Cond sij allen lieden dat jan van breetzijp van dieve uuter p(ro)chien van/ rotselair sone wilen symoens es comen in jegewordicheide(n) d(er) scepene(n) van/ loeven(e) en(de) heeft genomen en(de) bekent dat hij genomen heeft van jannes/ van oppendorp geheten van ralenbeke thoff des selfs jannes gelege(n) te/ ralenbeke inde prochie van heverle metten wynnende(n) lande(n) d(aer) toehorende/ Te houden te hebben en(de) te wynne(n) van halfmerte naestcomen(de) enen t(er)mijn/ van vi jaren lang deen nae dand(er) sond(er) middel volgende elx jaers/ daren bynnen op de helcht van allen den coerne en(de) vruchten op de/ voirs(creven) goede jairlijx wassende op alsoe dat toeghste als tcoren en(de) de vruchte(n)/ tijtveerdich sijn de voirs(creven) jan van breetzijp de wynne die sal doen af doen/ en(de) inden bant leveren en(de) dan selense de voirs(creven) jannes en(de) de wynne/ deylen die gedeilt sijnde sal de voirs(creven) wynne des voirs(creven) jannes helcht/ inde schue(r) vueren eer hj sijn deel invue(re)n sal Item sal hebben de voirs(creven)/ wynne deeusele gelegen achter tvoirs(creven) hoff tusscen tvelt op deen sijde/ en(de) den ham en(de) tcleynbeemdeken die de voirs(creven) jannes dair neven behelt/ op dande(r) sijde streckende de voirs(creven) eeusele van aen den dijc daermen/ deerde pleeght uut te vueren tot aen doverste eeusele andries van oppe(n)dorp/ elx jaers darenbynnen omme thien gripen te xl plac(ken) brabants payments/ alsoe telken t(er)mine van betalingen in borsen gaen sal voe(r) elc gripe gereeke(n)t/ te sente mertens messe inden wynter te betalen jairlijx den voirs(creven) t(er)mijn/ duerende en(de) telken t(er)mijn als vervolghde scout Item is vorwerde want/ de voirs(creven) jannes den voirs(creven) wynne ten ingaen vande(n) voirs(creven) t(er)mine gelevert/ heeft dlant achter tvoirs(creven) hoff een half boender lants gelege(n) aen db blancarts/ strate en(de) seven dach(mael) lants gelegen te outheverle naest de lande des/ cloesters van p(er)cke en(de) verydenshazen met rogge bezaet op vier getidegen voe(re)n/ de storte eens omgedaen en(de) de brake oic eens omme gedaen dair/ om heeft geloeft de voirs(creven) wynne dat hij ten uutgaen vande(n) voirs(creven) t(er)mine de/ lande achter thoff thalfboende(r) en(de) seven dach(mael) lants voirg(enoemt) laten/ sal met rogge besaeyt wel en(de) lijflijck op vier getidege voren de storte/ eens omgedaen en(de) de brake oic eens omme gedaen en(de) dat hij dmest/ dan ut uutvue(re)n sal op tvoirs(creven) lant dairts best te doen sal sijn Voert/ heeft geloeft de voirs(creven) wynne dat hij de voirs(creven) lande alle jae(re) den t(er)mijn/ duerende getidichlic wynnen en(de) werven sal wel en(de) loflijck en(de) met goeden/ saetcoerne besayen te weten de rogge op vier voeren de gherste op/ drie voren en(de) devene op twee voren en(de) alle stroe en(de) voesterynge
//
vande(n) voirs(creven) goeden comende sal de voirs(creven) wynne int voirs(creven) hoff brenge(n) en(de)/ dat aldair etten en(de) vertheren met sijnen beesten en(de) mest d(aer) af maken/ en(de) dmest dair aff jairlix getidichlich uutvue(re)n op tvoirs(creven) lant dairs best te/ doen sal sijn met consente en(de) weten des voirs(creven) jannes uutgenomen xxviii/ mandelen walmere die de voirs(creven) wynne alle jare d(aer) met maken en(de)/ leveren sal de huyse vande(n) voirs(creven) huyse mede te decken en(de) als men/ die verdect sal de wynne den werclieden horen cost gheve(n) en(de) de voirs(creven)/ jannes de dachueren betalen Heeft oec geloeft de voirs(creven) wynne dat/ hij overtijt den voirs(creven) t(er)mijn duerende op tvoirs(creven) goet houde(n) en(de) vueden/ sal hondert scape die mest maken moghen ende is ondersproken dat/ de voirs(creven) jannes den wynne jairlijx copen dal xl mandelen roggens/ stroes en(de) tselve stroe sal de wynne halen daerment copen sal op de/ mile nae v vande(n) voirs(creven) hove en(de) int voirs(creven) hoff brenge(n) en(de) ald(aer) etten en(de) te/ meste make(n) met sijnen beeste(n) en(de) dmest op tvoirs(creven) lant vueren te(n) meeste(n)/ p(ro)fijte Item is vorwerde dat de voirs(creven) jannes den voirs(creven) wynne de lande/ en(de) beemde voirs(creven) ten ingaen vande(n) voirs(creven) t(er)mine wel bevreedt en(de) v(er)maect/ leve(re)n sal dair om heeft geloeft de voirs(creven) wynne dat hij die oic jaerlijx/ vermaken sal dairs te doen sal sij en(de) die ten eynde vande(n) selve(n) t(er)mine/ wel v bevreedt laten en(de) den wijngaert hoff bijde h(er)strate gelege(n) wel/ gegricht en(de) omloken desgelijx dblock op de beke wel gegricht ende/ beloken en(de) deeusele voirs(creven) sal de voirs(creven) wynne jairlijx vermaken ruymen/ en(de) vaghen van allen ryolen en(de) grechten uutgesceide(n) de grote grecht/ jege(n) den ham die de voirs(creven) jannes op sijnen vost sal doen ruyme(n) Voert/ is vorwerde dat de voirs(creven) wynne den derssche(r) die des voirs(creven)/ jannes coren en(de) vrucht uutderschen sal sal sijne(n) cost sal gheve(n) dies sal/ de selve wynne hebben tallen drien dagen een molevat corens van/ dies de derscher derschen sal en(de) de voirs(creven) jannes sal he(m) sijn dachue(re)n/ betale(n) en(de) alst gederschen sal sijn sal de voirs(creven) wynne jairlijx dat/ coren en(de) vrucht te loven(e) brenge(n) Ite(m) sal de voirs(creven) wynne jairlijx saeye(n)/ op de brake een dachmael te rapen en(de) die sal de voirs(creven) jannes half/ hebben en(de) de wynne sal hem die helcht te loeven brenge(n) Oec sal/ de wynne voirg(enoemt) de(n) voirs(creven) jannes jairlijx lant bereyde(n) en(de) he(m) saeyen/ een halster lijnzaets en(de) hij sal de(n) wynne tsaet d(aer) toe leve(re)n en(de) de
//
wynne mach hem selve(n) een halst(er) lijnzaets saeyen op dat hij wilt/ en(de) d(aer) nae op sijne(n) vlasgart rapen zaeyen en(de) die alleene behouden It(em)/ doeft inde(n) ouden bogazrt ald(aer) wassende selen de voirs(creven) ja(n)nes en(de)/ de wy(n)ne hebben half en(de) half en(de) op hoerre beyd(er) cost doen lesen en(de)/ ter eerde(n) leve(re)n en(de) des voirs(creven) ja(n)nes helcht sal de wynne te loeven/ brenge(n) met den oefte vande(n) jonge(n) bogaerde ald(aer) en(de) de wynne/ en sal gheen recht hebben inde(n) jonge(n) bogaert It(em) de voirs(creven) wynne/ en sal niet meer boeme noch willege(n) truncken op de voirs(creven) goede dan/ behoeve(n) sal de goede mede te bevreden en(de) die sal hij truncken/ te behoirliken tijde dat hem de voirs(creven) ja(n)nes wijsen sal en(de) verdroeghden/ dair ennige wilghen die sal de voirs(creven) wynne hebben en(de) vore elke verdroeghde/ twee levende poeten setten vande(n) selve(n) aerde Oec is vorwerde dat de/ voirs(creven) wynne bynnen den voirs(creven) t(er)mine gheen hout verdingen en sal vande(n)/ bossche te vueren midts dat hij verletten moghte de voirs(creven) lande getidichlic/ te wynnen of te besaeyen Item sal de voirs(creven) wynne de(n) voirs(creven) jannes jairlijx/ acht corweyde(n) doen met sijnen wagene en(de) peerde(n) en(de) te wijntijde sijnen/ wijn vande(n) wijngaerde halen en(de) hem thuys vueren en(de) des sal de/ wynne hebben tot sijnen p(ro)fijte de weyde vande(n) oude(n) bogaerde de(n) voirs(creven)/ t(er)mijn duerende Item gebrake int voirs(creven) hoff ennigen leem bynne(n) den/ voirs(creven) t(er)mine dien soude de voirs(creven) wynne halen en(de) als men aen de/ stallagie(n) aldair yet plect oft maect van oude(n) werke dan sall de/ wynne den wercliede(n) horen cost gheven en(de) de voirs(creven) jannes de dachue(re)n/ betalen Item es vorweerde waert dat de voirs(creven) jannes bynne(n) de(n) dorpen/ van heeverle oft van outheverle ennich lant gecreghe dat de wy(n)ne/ dat oeck ten helcht wynnen sal gelijck den ande(re)n lande(n) vande(n) voirs(creven)/ hove op dat de voirs(creven) jannes wilt Waert oec dat de voirs(creven) jannes/ e(n)nich van sijnen voirs(creven) lande erflijc uutgheven woude dat hij dat/ sal moeghen doen h(ier) af sijn borghe(n) onverscheide(n) mychiel en(de) symoen/ van breetzijp svoirs(creven) wynne(n) brueders et p(ri)m(us) Item noch vorwert tusschen/ jannes en(de) de wynne voirs(creven) gesciede in tvoirs(creven) hoff ennige scade van/ brande die toequame in ocsuyne des voirs(creven) wynnen van sijne(n) viere/ oft liechte dat soude hij de(n) voirs(creven) jannes oprichte(n) en(de) gesciede den/ wynne ald(aer) e(n)nige scade van brande in ocsuyne des voirs(creven) jannes
//
dat soude hij den wynne oprichten te goede knape(n) prijse Item mach/ de voirs(creven) jannes te hemweert nemen thuys d(aer) de(n) wuwer om gheet/ en(de) de(n) wynne sijn gerief maken in thoff te woenen Item es ondersproke(n)/ dat de voirs(creven) jannes behoude(n) sall dechterste camere op thuys ald(aer)/ metten hogen corensolde(r) metten wuwe(r) en(de) savore omtrent den voirs(creven)/ huyse de duyfhuyse den pertstal op den berch en(de) den oven sal/ de selve jannes doen maken en(de) bedecken d(aer) voe(r) te staen tusscen dit/ en(de) uutganck merte naestcomende bij tsavoir uut de(n) huysen ald(aer) op/ sijne(n) cost Item sal de voirs(creven) wynne jairlijx inde brake een dachmael/ lants moegen doen graven en(de) met erweete(n) besetten en(de) die allene/ behoude(n) op dat hij wilt Item en sal de voirs(creven) wynne nyemande/ and(er)s van sijnre hant tvoirs(creven) goet moge(n) gheeve(n) te wynnen/ sond(er) (con)sent svoirs(creven) jannes het en dade hem noetzake van/ zijcheide(n) oft anders dat hij selve gheen lant gewynne(n) en conste/ lombart boys febr(uari) ultima