Item uut dien dat nade aflivicheit jouffruwe margrieten van meldert/ weduwe jonch(e)r willems wilen van montenake hee(re) te grasen en(de)/ te wilde(re) als hij leefde diverse p(ar)tien comen sijn bijden rechte vand(er)/ stat om aende haeflike goede acht(er) der selver jouffr(ouwe) m(ar)grieten/ gebleven te verhalen alsulken sculden als de selve jouffr(ouwe) m(ar)griete/ ten tijde van hue(re)r aflivicheit tacht(er) was zoe van scepen(en) brieven/ van eten en(de) drincken en(de) and(er)s also datmen beduchte datmen/ metten selven haefliken goeden niet verstringen en conste de/ vors(creven) sculden en(de) oic de exequien sepultue(re)n en(de) kercken rechten d(er)/ selver wilen jouffr(ouwe) m(ar)grieten soe is op heden bijden/ raide vand(er) stat overdragen en(de) getermijneert ten vervolghe/ van e(n)nigen vanden creditue(re)n der vors(creven) wilen jouffr(ouwe) m(ar)grieten/ datmen om te vervallen de vors(creven) exequien sepultue(re)n en(de) kerken/ rechte(n) ghelijc der haven acht(er) d(er) vors(creven) jouffr(ouwe) m(ar)gr(ieten) bleven/ oic vercopen sal de vliegen(de) erve die de vors(creven) jouffr(ouwe) achter/ liet en(de) die metten gesworen(en) scatters en(de) and(e)rs ten hoexsten/ bringen om vand(en) pe(n)ningen dair af comen(de) des vors(creven) is voldae(n)/ te worden Bij alsoe datment der vors(creven) jouffr(ouwe) erfgename(n) condige(n)/ sal om oft hen gelieft die vors(creven) vliegen(de) erve te lossen ende/ de vors(creven) lasten te dragen Act(um) in pleno (con)silio maii xxiiii