It(em) wout(er) van aelst van meldert in yeg(enwordigheit) d(er) scepen(en) van loven(e) gestaen/ heeft genome(n) ende bekent dat hij genome(n) heeft van der cap(it)len der kercke/ van sinte b(er)thelmeus te ludic een thiende d(er) selver cap(it)len toebehoe(re)nde/ geheten den couthe(r) gelegen tusscen honsschem ende ov(er)hem v comende voir/ de poirte des voirscr(even) wout(er)s Te houden en(de) te hebben van heden een/ jair lang due(re)nde om ende voir xxxvi mudden [herts] corens goet van/ payabel met wanne en(de) met vede(re)n wail bereyt der maten van/ thienen te kersmisse te betalen(e) [vallen] oft ombegrepen te liechtmisse te bet(alen)/[he(re)n jacoppe rotarii canonc van sinte b(er)telmeeus te ludic en(de)] te thiene(n) te leve(re)n als vervolghde schout en(de) oic om c schoeven/ ruggens stroes te betalen(e) den p(er)soen ind(er) kercken van meldert py(n)noc/ dor(ma)le junii x octava