Tvo(n)nis vande(n) gedinge dat voir meye(r) en(de) scepen(en) va(n) loven(en)/ geweest es tussche(n) henricke coulon die nae den rechte/ der stad va(n) loven(en) geleydt es totte(n) goede(n) have ende erve/ colart mailgefer in deen zijde ende mitsart nailteal in/ dande(re) alse vander bladingen va(n) zeke(re)n goede(n) den voirs(creven)/ colart toebehoe(re)nde geleg(en) te ayngnez dair op de voirs(creven)/ mitchart begonne(n) hadde mett(er) banck recht dair onder/ die geleg(en) wae(re)n te p(ro)cede(re)n voir ii mudde(n) terwen erfrinte(n)/ die hij daer aen meynde te hebben en(de) was trecht/ soe verre vervolght dat qua(m) op de derde genechte/ ende doen hadde de voirs(creven) collart midts zeke(re)n toesegge(n)/ den voirs(creven) mitchart trecht doen schorssen en(de) wair/ bynne(n) middele(n) tijde come(n) en(de) hadde hem de voirs(creven)/ bladinge nu mette(n) voirs(creven) beleyde en(de) met der stad/ brieve va(n) v(er)sueke onthoge(n) Wair o(m)me hij meynde dat/ dat tonrechte wae(r) en(de) dat de voirs(creven) henric coulon/ gehoude(n) zijn soude inde restitucie en(de) de voirs(creven) henric hielt/ de contrarie Wert gewijst bijd(er) he(re)n scepen(en) va(n) loven(en) t(er) manisse(n)/ smeyers nae aensp(ra)ke [en(de)] v(er)antw(er)d(en) va(n) beyd(en) p(ar)tien dat de(n) voirs(creven) henr(icke)/ en(de) zijne(n) beleyde de voirs(creven) bladi(n)ge volge(n) soude en(de) hadde de voirs(creven)/ mitschart and(er)s yet te volgen dat hij dat dade met rechte/ p(rese)nt(ibus) om(n)ib(us) scab(inis) dempt(o) prijke(re) julii xi