Item vanden gedinge dat geweest is inde banc voir meye(r) en(de)/ scepen(en) van loven(e) tusschen wille(m)me pierart als aenlegger ter/ eend(er) zijden en(de) pete(re)n goessens van oevelair ter ande(re) aldair/ de vors(creven) willem dede segghen in rechte hoe me dat hij [na dat] eene/ seke(r) coepmantscap geschiet wae(re) geweest ind(er) stat van/ bruessel van seke(re)n rechte en(de) actien des voirs(creven) peters goessen/ inden goeden die hen gesamend(er) hant verstorven wae(re)n het/ wae(re) leene oft ande(re) van janne wilen van haeght te goedsenhove(n)/ oft dair omtrent gelegen dair af zij in questien gestaen/ hadden in rechte te bruessel voir de stathouder en(de) manne(n)/ van leene m(ijns) gened(ichs) he(re)n in brabant teghen janne van/ haeght natuerlic Ende na dien dat zij de vors(creven) sake/ voir den vors(creven) stathouder en(de) mannen met rechte tegen/ den vors(creven) janne gewonnen hadden soe wae(re)n zij d(aer)na bij/ tusschenspreken van vrienden veraccordeert geweest in seke(re)n/ vuegen en(de) condicien die genoech doncker wae(re)n en(de) dair/ uut namaels gescille tusschen de voirs(creven) p(ar)tien hadden mogen/ rijsen om dwelc te schouwen de vors(creven) willem en(de) peter wed(er)/ o(m)me comen zijn en(de) hadden eene nyeuwe vorweerde/ aengegaen vanden gedeelte rechte oft actie die de vors(creven)/ peter hadde oft hebben mochte inde voirs(creven) goede en(de) dair/ wert gevorweert dat de vors(creven) willem gehouden zoude zijn/ en(de) tot zijne(n) laste te dragen den ryns guld(en) erflic die/ de selve pet(er) sculdich was en(de) dair die vors(creven) willem borge/ voir stont aende weduwe arnts wilen van kessele Desgelix/ dat de vors(creven) willem tot zijnen laste nemen en(de) draghen/ zoude alle alsulke costen als zij gesamend(er)hant gehadt/ hadden voir den stathouder en(de) mannen van brabant vors(creven)/ Welcke costen de vors(creven) willem groetsen zoude sympelic oft/ bij eede en(de) die tot zijnen laste nemen en(de) d(aer)af ontlasten/ den vors(creven) pete(re)n Ende dat de voirs(creven) vorweerden en(de) condicie(n)/ also geschiedde(n) en(de) toeghingen ind(er) manie(re)n voirs(creven) op dat/ henric pierart borghe bleve voir tvoldoen des voirs(creven) is/ dwelc de vors(creven) henric also dede doen ter tijt en(de) toeseide en(de)/ geloofde En(de) dat op tghene des vors(creven) steet de vors(creven) pet(e)r/ den vors(creven) willem(me) geloofde toeseide en(de) op hem nam goessen/ des vors(creven) peters brueder die oic schien recht te hebben/ / inde vors(creven) goede en(de) dat hij dat verantweerden zoude en(de) tot sijnen/ laste nemen en(de) dat hij den vors(creven) willem(me) int geheel leen en(de)/ goede also dat de selve peter ontfangen hadde vanden here van/ godsenhoven en(de) gorde van godsenhoven guedinghe en(de) vestich(eit)/ doen soude zoe wanneer de leenhere(n) die doen absent/ wae(re)n bij een zouden zijn Dese pointe en(de) meer and(er) in/ feyte liggen(de) p(rese)nteerde de vors(creven) willem te thoenen hopen(de)/ wair hij die gethoenen conste dat de vors(creven) peter gehoud(en)/ soude zijn guedinghe en(de) vesticheit te doen vanden rechte/ en(de) actie(n) die hij hadde inde goede voirs(creven) d(aer) questie om is/ nemen(de) op hem zijnen brued(er) als vors(creven) is Op dwelc de/ vors(creven) peter hem verantweerden(de) dede seggen dat wair was/ dat hij metten vors(creven) willem(me) eene coepmantscap aengegaen/ haddde van zijnen rechte oft actien die hij mocht hebben/ inde vors(creven) leengoede en(de) dat hij hem van dien guedinge/ en(de) vestich(eit) sculdich wae(re) te doen zoe verre de voirs(creven)/ willem hem opleide en(de) betaelde de so(m)me van hond(er)t/ ryns guld(en) die hij den vors(creven) pete(re)n voir zijn voirs(creven) recht/ toegeseeght en(de) gelooft hadde Welcke guedinge en(de) vestich(eit)/ hij altijt gep(rese)nteert hadde te doen en(de) noch d(aer) toe bereet was/ hopen(de) dair mede te gestaen ontkynnend(de) de na coepmantscap/ en(de) vorweerde Bieden(de) oic alle pointen in feyte liggen(de) te/ thoenen hoopen(de) wair hij die gethoenen conste dat de vors(creven)/ willem met zijnen versueke in desen verdoolt wae(re) Es/ gewijst bijden he(re)n scepen(en) van lov(en) ter manissen smeyers na/ dat peter goessens vors(creven) gehouden zijn sal willem(m)e/ pierart vors(creven) guedinge te doen vanden leengoeden/ dair questie af is en(de) te geloven inne te stane van/ zijns brued(er)s rechte in dien behalven dat hem de/ vors(creven) willem afdoen sal den r(yns) gul(den) erflic en(de) de costen/ vanden vervolghe nad(er) lester vorweerden p(rese)ntibus/ omnibus scabinis in scampno sept(embris) xviii