Tvonnisse tusscen willem(me) vande(n) veken(en) die met scepen(en) brieve(n) van/ loven(e) stect in alle de goede jans van diepenbeke gehete(n) de vivier/ van hupain soe waer die bynne(n) braba(n)t gelegen zijn in deen zijde/ en(de) janne van haller in dande(r) alse vande(n) goeden h(ier) onde(r) bescreve(n)/ Te weten(en) inde(n) yerste(n) van v dach(mael) lants gelege(n) inde p(ro)chie/ van geldenaken t(er) plaetsen gehete(n) a tieson le poure tusscen de/ goede h(er) ph(ilip)s van tudekem ridders It(em) van xxiiii g(r)[o]te/ roeden lants gelege(n) t(er) plaetsen gehete(n) a grant champs/ tussce(n) de goede jacobs van savenirez en de goede willems/ van mulke Item van xii g(r)[o]te roede(n) lants gelegen opde(n) wech/ gaende van geldenaken te hupain weert ald(aer) naeste den goeden/ jacobs van p(er)fontrieu Item van i(½) dachmale en(de) ix cleyne/ roede lants gelege(n) tusscen de goeden jacops van p(er)fontrieu/ in beide(n) zijden Item van vi groete roeden lants gelegen ter/ plaetse(n) gehete(n) a s(ain)t m(ar)tin fonteyne tusscen den bosch m(ijns)/ he(re)n van chantrain Item vii(½) roede(n) lants gelegen tussce(n) de/ goede van chantrain en(de) jans kakreal Ite(m) van vi roeden/ lants gelegen acht(er) den hoff pierarts sotteal In twen zijden/ Item vande(n) derdendeel van twe roeden boende(re)n lants twe/ roeden myn gelege(n) inde landouwe van hupain in alrehande/ porcelen aldair Item van xxiii(½) roeden lants beemts geleg(en)/ te hupain It(em) xxi roeden bosch gelegen te hupain Item/ van twe husen en(de) hove(n) deen neve(n) dande(r) gelegen te
//
hupain tusscen de goede enarts le vivier wijlen en(de) de goede/ renchon wijlen zijns brued(er)s Item van i(½) mudde rox erfs/ pachts d(er) maten van loven(e) aen en(de) op zeke(r) goede ende/ onderpande jans wijlen de chesteal gelegen te hupain/ Item van twe dosijne(n) terwen erfs pachts aen en(de) op huys/ en hoff met zijnre toebehoirte(n) daneels sone wout(er)s de/ stockoyt Item van viii halst(er) terwen erflic aen en(de) op/ xii roeden hoefs jans dachons alder naest den goeden/ des voirs(creven) jans dachons Ite(m) van de twe deele van iiii/ dosijne(n) tarwen erflic aen en(de) op zeke(r) goede en(de) onderpande/ die ware(n) reynuwair machier te jauche gelegen Vanden/ welken de voirscr(even) willem vande(n) veken(en) begheerde in/ zijnre goedingen gehoude(n) te worde(n) ende hadde de voirs(creven)/ jan van haller dien yet aen te spreken dat hij dat dade/ en(de) mette(n) rechte Dair op de voirs(creven) jan antwoirde dat/ hem de voirscr(even) goede met joncff(rouwe) g(er)truden de vivier/ zijne(n) wive docht(er) ernarts de vivier in huwelijken/ vorwerde(n) gegen waren des hij hem gedroech totten/ instrume(n)te opd(er) selv(er) huwerlijker vorwerden gemaect/ bege(re)nde d(aer) mede voirt te moegen varen ter plaetsen/ dair die behoe(re)n Es gewijst met desen woirden datme(n)/ den voirs(creven) willem(me) vande(n) voirg(eruerde) goede(n) houden sal in/ zijnre goedinge(n) ende heeft de voirs(creven) jan van haller/ dair op yet te volge(n) met zijnre huwelijker vorwerde(n)/ dat hij dat doen mach ter plaetsen dair dat behoirt/ p(rese)nt(ibus) lomb(ar)t ab(soloens) vync voshem dormale nove(m)bri(s) vii[a]