It(em) jacop uute(n) lyeminge(n) die na de(n) rechte der stad van loeven(en) geleidt es tot/ allen den goeden beyde have ende erve gordts bosscharts ty(m)mermans ende/ machtilts van dormale wilen zijns wijfs weduwe wout(er)s wilen van wynge in/ deen zijde ende de voirs(creven) gord bosscart in dande(re) sijn aengegaen bij haren/ vryen eygene(n) wille ende hebben malcande(re)n toegeseecht en(de) gelooft de/ poente hier na volgen(de) inden yerste(n) heeft de selve jacop geconsenteert/ den voirs(creven) gorde dat hij niet wederstaende de(n) selve(n) beleyde voir hem/ zijne(n) erve(n) en(de) nacomelingen behouden sal alle alsulken beruerliken goede/ also wale vliegende erve als ande(re) hoedanich die zijn als de selve gord/ op den dach van heden heeft die hij en(de) de voirs(creven) wilen zijn wijf te same(n)/ hadden en(de) d(aer) toe die de selve gord binne(n) sijne(n) leven v(er)crigen oft verwerve(n)/ sal connen sceldende dair op de selve jacop tvoirs(creven) zijn beleit volcomelijc/ quite alst hier onder inder quitancie(n) genoech blijct bekinnen(de) hem/ ne(m)m(er)meer uut machte vanden voirs(creven) beleyde testame(n)te oft and(er)s te gheenre/ tijt e(n)nich recht d(aer) inne te behouden consenteren(de) den selve(n) gorde dat hij/ sijn leefdach lanc blive(n) sal en(de) als tochte(r) sitte(n) in alle(n) de(n) onberuerlike(n) goede(n)/ die de selve gord ende machtelt hadde(n) en(de) besate(n) ter tijt dat de selve/ machtilt aflivich was te wat plaetsen die zijn gelege(n) het zijn huyse hove/ wynnen(de) lande beemde chijse rente(n) hoedanich die erflijc zijn welke gordt/ openbairlijc d(aer) op voirt geconsenteert en(de) gewillecoirt heeft dat de voirs(creven)/ jacop alle de voirs(creven) onberuerlike goede na zijn doot mette(n) voirs(creven) beleyde voir/ hem en(de) sijne(n) nacomelinge(n) tot ewige(n) dage(n) behoude(n) en(de) besitten sal navolgen(de)/ der condicie(n) dair af bij de(n) selve(n) beleyde geregistreert sond(er) dair jege(n) ne(m)m(er)meer/ al waert dat hij mochte e(n)nichssins ter contrarie(n) yet te werve(n) te/ v(er)volgen oft te versueken in e(n)niger manie(re)n voir enich gerichte gheestelijc/ oft weerlijc bij hem selve(n) noch bij nyeman(de) anders in gheenre wijs voirt/ heeft gelooft de selve gord binne(n) sijne(n) leven(en) als voirs(creven) es de voirs(creven) goede/ besittende dat hij die sal houden wel en(de) cusberlijc van wande en(de) va(n)/ dake als tochte(r) oft tocht(er)sse gronde van goede besittende die sculdich/ sijn te houde(n) alle argelist uut gesceyde(n) va(n) welke(n) poente(n) gehelijc de/ voirs(creven) p(ar)tien malcande(re)n hebbe(n) gelooft warant te zijne en(de) oft de voirs(creven)/ p(ar)tien malcande(re)n behoefden om e(n)nich vande(n) goeden die elc na inhouden/ der vorwerde(n) voirs(creven) sculdich es te hebben te bescudde(n) het zij have oft erve/ d(aer) af selen zij elc den ande(re)n alle behulp doen en(de) hant en(de) mont leene(n)/ altijt te(n) coste des gheens die tselve behulp behoefde voirt heeft de selve/ gordt gesedt ond(er) scepen(en) van loeven(en) zeke(re) erfbrieve den erfgoede(n) voirs(creven)/ aengaende liggende in een vierca(n)t zwert goff coffer d(aer) aen de heyse de/ name(n) vande(n) voirs(creven) jacoppe en(de) gord gescreve(n) staen die blive(n) selen aldair des/ voirs(creven) gorts leefdach lang om hem d(aer) mede te behulpen tsijnre tocht/ behoef behoirlijc oft hij dier te doen hadde en(de) na zijn doot salme(n) die sond(er)/ yemants wed(er)seggen de(n) voirs(creven) jacoppe ov(er)geve(n) abs(oloens) wynge ja(nuarii) xxix