben en(de)/ te wynnen van s(in)[te] jans misse bap(tis)[ten] naistcomende eene(n) t(er)mijn/ van twelf jairen lang deen nae dander d(aer) nae staphans/ volgende Elx jairs dae(re)n bynne(n) om viventsestich mudden pacht/ corens onderhalf mudde erweten en(de) een half mudde raepzaets/ goet en(de) payabel met wanne en(de) met vede(re)n wel bereit der/ maten van nyvele alle jae(re) ts(in)[te] andr(ies) misse apost(els) te betalen/ en(de) inde herberge des voirs(creven) cloesters bynne(n) nyvel te leveren/ den voirs(creven) t(er)mijn due(re)nde en(de) telken t(er)mijne als vervolghde/ schout It(em) heeft oec geg(even) de voirs(creven) m(ijn) he(re) de proefst van tvoirs(creven)/ cloesters weghen den voirs(creven) stasse de thiende van lanoit met/ hue(re) toebehoirten toebehoerende den voirs(creven) clooster Te houden en(de)/ te hebben den voirs(creven) t(er)mijn due(re)nde alle jae(re) om negenthien/ mudde rox en(de) negenthien mudde evene(n) goet en(de) paiabel d(er)/ maten voirs(creven) te s(in)[te] andr(ies) misse apost(els) te betalen en(de) te nyvel/ te leveren den voirs(creven) t(er)mijn due(re)nde en(de) telken t(er)mijne als/ vervolghde schout Ende desgelix de thiende vander cauchie/ den selven t(er)mijn due(re)nde Elx jairs hie(re)n bynne(n) om x mudde/ rox en(de) x mudde even(en) mate en(de) pacht voirs(creven) ten voirs(creven) t(er)mijn/ te betalen en(de) te nyvel te leveren alle jae(re) den voirs(creven) t(er)mijn/ due(re)nde quolib(et) ass(ecutu)[m] Item is vorw(er)de dat de voirs(creven) wynne de/ ghene die int voirs(creven) hof comen selen van m(ijns) gened(ichs) he(re)n wegen/ van brabant of van m(ijnre) vrouwen wegen van brabant en(de) m(ijns) he(re)/ van perke en(de) die van des selfs m(ijn) he(re)n wegen comen selen int/ voirs(creven) hof sijn zij te voete of te p(er)de met allen den h(ar)nassche
//
van waghene(n) die int voirs(creven) hof oec comen selen van m(ijns) he(re)n wegen/ van perke voirs(creven) alle wel ende eerlic ontfaen sal en(de) hen hue(re)n/ cost doin wel en(de) loflic van spisen van hoppen van broede of van/ biere uutgenomen van wine(n) It(em) sal de voirs(creven) wynne den voirs(creven)/ t(er)mijn due(re)nde houden en(de) vueden jairlix twee honde mijne(n)/ gened(ichen) he(re) van brabant also dat tvoirs(creven) godshuys dair af/ gheen scade en hebbe It(em) is vorw(er)de dat de voirs(creven) wynne int/ voirs(creven) hof den voirs(creven) t(er)mijn due(re)nde tsjaers eens wel en(de) loflic/ ontfaen sal en(de) cost gheve(n) m(ijnen) he(re)n jaghers van brabant inder/ manie(re)n gelijc voirs(creven) is uutgenomen van wine van visschen en(de)/ van crude Oec is vorw(er)de dat de voirs(creven) wynne m(ijn) he(re) van p(er)ke/ voirs(creven) alle jaire houden en(de) vueden sal vier verkene gelijc de(n)/ sijne(n) en(de) soe wanneer m(ijn) he(re)n bosch geraken sal ald(aer) van eeclen/ of van boeke soe mach m(ijn) he(re) van p(er)ke voirs(creven) aldaer seynde(n) thien/ verkene en(de) die sal de voirs(creven) wynne herden en(de) huede(n) gelijc/ den sijne(n) Behoudelic dien dat de voirs(creven) wynne met sijnen/ verkene(n) den voirs(creven) bosch niet verladen en sal also dat m(ijns) he(re)n/ verkene dair bij niet qualic gevuedt en worden Noch is vorw(er)de/ dat de voirs(creven) wynne alle jae(re) den voirs(creven) t(er)mijn due(re)nde leve(re)n/ sal sess reepe houts in m(ijns) he(re)n herberge te nyvel It(em) is/ vorw(er)de dat de voirs(creven) wynne jairlix den voirs(creven) t(er)mijn due(re)nde/ leve(re)n sal inde selve h(er)berge te nyvel twee voeder oreten/ It(em) sal de voirs(creven) wynne jairlix leve(re)n den bailhu vanden/ walschen lande van brabant te nyvel of te genepien d(aer)t/ den selven bailhu gelieft een voeder hoeye(n) op dat hem m(ijn)/ he(re) beveelt It(em) sal oic de selve wynne bringen en(de) leve(re)n/ te nyvele in m(ijns) he(re)n herberge van perke twee voeder hoeys/ deen te mijns he(re)n behoef en(de) dander tot behoef sijns meyers/ van cheele It(em) is vorw(er)de dat de voirs(creven) wynne jairlix
//
gheven sal den prochiaen van cheele hondert schoove stroes/ half roggen stroe en(de) half zomer stroe It(em) is vorw(er)de dat de/ voirs(creven) wynne hout houden mach tot sijnre berringen behoef in/ redelicheiden op de voirs(creven) goede t(er) mynster scaden daert hem/ van m(ijns) he(re)n weghen bewijst sal werde(n) It(em) is vorw(er)de dat de voirs(creven)/ wynne gheen horenvee op m(ijns) he(re)n van p(er)ke bosch doin en mach/ voir aen derre tijt dat den houwe vier jair out sijn sal Oec/ is vorwerde dat de voirs(creven) wynne den voirs(creven) t(er)mijn due(re)nde vuede(n)/ moet alle metsers ty(m)merliede en(de) tiecheldeckers die int/ voirs(creven) hof werken selen aen de huyse ald(aer) uutgescheiden dat/ men van nuwe opmaect It(em) is noch vorw(er)de dat de selve/ wynne den gravers en(de) anderen wercliede(n) die aldair gesonde(n)/ selen w(er)den aen de vivers te grave(n) of elde(re) aen scloesters/ goede aldair hue(re)n montcost gheve(n) sal uutgescheiden van/ drancke It(em) is noch vorw(er)de dat de wynne den visschers/ also lange als sij van scloesters wegen al(aer) comen visschen/ hue(re)n montcost sal gheven It(em) is vow(er)de dat de voirscr(even)/ wynne houde(n) sal den voirs(creven) t(er)mijn due(re)nde den goeden/ lieden van cheele eene(n) verre en(de) eene(n) beer also dat/ dair af gheen becroen noch scade en come It(em) is vorwerde/ dat de voirs(creven) wynne den voirs(creven) t(er)mijn due(re)nde jairlix sal/ hulpen hoeyen den beemt van meyn toebehoe(re)nde den he(re)/ van traleez en(de) thoey hulpen in vue(re)n also men gewoenlic/ heeft geweest te doin in tiden voirleden It(em) is vorw(er)de/ dat de voirs(creven) wynne houden sal van mijne(n) he(re)van p(er)ke/ ii[c] scape alst m(ijn) he(re) gelieven sal die ald(aer) te leveren/ en(de) te deylen te twee jae(re)n It(em) is vorw(er)de dat de voirs(creven)/ wynne jairlix den voirs(creven) t(er)mijn due(re)nde leve(re)n sal xv[c]
//
walme(re) goet en(de) cusber en(de) die ald(air) aen de huyse doin verdecke(n)/ op sijnen cost ten meesten orber en(de) profijte daert m(ijn) he(re) hem/ bewisen sal Behoudelic dien dat m(ijn) voirs(creven) he(re) dair toe leve(re)n/ sal latten en(de) latyser Oec is vorw(er)de dat de selve wy(n)ne/ de voirs(creven) huyse wel en(de) loflic houden sal van wande en(de) van/ dake It(em) is vorw(er)de dat de voirs(creven) wynne de voirs(creven) lande/ en(de) beemde wael bevreden en(de) verluyken sal en(de) de grechte/ houden sijnen t(er)mijn due(re)nde en(de) die also bevreedt en(de)/ begricht laten wel en(de) loflic ten eynde van sijne(n) voirs(creven)/ t(er)mijne Voirt is vorwerde dat de voirs(creven) wynne de voirs(creven) lande/ laten sal ten eynde van sijnen voirs(creven) t(er)mine also hijse vant/ in sijnen incomen Te weten den wynter aert wel en(de) loflic/ bezaeyt met wynt(er)corne op iiii getidege vo(r)en den zom(er)art/ bezaeyt met zomercorne op twee getidege voren en(de) de/ brake met ii getidegen voren en(de) is te weten dat den wynt(er)art/ was op tvelt datme(n) heet de hutte paroe en(de) den hof/ voir de porte sal de selve wynne met bonen bezaeyt laten/ op drie getidege voren te sijne(n) uutgaen It(em) is vorw(er)de dat/ de voirs(creven) wynne bezaeyen sal ten uutgaen van sijne(n) t(er)mijn/ voirs(creven) op de voirs(creven) goede ii mudde en(de) drie vate soe erwete(n)/ soe vechen wel en(de) loflic It(em) sal de voirs(creven) wynne bezaeyt/ laten ten eynde van sijne(n) t(er)mijne ond(er)half boender lants/ met groter ghersten op iiii getidege voren It(em) is vorw(er)de/ dat de voirs(creven) wynne ten eynde van sijne(n) t(er)mijne den zom(er)art/ wel en(de) loflic eggen en(de) wellen sal It(em) is vorw(er)de dat/ de voirs(creven) wynne gheen voesteringe noch stroe comende/ vande(n) voirs(creven) goede(n) vercopen noch ewech gheve(n) en mach
//
maer die bringen int voirs(creven) hof en(de) aldair etten en(de) verthee(re)n/ met sijnen beesten en(de) te meste maken en(de) tvoirs(creven) mest/ op dlant vue(re)n tslants meeste(n) p(ro)fijte en(de) nerghens/ elde(r) It(em) sal de wynne voirs(creven) voir de leveringe van huysrade/ en(de) van beesten hem gedain te sijne(n) incomen gheve(n) en(de)/ betalen te den cloes(er) voirs(creven) ten eynde van sijne(n) voirscr(even)/ t(er)mijne hondert rijnsche gul(den) van goude goet en(de) gheeve/ of de weerde d(aer) af in ande(re)n goeden gelde Ende alle dese/ vorw(er)den gelofte(n) en(de) condicien voirs(creven) hebben geloeft de voirs(creven)/ proeft inden name en(de) van tsvoirs(creven) cloesters weghen/ in deen zijde en(de) de voirs(creven) wynne in dander malcande(re)n/ vast en(de) gestedich te houden en(de) te voldoin tallen tiden/ en(de) t(er)mijne(n) als sij vallen en(de) verschijne(n) selen ende/ telken t(er)mijne als vervolghde schout opp(endorp) wittema(n)/ fe(bruarii) xxv a(n)no xiiii[c] xxxiii