Item jan de labelain poirte(r) der stat van loven(en) in deen zijde ende/ oste kempene(re) momboir der armer van lillo vervangen(de) tot/ desen janne bodde zijnen medegeselle en(de) mede momboir in/ dande(re) die zeke(re) gescille tegen malcande(re)n hebben van zeke(re)n/ pachtelanden den vors(creven) armen toebehoe(re)nde die de vors(creven) poirte(r)/ gehouden heeft in pechtingen dair af e(n)nige goede mannen/ als getuygen bijden scepen(en) van lillo gehoert zijn Hebben over/ gegeven huers goets moetswillen datmen alle getuyghenisse/ in deser saken gehoert zijnde en(de) diemen aldair noch leiden/ sal willen in gescrifte setten sal en(de) bijden vors(creven) scepen(en) zegelen/ en(de) der wet alhier overgheve(n) bynnen drie weken naestcomen(de)/ om der mynster cost wille Ende zoe wes dan bijden voirscr(even)/ he(re)n van deser stat de saken en(de) questien overbracht en(de) v(er)staen/ tallen zijden uutgesproken en(de) voir recht get(er)mijneert sal worden/ dat hebben p(ar)tien geloft te houden en(de) volcomentlic te voldoene/ cor(am) berghe hoeven julii xxv