It(em) want jouff(rouwe) jeha(n)ne van molenbeke no(n)ne vande(n) cloeste(r) van bortgijs/ gevo(n)nist heeft voe(r) meye(r) ende scepen(en) van loven(e) zeke(re) scepen(en) brieve(n)/ van loven(e) op janne wijlen van mulkene sone wijlen willems van/ mulkene sprekende van xx gulden rinsche van goude goet ende/ gheve alle jaire half te kersmisse ende half tsint jans misse te/ betalen en(de) inder stad wissel van loven(e) te leve(re)n alle jaire/ alsoe lange als de selve jouff(rouwe) jeha(n)ne leven sal en(de) niet lange(r)/ de welke xx rinsche gulden(en) lijftochte(n) voirs(creven) de voirs(creven) jouff(rouwe)/ jeha(n)ne houden(de) es aen ende op de goede hier na bescreven/ des voirs(creven) wijlen jans van mulkene inden yersten aen ende/ op thof des selfs jans gelegen te molenbeke in woeni(n)gen huysen/ hove(n) boegarden met twe wuwers neve(n) tvoirs(creven) hoff gelegen en(de)/ met ene(n) wijngarde gelegen voir de voirs(creven) woeni(n)ge gelijc/ de voirs(creven) jan vande(n) mulken(e) de voirs(creven) goede aldair houdende was/ It(em) aen ende op de wintmolen des selfs jans gelegen te mole(n)beke/ neve(n) de drieschstrate dair men gaet te sichen(en) wairt alre naest/ de lande van sinte laureys van molenbeke Ite(m) aen ende op drie/ boender lands gelegen neven de moelen voirs(creven) alre naest den goede(n)/ des voirs(creven) sente laureys van moelenbeke Item aen ende op twe
//
boende(r) lands gelegen aende kercke te moelenbeke op dlant dat me(n)/ heedt den vinelpoel opde zijde te love(n) wert Item noch aen ende/ op twe boende(r) lands gelegen aen de voirs(creven) kercke opde side te/ halen wert aen de woeni(n)ge katlijne(n) sries Item aen ende op v/ boender boschs gelegen bove(n) de voirs(creven) woeni(n)ge te molenbeke/ tusschen de bossche des cloest(er)s van vliederbeke ende der he(re)n van/ walsb(er)ge Item vijf boende(re)n eusels geheten den driesch gelegen/ boven de voirs(creven) woeni(n)ge te moelenbeke tusscen de goede der/ voirs(creven) he(re)n van walsberge en(de) de voirs(creven) drieschstrate dair men/ comt van zichen(en) waert Ite(m) aen ende op een panhuys met/ huysen hove(n) ketelen vaten tot den voirs(creven) panhuyse hoe(re)nde gelege(n)/ opde hersstrate van moelenbeke inde prochie van beckevoirt/ te weten tpanhuys gelegen opde zijde te loven waert alre/ naest den goeden henrix steenbeecx Item aen ende op terdel vande(n)/ chijse toebehoe(re)nde den hove van moelebeke in gelde capuyne(n)/ even(en) ende ande(re)n gelde rechten en(de) heerscapen van goeden en(de)/ ontgoeden dair toe hoe(re)nde van welken chijze ende heerscape(n)/ jan vanden stelve dander twe derdendele houden(de) es aen alre/ pande te moelenbeke gelegen Ite(m) aen ende op de warande te/ molenbeke gelegen tusscen de vier strate(n) aldair gelijc dat de/ voirs(creven) jan van mulken(e) de voirs(creven) warande aldair te houden/ plach Item aen ende op den chijs van scoenbeke dien de selve/ jan houden(de) was inde prochie van wersbeke gelijc me(n) dien/ chijs te leen houdende es van stene(n) van cappendale Item v/ schellinge goeds gelts aen alre pande te tielt gelegen met/ alden rechte ende heerscape dair toe hoe(re)nde gelijc de voirs(creven)/ jan de voirs(creven) goede houden(de) was inde voirs(creven) steden luttel min/ oft meer inde mate houdende ende tvo(n)nisse der scepen(en)/ van scepen(en) van loven(e) wijsde dat de voirs(creven) jouff(rouwe) jehanne trecke(n)/ soude op de voirs(creven) goede ende onderpande vonde men dair/ op te panden datme(n) panden soude ende en vonde men/ niet te panden datme(n) dan voirt varen soude met rechte/ aldair corselijs van swertzenberch behoirlic voe(r) scepen(en) van/ loven(e) ende andersins bijder voirs(creven) jouff(rouwe) jehanne(n) met consente/ der abdissen ende conve(n)te vanden voirs(creven) cloeste(r) van bortgijs/ volcomelic gemechticht zijnde toech met meye(r) ende/ scepen(en) van scepen(en) van loven(e) opde voirs(creven) pande ende ond(er)pande/ opde welke men niet te panden en vant soe zijn hem
//
de voirs(creven) goede ende onderpande in handen gesedt ende behoirlijc/ gelev(er)t voe(r) cost ende co(m)me(r) dair op met rechte geloepen/ p(rese)ntib(us) witte willem(air) maii xvi