Van janne van tillr(ode)/ It(em) uut dien dat meester jan claes die geleyt is tot den goede(n)/ roelants van bourgevail onlanx lede(n) hadde doen inscriven/ janne van tillr(ode) en(de) ophede(n) dach betekent inde banc voir/ meye(r) en(de) scepen(en) van loven(en) om des wille dat de voirs(creven)/ jan van tillr(ode) so(m)mige vande(n) goede(n) des voirs(creven) roelants met/ rechte vervolghde om een heer geweede [of pontgelt] dat hij d(aer) aen/ meynde te hebben en(de) de voirs(creven) meest(er) jan claes op/ hede(n) int recht niet comen en is ald(aer) hem de voirs(creven)/ jan van tillr(ode) gep(rese)nteert heeft soe is gewijst bij/ den he(re)n tscepen(en) van loven(en) voe(r) een vonnisse dat/ de voirs(creven) jan van tillr(ode) sijn voirs(creven) heergeweede en(de)/ pontgelt vervolgen sal op de goede en(de) t(er) plaetse(n)/ d(aer) die gelege(n) sijn cor(am) k(er)smak(er) roelofs borch(oven) smacht/ ca(pelle)[ma(n)] ov(er)wynge iunior smet aug(usti) ix
//