Item tvo(n)nisse vanden gedinghe dat voe(r) meye(r) en(de) scepen(en) van/ loven(en) gewist is tusschen henricke vanden heylighengheest dieme(n)/ heet van lare metsere en(de) lijsbetten kaets docht(er) henr(ix) kaets/ die geleit zijn totten goeden henr(ix) kaets vad(er) der vorscr(even)/ lijsbetten in deen zijde ende janne zeebot in dande(re) alse/ van eene(n) huyse en(de) hove met sijnd(er) toebehoerten geleg(en) te/ bierbeke ter plaetsen geheten mollendal tusschen de gemeyne/ vroente en(de) de goede wout(er)s boelarts vanden welken/ de vors(creven) jan als momboe(r) m(ar)grieten zijns wijfs aensprac/ deen derdendeel vand(en) vors(creven) goede(n) seggende dat dat der/ selver m(ar)grieten v(er)storven was van henr(ick) wilen kaets/ Nochtan dat hij ten eynde bekinde dat de vors(creven) m(ar)gr(iet) zijn/ wijf natuerlic was dair o(m)me zij gheenen mont te/ spreken en hadde en(de) bijden welken de vors(creven) geleide/ hyelden dat de vors(creven) jan met zijnen aenspraken v(er)doel/ was en(de) dat zij in hue(re)n scepen(en) brieve(n) gehouden/ souden wordden Was gewijst met desen worden nae/ aensp(ra)ke en(de) v(er)antweerden van beyden p(ar)tien dat de vors(creven)/ jan zeebot met sijnd(er) aenspraken vand(en) vors(creven) goed(en)/ verdoolt was p(rese)ntib(us) eisd(em) scab(inis)