Het zijn comen in rechte voer meye(r) ende scepen(en) van loeven(en)/ inde banc jan vanden hove sone wijlen jans die voer meye(r)/ ende scepen(en) van loeven(en) gevo(n)nist heeft zeke(re) scepen(en) brieve va(n)/ loven(en) op henricke egnoy ende die dair voe(r) inde vroente/ gehacht sadt sprekende van twintich pet(er)s in deen/ zijde ende de selve henric egnoy in dande(re) daer/ de voirs(creven) jan versocht met eenen geleverden voirspreke/ betalinge vand(en) voirs(creven) scepen(en) brieve te hebben hopen(de)/ dat hem dat gescien soude oft dat de voirs(creven) henric/ dair voe(r) in hachten soude bliven nae der stat recht tot/ d(er)re tijt toe dat hij de voirs(creven) scepen(en) brieve hadde voldaen/ Dair tegen de voirscr(even) henric hem oppone(re)nde dede seggen/ dat hij metten voirscr(even) janne vanden hove noyt vorweerde/ gemaect noch comenscap gedaen en hadde noch en was/ hem noyt nyet sculdich van rinten noch anders maer/ de gelufte die hij hem mocht hebben gedaen was/ gespruyt uut onribelijken hanteringen die de voirs(creven) jan/ vanden hove niet voer hem selven maer als meyer van/ loeven(en) met hem hadde gehadt die hen selven naemaels/ vynden souden ende hij p(rese)nteerde voir alle vo(n)nissen de/ voirs(creven) so(m)me te setten in handen vander wet ende dae(re)n/ tynden voirt te varen te vercleren ende bij te bringhen/ int gerechte voer meye(r) ende scepen(en) van loeven(en) oft/ ter plaetsen dair de scepen(en) wijsen zouden dat het/ behoe(re)n mochte de saken ende reden(en) vand(er) meshand/ linghen in hem begaen zulke dat hij hoopte dat hij der/ betalingen vander voirs(creven) so(m)men ongehouden soude weze(n)/ hopende dat hem dat werdden zoude ende dat hij dair op
//
vander hachten ende vroenten soude zijn geslaghen Dair/ op de voirs(creven) jan vanden hove replice(re)nde meynde dat/ nae recht vander stat ende vanden voirscr(even) scepen(en)/ brieven hij betalinghe ende hantvullinghe hebben soude/ ende dat hij niet eer ontslagen en soude wezen ende/ geliefde den voirscr(even) henricke dae(re)ntynden yet opte/ doene oft te vorde(re)n dat liet hij gaen dairt sculdich/ ware te gane Daer ten uut(er)sten nae allet ghene/ des bij partien was ghealligeert met vo(n)nisse van/ scepen(en) van loeven(en) ter manissen smeyers gewijst was/ gheliefde den voirscr(even) henricke op des voirs(creven) aenlegg(er)s/ eysch en(de) teghen de scepen(en) brieve yet te allige(re)n dat/ hij dat doen mach ende dat hij metten setten vand(en)/ pe(n)ninghen ende den costen dair op gedaen van zijnder/ hachten soude wordden geslaect p(rese)ntib(us) o(mn)ib(us) scabinis/ in scampno februar(ii) xii