Tvo(n)nis vande(n) gedinge dat voir meye(r) ende scepen(en) va(n) lov(en) geweest/ es tussche(n) henricke coulon die nae den rechte der stad va(n) loven(en)/ comen ende beleydt es tot alle(n) den goede(n) beyde have ende erve/ wairniers va(n) pospo en(de) jouffr(ouwe) johanne va(n) facowez sijns wijfs/ dochter joes wijle(n) va(n) facowez in deen zijde ende jouffr(ouwe) sohier/ na(tuer)lec sone des voirs(creven) wijle(n) joes bastaert brue(der) der voirs(creven) jouff(rouwe)/ johanne(n) in dande(re) alse va(n) eene(n) huyse ende hove met sijnder/ toebehoirte(n) gelege(n) te yttre dat wijle(n) steve(n) va(n) facowez wettich/ sone des [voirs(creven)] wijle(n) joes gegeve(n) hadde met scepen(en) brieve(n) van yttre/ den voirs(creven) sohier sijne(n) na(tuer)lijke(n) brueder Welcke(n) brief va(n) ghiste(n) was/ vander daet xiiii[c] xxxviii jaer xiiii dage inde maent va(n) nove(m)br(is)/ Ende voirt vander so(m)men va(n) xl gulden(en) eens en(de) va(n) seke(re)n gelufte(n)/ va(n) ontheffen(en) va(n) zeke(re)n laste te nyvele gebeurt die de selve wijle(n)/ steven den voirs(creven) sohier sijne(n) na(tuer)like(n) brueder oic gedaan heeft hadde/ ende daer voe(r) v(er)obligeert sijn goede onder de banck va(n) yttre geleg(en)/ en(de) ingelijcx met scepen(en) br(ieven) van ytt(re) vander daet xiiii[c] xlii jaer/ xxix dage in januar(ii) meynende de voirs(creven) sohier sijne(n) na(tuer)liken dat/ hem tvoirs(creven) huys en(de) hof sculdich wae(re) te volge(n) en(de) dat hij dinhoudt/ vande(n) ii[e(n)] brieve voirs(creven) aende goede die wae(re)n des voirs(creven) wijle(n) steve(n)s
//
sijns getrouwde brueders onder de voirs(creven) banc geleg(en) v(er)hale(n)/ ende verreycke(n) soude want hij vermat hem den bancke(n) en(de) shoets/ recht dair onder de voirs(creven) goede gelegen sijn te thoene(n) en(de)/ alsulke te wesen dat een sone va(n) manne(n) en(de) wive gebleve(n) dair/ daer den stoel gesceyde(n) wae(re) wel mach hadde zijn goede te/ belasten(e) al waest dat deen vanden gehuyssche(n) noch leven(de)/ daer niet bij en wae(re) Hopen(de) bij dien oft hij dat gethoene(n)/ conde en(de) oic dat gheen suste(re)n nae der selver bancken recht/ in gronde va(n) erve en deylden mer mochte(n) met pe(n)ningen/ werden versien dat hem tvoirs(creven) huys dat hij alrede eene(n)/ seke(re)n t(er)mijn besete(n) hadde volge(n) soude en(de) dat hij voirt dinhoudt/ vanden ii[te(n)] br(ieve) voirg(eruert) aende goede dair inne begrepe(n) v(er)halen/ soude moege(n) Op dwelc de voirs(creven) henric coulon he(m) v(er)antw(er)den(de)/ hoepte dat de voirs(creven) sohier de voirs(creven) pointe(n) nu(m)m(er)meer thone(n)/ en soude v m(er) boet te thoene(n) beyde mett(er) banck en(de) d(aer) hoetbanck/ te weten den scepen(en) va(n) nyvele alrehande pointe in co(n)trarien/ vande(n) voirs(creven) voertstelle des voirs(creven) sohiers seggen(de) voirt dat/ hem ende sijne(n) beleyde wae(re) hij die pointe dier hij he(n) v(er)mat/ gethoene(n) conste ende oic bewijse(n) dat de voirs(creven) jehanne/ wetich wijf des voirs(creven) waerniers recht oer en(de) erfgename/ wae(re) van dese(n) goede dat hem die ombelet vande(r) voirs(creven)/ sohier in beyde(n) saken voirs(creven) volgen soude en(de) sculdich wae(re)n/ te volgen Wert gewijst ten uut(er)sten bijden he(re)n scepen(en) va(n) lov(en)/ ter manissen smeyers nae aensprake v(er)antwerden en(de) thonisse/ va(n) beyde(n) p(ar)tien hier op v(er)hoert dat den voirs(creven) henricke/ coulon en(de) sijne(n) beleyde dese goede volgen soude(n) alse v(er)re/ alst noch voir hen come(n) was p(rese)nt(ibus) scab(inis) dempto lynt(re)/ julii xix