Item alsoe als over een wijle geleden zekere questien opverstaen/ en(de) gereesen sijn tusschen roelofve vander elst als geleyt nae der/ stad recht met scepen(en) brieven van loeven(en) totten goeden quinten/ h(er) jacops geheeten van belanden(en) voer seker wettelijc gebrec/ van lijfpen(sien) inden selven [scepen(en)] brieve gecleert in deen zijde ende/ janne van beert wettich sone ende erfgename van des/ voirscr(even) quintens wive die nu eenen tijt geleden aflivich/ es wordden in dande(re) Om seke(re) nootlijke behoiften die des/ selfs jans moeder die bijden selven q(ui)nten hue(re)n man niet en/ sadt noch eenen tijt hier voe(r) verkeert en hadde om zijn/ onredelicheit mair te loeven bij eenigen hue(re)n maghen/ Te weten sande(re)n van oerbeke gewoent in hue(re)r ziecheit/ als van medicijnen specerijen drancken ende andere(n)/ hadde gevesticht ende van nootweghen behoift Ende/ om hue(re) exequie kercken recht ende sepulture die de selve/ jan in gescrifte bij declaracien overgaf ende die hij/ meynde datmen nae alle gelegentheit van hue(re)n state/ v(er)reycken ende verhalen soude aen seke(re) rinten die huer/ gevallen wae(re)n aen mijnen he(re) van berghen en(de) eenighe/ sijn borghen ende inder stad wissel gesedt Vanden welke(n)/ de voirs(creven) roelof meynde de (con)trarie ende seyde dat hue(re)/ rinten en(de) goede hue(re)n man toebehoirden ende dat hem dair/ om de voirs(creven) pe(n)ninghe te sijnd(er) dueghdelijker schout behoif/ volghen souden te voirder want voirtijts in eene(n) tractate/ tusscen den voirs(creven) q(ui)nten ende sijnen wive gemaict vorw(er)de/ was dat dese rinten in des voirscr(even) q(ui)ntens scoude bekeert/ ende geconverteert souden wordden ende de voirscr(even) jan/ meynde dat dien niet tegenstaende dat van redenen/ ende rechts weghen hue(re) gereetste goede sculdigher/ wae(re)n dese nootlike behoiften ende hue(re) exequien te gelden/ dan des selfs quintens schout Soe eist dat hier op
//
bij den raide vander stad p(ar)tien te vele tijden al int lange/ gehoirt ende informacie genomen van alle gelegenth(eiden)/ overdraghen ende get(er)mineert is dat vanden voirs(creven)/ gesetten pe(n)ninghen die als voirscr(even) steet inden wissel/ comen zijn getogen ende afgenomen selen wordden de/ p(ar)tien hier nae v(er)claert Te weten ierst vand(er) voirscr(even)/ jouffr(ouw) te doen berichten aen den prieste(re) ende den coste(re)/ tsamen vier stuv(er)s een quart It(em) alsmen haer seve(n)ste/ dede aenden prieste(re) die de messe sanc twee stuv(er)s/ en(de) die de ewangelie en(de) epistele songhen elken eenen/ stuv(er) It(em) ten selven sevensten aenden p(ro)chiaen he(re)n/

willem(me) sijnen brueder den ond(er)prochiaen ende den coste(re)/

vier stuv(er)s en(de) onderhalven braspenninc Item den p(ro)chiaen/ voir sijn recht en(de) sijnen wijn vanden wieroeke ende/ and(er)s acht stuv(er)s Item den cellebruede(re)n diese droegen/ vier stuv(er)s It(em) vanden grave te maken en(de) vanden zercke/ op te heffen thien stuvers It(em) vander scrijne(n) dair zij/ inne begraven was sesse stuv(er)s It(em) van huer te/ doen scrijnen sesse stuv(er)s It(em) vand(en) wasse ten graven/ sevensten en(de) dertichsten neghenendertich en(de) een half/ pont was elc pont te thien pl(a)c(ken) en(de) tgheen des den/ coste(re) voir sijn recht van luyden(e) sal moten hebben [xviii stuv(er)s] die/ aldus ten mynsten laste bijder stad raide gheestimeert/ en(de) ghetaxeert sijn Voirt es overdraghen dat noch vand(en)/ vors(creven) pe(n)ninghen en(de) bijden reden(en) voirg(eruert) genome(n) sal wordd(en)/ tgheen in redelicheid(en) dat zij in hue(re)r ziecten van specerien/ medicinen zueten drancke en(de) anders inde apotheke behoift/ heeft Vanden welken ofter inde qua(n)titeyt e(n)nich discoert/ geviele de stad de groetsinge te huerweert behult junii/ xxviii