Margriet weduwe arnts wijlen van colen(en)/ ende anthonijze van langrode hue(re)n sone/ Tvonisse vanden gedinge hangen(de) voer meye(r) en(de) scepen(en) van loven(e) tusschen/ margareten weduwe arnts wilen van colen(en) alse tochteresse anthonisse van/ langrode man en(de) mo(m)boe(r) margareten van colene zijns wijfs dochter des/ voirs(creven) wilen arnts en(de) margareten alse erfman in deen zijde en(de) diericken/ van langrode brueder des voirs(creven) anthonis in dande(r) alse van eenre doren/ staende inden muere vander coken(en) des voirs(creven) dierijx gelegen inde/ dorpstrate dienende der scaelgien wert gelegen achter een stove vande(r)/ huyse der voirs(creven) marg(arete) en(de) anthonisse aldair gelegen Item vanden/ mure metter poerten staende tusschen de coken(en) des selfs dierijcx/ en(de) den raemberch dair achter gelegen Item vander poerten staende boven/ den raemberch en(de) desgelijcx oic vander poerten staende voe(r) den inganc/ vander heymelich(eit) staende achter inden hof des selves dierijx desgelijcx/ oic vanden hange die de voirs(creven) dieric afgebroken hadde en(de) plach te staene/ langx opden voirs(creven) raemberch van aenden putte staende achter thuys/ arnts van colene tot op deynde vanden hove des voirs(creven) dierix op [de] sijde ter/ dorpstrate toe poerten weert welke dore muir en(de) porte(n) die voirs(creven)/ dieric nuwelingen gemaect hadde oft doen maken ende want/ also de voirs(creven) margarete en(de) anthonis seiden dat [dair] die voirs(creven) dore/ nu steet ter tijt alse den voirs(creven) diericken sijn huys [en(de)] den voirs(creven) anth(onise)/ tsijne in huweliken gegeven worden stont een vynste(r) en(de) den voirs(creven)/ mure metter poerten en(de) desgelijcx de voirs(creven) twee ande(re) poerten/ afwaren en(de) dat de voirs(creven) margarete hue(re)n leefdach lange hue(re)n/ ganc en(de) gebruyc hebben soude vanden houthuyse staende aende/ voirs(creven) heymelich(eit) ende desgelijcx zij en(de) hue(r) erfgenamen hue(re)n vryen/ ganc en(de) gebruyc erflic beide beneden den voirs(creven) raemberch en(de) oic daer/ boven tot der voirs(creven) hemelich(eit) ende oic mede de voirs(creven) m(ar)garete/ en(de) hue(r) erfgenamen tgebruyc vanden voirs(creven) hange tot op deynde vanden
//
hove des voirs(creven) dierijx den welken ins deels bijden voirs(creven) diericken afgebroken/ wae(r) Welke poenten gesciet zijnde en(de) bevorwert inde huwelicke vorwerde(n)/ vanden voirs(creven) p(ar)tien boeden de voirs(creven) margarete en(de) anthonis te bewijsen(e) ende/ metten mynsten (et)c(etera) Soe hopten sij dat de voirs(creven) dieric de voirs(creven) dore tot/ eenre vynste(re)n vermetsen soude en(de) den voirs(creven) muere metter poorten/ desgelijcx die twee ande(r) poerten afdoen soude en(de) doen hermaken de(n) voirs(creven)/ hangk alse dien voe(r) den afbreken(en) stont Des geliefde hen wael trecht/ dair tegen de voirs(creven) dieric alligerde meynende dair af ongehouden te/ wesen(e) bij dien dat sijn erve vanden erve des voirs(creven) anthonis in/ levende live arnts wilen van colen(en) en(de) bij consente der erfgenamen/ bepaelt hadde geweest ende oic hadde de voirs(creven) anthonis hem geconsenteert/ den voirs(creven) muer en(de) poerten te mogen maken en(de) dat boet hij te thoenen/ en(de) metten meynsten (et)c(etera) Seyde voert de selve dierijc in sijnen/ verantwerden dat hem in contrarien van sijnre huweliker vorwerden/ verstopt wae(re) een vynste(r) dienende inde coken(en) des voirs(creven) diericx oic/ mede meynde hij eene(n) oven te hebben staende en(de) te mogen maken/ op de voirs(creven) scaelgie dienende metten monde inde scouwe vander/ coken(en) des voirs(creven) dierijx en(de) oic mede gesciede hem ongebruyck/ aen sijnen uutganck opten keyberch bij dien dat voe(r) de porte een/ ovenhuys gemaect wae(r) die welke aldair niet te staene en plach/ Hoepte dair o(m)me vander aenspraken ongehouden te sijne op welke/ gescille beide p(ar)tien tot hue(re)n bethoene werden gewijst Nae welke(n)/ thoenisse dair inne de voirs(creven) dieric de voirg(eruerde) palinge oft consent/ niet en bewijsde met rechte gesciet sijnde de scepen(en) van loven(e)/ die te voe(re)n de voirs(creven) erve(n) visenterden gewijst hebben voe(r) een vo(n)nisse/ dat de voirs(creven) dieric de voirs(creven) doe(r) toemaken sal en(de) indie stat/ setten een vynste(r) alsoe die te staen plach ende dat hij afdoen sal/ den voirscr(even) muer metter poerten beneden den raemberch
//
desgelijx oic de voirs(creven) twee ande(r) poerten staende boven den wech/ gaende ter heymelich(eit) wert [en(de)] desgelijcx doen hermaken de voirscr(even)/ hang alsoe dien te voe(re)n stont o(m)me der voirs(creven) m(ar)gareten te hebben hue(re)n/ ganc totten voirs(creven) houthuyse also [lange] als sij leeft en(de) dat sij en(de) hue(r) erfg(enamen)/ beide van beneden en(de) van boven erflic hebben ende behouden selen hue(re)n/ ganc tot der voirs(creven) heymelich(eit) en(de) tgebruyc aenden voirs(creven) hangk/ vanden voirs(creven) raemberch gelijc sij te voe(re)n dede(n) aen [nae] de waerh(eit) die d(aer)/ af gegaen es behoudelic dien oft de voirs(creven) dieric yemande [gelieft] aen/ te spreken(e) dat hij dat doen mach en(de) met rechte P(rese)n(ti)[b(us)] lomb(ar)t/ lyem(in)g(hen) abs(oloens) pynnoc vync voshem dormale maii xii a(n)no xliiii