Item jan ruelens in p(rese)ncia heeft genome(n) en(de) bekint dat hij genome(n) heeft/ jegen henricke vande(n) borchoven sone wile(n) wout(er)s vande(n) borchove(n) de goede/ hier nae bescreve(n) inden yersten thoff mette(n) bogaerde hove dair neve(n) ende/ metten hove achter de schue(r) gelegen te miskem Item ene(n) beemt geheten/ diepenbeemt en(de) ene(n) beemt geheten den ouden boegaert [dair jegen ov(er) gelegen] Item ene(n) beempt/ geheten coninx halfboender en(de) de helicht van drie boende(re)n beemts/ luttel min oft meer gelegen int eygen van lynte(r) Item thien dachmael/ en(de) een half en(de) viventwintich roeden lants gelegen achter de voirscr(even)/ woeni(n)ghe Item elf dachmael lants gelegen te nederhem en(de) onder half/ dachmael lants gelegen opden weduwen berch Te houden te hebben en(de)/ te wynne(n) van halfmerte lestleden ene(n) t(er)mijn van drie jae(re)n lang/ deen nae dander staphans sonder middel volgende te weten de voirscr(even)/ woninge metten bogaerde en(de) metten hove(n) en(de) oic metten voirs(creven) beemden/ om ene(n)veertich [xxxix] hollansche gulden(en) oft de weerde dair af in ande(re)n goeden/ goude Elx jaers hie(re)n bynne(n) half te sinte jansmisse baptisten inden/ somer en(de) half te sinte remeys misse te betalen den voirs(creven) t(er)mijn/ due(re)nde en(de) telken t(er)mijne als v(er)volghde schout Ende de voirscr(even)/ lande elcx jaers om xiiii mudden corens pachts van miskem/ goet ende payabel met wanne(n) en(de) met vede(re)n wel bereit der maten/ van diest te sinte andries misse apostels te betalen en(de) een voeder dair/ af te loeven(en) te leve(re)n ende dander te diest te leve(re)n opden cost/ des voirs(creven) wynne(n) jairlijx den voirs(creven) t(er)mijn due(re)nde en(de) telken/ t(er)mine als v(er)volgde schout Item de selve wynne sal henricke/ gheve(n) jairlijx sesse keese goet comants goet Item sess pont bote(re)n/ gelijc alsmen daer de ponde maect sal de voirs(creven) wynne den/ voirs(creven) henricken oic jairlijx betalen Item sal de voirs(creven) wynne/ den voirs(creven) henricken vanden borchoven jaerlijx betalen zaeyen een/ molevat lijzaets en(de) op bereyden al gedroegt en(de) te loven(en) leve(re)n/ Ende des sal henric bynne(n) den drie jae(re)n twee molevate(n) lijzaets/ gheve(n) Item noch sal de voirs(creven) wynne jairlijx halen op haspegouwe/ een voeder walmen ende int voirs(creven) hoff bringen Item de voirs(creven)/ wynne en sal egheen coe(re)n te velde v(er)coepen moegen vanden goeden
//
dat hij vanden voirs(creven) henrick heeft Item als henric vande(n) borchove(n)/ voirs(creven) heeft doen leem graven opde neghen zillen oft eld(er) dan sal de wynne/ den leem int hoff vue(re)n Item henric ende de wynne selen hebben/ half ende half dat ooft dat inden voirs(creven) bogaerden en(de) op tvoirs(creven) goet/ wassen sal ende alsmen dappele vercoept soe sal henric zijn deel dat/ hij behouden sal te loeven(en) vanden voirs(creven) wynne gelevert hebben ende/ waert dat mense niet en vercochte soe sal de wynne henricke zijn deel/ oic te loeven(en) leve(re)n Item de wynne sal den voirs(creven) henricke jairlijx geve(n)/ twee hondert walmen Item de voirs(creven) wynne Item de voirs(creven) wynne/ sal den voirs(creven) henricke alle jae(re) den voirs(creven) t(er)mijn due(re)nde vijf voeren/ doen met sijne(n) wagen ende p(er)den te loeven(en) [als hijs te doen heeft sal hebbe(n)] Item sal de wynne de/ loeme(n) slaen jairlijx alst noet is [vriest] ende dmest waterleyden daert plach/ te gaene Item henric voirs(creven) sal behouden sijn wien [vanden wijtha(m)me] Item de bome sal/ de voirs(creven) wynne jairlijx grave(n) Item de wynne sal tstroe gheve(n)/ totten huysen die hij heeft alsmen dair plect het en wae(re) datmen/ nuwe huyse maecte Item henric voirs(creven) sal behouden sijn huyse gelijc/ als hijse gehadt heeft Item de wynne en sal ghene(n) loeck vue(re)n van/ henrix erve Item inden leste jae(re) sal de voirs(creven) wyne de tuyne/ cusbaerlijc geloeken laten ende wairt dat henrick de voren somtons/ verhouden woude tot op een ander jair soe en sal de wynne van ghene(n)/ verlett van dien voe(re)n doen die henrick op e(n)nich jair hadde gelaten/ Item van decken ende van ty(m)meringen het en wae(re) van nuwe ty(m)meringe/ van plecken ende van muerene alsoe verre als die wynne de huyse/vanden voirs(creven) beneden heeft soe sal de wynne den cost geven en(de)/ henric de dachue(re)n de wynne sal de wande houden alsoe verre alsme(n)se/ houden mach met ene(n) haftelle Item sal de wynne jairlijx betalen/ den he(re)n tsijs uuten voirs(creven) goede gaende Item en sal de voirs(creven) wynne/ bynne(n) den voirs(creven) t(er)mijne en(de) getonst niet moegen huervruchten Item/ voert sal de selve wynne de voirs(creven) lande en(de) hove wynne(n) mesten/ en(de) hante(re)n wel en(de) loflijc gelijc hae(re)n reengenoete(n) ende alsoet men dair/ sculdich es te houden ende te wynne(n) en(de) mesten en(de) dmest niet onder/ te doen henrick oft yemant van sine(n) voegen en hevet gesien Item/ waert dat henric leem te doen hadde aen sijn huysen vander moelen
//
ende dien dade grave(n) achter thof op de neghen zillen dat hij dat/ doen sal moegen Item sal de voirs(creven) wynne talle drie jae(re)n die/ waterloepen en(de) grechten vande(n) voirs(creven) goeden ruyme(n) en(de) vegen en(de)/ daer toe alsoe dicke als de he(re) dat gebieden sal te doene/ Ende de wynne en sal gheen op gaende hout op de voirs(creven) goede/ staende moeghen slenen oft troncken aende wuwers op den dijck/ Item es vorweerde dat de voirs(creven) wynne int leste jaer vande(n)/ voirs(creven) t(er)mijne en(de) getonst vue(re)n int hoff voirs(creven) alle stroe dat vande(n)/ voirs(creven) goeden come(n) sal en(de) dat aldair te etten en(de) te sliten met/hae(re)n [sijne(n)] beesten te mesten [en(de) mest d(air) af] te maken ende dat ten uutgaen vande(n) selve(n)/ t(er)mijne bynne(n) den hove te laten uutgescheiden xiii hope stroes/ half roggen en(de) half g(er)sten de welke hij oic int hof voirs(creven) laten/ sal Item de voirs(creven) wynne sal ten eynde van sine(n) voirs(creven) t(er)mine/ en(de) getonste een boender lants gelegen te ned(er)hem besaeyt laten met/ rogge en(de) wel gewonne(n) en(de) gemest gelijc reengenoten en(de) gelijc datme(n)/ aldair sculdich es te wynne(n) en(de) te mesten Item de seve(n) dachmael/ storten te nederhem gelegen en(de) de ond(er)half dachmael lants opden/ weduwen wech [berch] sal de wyn laten omgedaen op een getidege voe(re)/ welke vorwerden en(de) geloften de voirs(creven) jan ruelens in deen zijde/ en(de) henrick vande(n) borchove(n) in dande(re) hebben geloeft malcande(re)n/ vast en(de) ghestentich te houden en(de) te voldoen tallen tijden en(de) t(er)mine/ als zij vallen en(de) v(er)schijne(n) selen en(de) telken t(er)mine alse v(er)volgde/ schout Hier af zijn borgen des voirs(creven) jans als p(ri)ncipael/ sculde(re)n ongesundert en(de) onv(er)scheyden ende elc voe(r) al roelant/ roelants vader des voirs(creven) jans matheeus ruelens brued(er) des voirs(creven)/ wynne(n) en(de) matheeus moens swager des voirs(creven) wynne(n) van kersbeke/ Et p(ri)m[(us)] witte vynck(enbosch) decembr(is) t(er)cia