It(em) gheert van meldert es come(n) in iegewordich(eit) der scepen(en) van loven(en)/ ende heeft genomen ende bekent dat hij genome(n) heeft van lodewijke(n)/ van oppendorp de goede hier onder bescr(even) des selfs lod(ewijc) gelegen inde/ p(ro)chie van huldenb(er)ge te weten drie boender lants gelegen in enen/ stucke met rogge besayt ter plaetsen gehete(n) ten bossche neve(n) de/ oude herstrate aldair It(em) iii boender braken lants gelegen al brake inde
//
inde scheilichs geest delle mett(er) langer streecken gaende aen die v dach(mael) vanden/ nuwe(n) hove bove(n) dijsslage Ite(m) vii dach(mael) lants gelegen al storte in ene(n) stucke/ ter plaetsen gehete(n) ganspoel eycke en(de) mijns jonch(e)r lant van boutershem/ It(em) (½) boender lants al storte gelege(n) neve(n) die lande voirg(enoemde) tussce(n) de goede/ jans vande(n) hove en(de) de goede adaems pintux pintinx It(em) een boender/ lants gelegen op stocke al storte te houde(n) te hebben en(de) te wynne(n) van/ halfmerte naestcomen(de) ene(n) t(er)mijn van vi jae(re)n lang deen nae dandere/ sonder middel volgende elx jairs dae(re)n bynne(n) om de helcht van alle(n)/ den vruchten jairlix op de voirsc(reven) goede wassende Ite(m) es vorweerde dat/ de voirs(creven) wynne de voirscr(even) lande wel en(de) loflic wynne(n) en(de) werve(n) sal gelijc/ hue(re)n reengenote(n) bove(n) en(de) benede(n) en(de) ten behoirlijken tijde met loflicken/ sade besaeyen te wete(n) den rogge en(de) de tarwe met vier getidegen/ voere(n) die gherste op iii voe(re)n ende die even(en) op ii voren Item sal de/ voirs(creven) wynne de vruchten vande(n) voirs(creven) lande comende wel en(de) loflic/ hante(re)n ende inde(n) bant leve(re)n en(de) die alsoe gelevert sijnde sal de/ voirs(creven) lod(ewijc) oft yema(n)t van zijne(n) wegen die selve vruchte(n) deylen/ tegen de(n) wynne over ande(re)n hoep en(de) alsoe gedeylt zijnde sal de/ wynne tgedeelte lod(ewijx) voirs(creven) in des selfs lod(ewijx) scue(re) ten nuwe(n)hove/ vueren eer de selve wynne sijns selfs gedeelte inne vue(re)n sal moege(n)/ Ende dan sal lod(ewijc) zijn gedeelte doen derssche(n) op zijne(n) cost en(de)/ die wynne sal tgreyn van zijne(n) gedeelte comen(de) te loven(en)/ bringen en(de) dan sal oic de wynne sijn gedeelte te nuwe(n)hove/ int hoff vue(re)n en(de) bringe(n) Ite(m) es noch vorweerde dat de voirs(creven)/ lod(ewijc) en(de) de wynne selen doen grave(n) een half boend(er) lant tot/ erweten d(aer)t den voirs(creven) lodewijke(n) genuege(n) sal en(de) d(aer) af sal/ lod(ewijc) zijn gravegelt betale(n) en(de) tsaeyt van zijne(n) gedeelte leve(re)n/ en(de) de wynne salt hem doen afdoen en(de) inde(n) vanc leve(re)n en(de)/ vue(re)n inde schure voirscr(even) Ite(m) es noch vowerde dat de/ voirscr(even) lodewijc en(de) de wynne samentlic copen selen alle jae(re)/ den voirs(creven) lodewijc t(er)mijn due(re)nde xx mandelen [ruggen] stroes op alsoe/ na den hove als van nuwe(n)hove tot berthem ende des sal lod(ewijc)/ deen helcht vande(n) voirs(creven) stroe betale(n) en(de) de voirs(creven) wynne dande(re)/ helcht ende dat alsoe gecocht zijnde sal de wynne voirg(enoemd)/ halen en(de) bringe(n) int voirs(creven) hoff op zijne(n) cost aldair ettende/ en(de) mest maken(e) mette(n) ande(re)n stroe voesteringe(n) vanden
//
voirs(creven) lande comende ende dmest dair af comen(de) op dlant/ vueren slands meesten profijte also wel ten versten als/ ten naeste(n) Item es vorwerde dat de voirscr(even) wynne sijn caf/ en(de) overcoerne sal moege(n) vure(n) dair hij wilt mair hij sal stroe/ moete(n) verteren en(de) ette(n) int voers(creven) hoff met zijne(n) beesten/ te weten trogge(n) stroe en(de) tarwenstroe met zijne(n) scapen/ en(de) met ghene(n) ande(re)n beesten en(de) dmest d(aer) af comende int/ uut(er) messien getidechlijke(n) vue(re)n ende doereeten stroyen/ totte(n) p(ro)fijte vande(n) lande om mest dair af te maken en(de)/ als die voesteringe(n) verteert es soe sal de wynne dair moege(n)/ setten zijn coeyen scape en(de) zijn p(er)de o(m)me mest mede te maken/ It(em) sal de voirs(creven) lodewijc den voirg(enoemde) wynne huyse leve(re)n/ o(m)me weselic zijn beesten en(de) zijn coren inne te leggen/ en(de) die huyse sal de voirs(creven) lodewijc leve(re)n gemetst gedect/ en(de) geplect dwat(er) en(de) de wynt uut gesloeten ende dan/ voirtaen alle jae(re) den voirs(creven) t(er)mijn lang due(re)nde sal de voirs(creven)/ wynne leve(re)n xx mandele(n) walms uute(n) stroe vande(n) voirs(creven)/ goede comen(de) o(m)me die huyse mede te decken(e) dairme(n)/ die voirs(creven) vruchten en(de) beesten inne hanteren sal Item alsmen/ aen de voirs(creven) huysen dect plect oft werct eenegherande/ werck die men dair aen behoeve(n) sal soe sal de voirscr(even)/ wynne alle die stoffe aen halen en(de) den wercliede(n) den mont/ cost gheve(n) en(de) de voirs(creven) lodewijc sal die dachue(re)n betalen/ Ite(m) es vorweerde oft int voirs(creven) hoff e(n)nige scade gesciede/[van brande] bij ocsuyne des voirs(creven) wynne(n) oft de zijne(n) dat sal de voirs(creven)/ wynne den voirg(enoemde) lodewijke(n) oprichten en(de) vergelden ende/ des gelijx oft int voirs(creven) hoff e(n)nige scade gesciede [van brande] en(de) dat/ dat toe quame bij ocsuyne van lod(ewijc) oft de zijne dat sal de/ voirs(creven) lod(ewijc) den voirg(enoemde) wynne moete(n) vergelden en(de) oprichte(n)/ It(em) es vorweerde dat want alsoe dat de voirs(creven) lodewijc/ dese voirg(enoemde) lande uutgeve(n) woude met zijne(n) ande(re)n goeden/ en(de) landen oft die vercopen woude bynne(n) den voirscreve(n)
//
t(er)mijne dan sal de voirscr(even) de wynne de voirg(enoemde) lande moete(n) overgheve(n)/ en(de) dan sal de selve lod(ewijc) den voirg(enoemde) wynne sijne(n) arbeyt die hij/ dair aen gedaen sal hebben moeten vergelden en(de) betalen meer/ dan hij sculdich wae(re) te doen(e) te dien tijde moete(n) vergelden/ en(de) betalen ten prijse van goeden knapen die hen des v(er)stae(n)/ selen Item es vorwerde dat de voirscr(even) wynne de/ voirg(enoemde) wynnende lande laten sal te zijnen afsceiden/ vanden voirg(enoemde) t(er)mijne gelijc hij die vant ten/ aen comen(e) vanden voirscr(even) t(er)mijne te weten/ die storte en(de) die braecke eens om gedaen Ende/ alle deze vorweerden condicien en(de) geloften hebbe(n)/ geloeft de voirscr(even) lodewijc van oppendorp ende/ de voirscr(even) gheert van meldert de wynne malcande(re)n/ vast gestentich ende van weerden te houden en(de) te/ voldoen(e) tallen tijden en(de) t(er)mijnen als die vallen/ ende verschynen selen ende telken t(er)mijne als v(er)volghde/ schout hier waren over henric van lynte(re) de/ jonghe ende jan de prykere scepen(en) te loven(en)/ Gegeven int jair ons heren duysent vierho(n)d(er)t/ ende ene(n) veertich op den lesten dach van octobri
//