Cond zij allen dat jan van schore gehete(n) de droeghe in p(rese)ncia/ heeft genome(n) en(de) bekint dat hij genome(n) heeft jege(n) laureyse/ van wynge als man en(de) mo(m)boir jouffr(ouwe) anne(n) va(n) orsmale zij(n)re/ werdinne(n) thoff der selver jouffr(ouwe) mette(n) huyse(n) hove(n) wy(n)nen(de)/ lande bempde(n) eeussele(n) bossche(n) en(de) alle(n) ande(re)n toebehoirte(n) gelijc/ dat belege(n) is te torbisoul en(de) also olivier le roy dat voir/ en(de) na hem jan van floreff gehoude(n) heeft houden(de) xix/ boend(er) weder des goets meer is oft myn en(de) dat bij/(con)sente des voirs(creven) jans de floreff die d(air) noch ii jare/ aen hebben soude Te houde(n) te hebbe(n) en(de) te wy(n)ne(n) van/ halfm(er)te naestcomen(de) eene(n) t(er)mijn van xiiii jare(n) lang v(er)volgen(de)/ Met (con)dicie(n) oft de voirs(creven) jouffr(ouw) aflivich worde binne(n) middele(n)/ tijde dat dan de voirs(creven) wy(n)ne na hue(r) doot tgoet behoude(n)/ soude vi jae(r) lang na de(n) lantrechte en(de) niet lange(r) Elcx jaers/ darenbinne(n) elc boend(er) om x dosijne(n) corens goet en(de) payabel/ der mate(n) va(n) loeven(en) met wanne en(de) met vede(re)n wel/ bereyt tsinte andriesmisse ap(oste)ls te betale(n) en(de) te loeven(en) te(n)/ huyse des voirs(creven) laureys te leve(re)n alle jare de(n) voirs(creven) t(er)mij(n)/ dueren(de) quol(ibet) ass(ecutu)[m] It(em) sal de voirs(creven) wynne alle jare de(n)/ voirs(creven) t(er)mij(n) dueren(de) levere(n) int voirs(creven) hoff ii[c] walm(er)e om de/ huysinge d(air) mede te decken(e) en(de) alsme(n) die ald(air) v(er)dect oft/ anders dect oft plect van ouden wercke(n) dair af sal de voirs(creven)/ wynne de(n) wercliede(n) de(n) montcost gheve(n) en(de) de voirs(creven) laur(eys)/ de dachuere(n) betale(n) en(de) oft d(air) yet va(n) nuwe(n) wercke behoefde/ gewracht te werden d(air) af sal de wynne met zijne(n) wage(n) en(de)/ p(er)de(n) naerde(r) halen dairt he(m) de voirs(creven) laur(eys) bewise(n) sal hout/ steen leem teene(n) stroe en(de) des d(air) toe behoeve(n) sal moege(n) sond(er)/ voird(er) dair inne belast te wesen It(em) sal de voirs(creven) wynne de(n) voirs(creven)
//
laureyse te loeven(en) leve(re)n alle jare twee steen vlas van xii ponde(n)/ wel bereyt totter hekelen en(de) hij sal hem jaerlijcx houde(n) een/ vercken tot sinte lambrechts dage dat de voirs(creven) laureys he(m) cope(n)/ sal oft doen coepen omtrint vastelavonde It(em) de voirs(creven) wy(n)ne/ sal jaerlijcx betale(n) de(n) chijs va(n) de(n) huyse gedragen(de) omtrint xii(½)/ stuv(er)s sond(er) afslach en(de) d(air) toe alle(n) de(n) chijs uute(n) voirs(creven) goeden/ gaende also in tijts dat de voirs(creven) laur(eys) d(air) bij gheen schade en/ lijde en(de) dat in afslage va(n) des voirscr(even) steet It(em) hij sal de(n) voirs(creven)/ laur(eyse) de(n) voirs(creven) t(er)mijn dueren(de) alle jare inhalen zijn core(n)rinte(n) te wete(n)/ aen henri de mollebaix (½) mudde aen mathijs peron ix dosijne(n)/ aen lamb(er)t del vaul viii dosijne(n) aen henra gilchon ix dozijne(n)/ aen pirar le page de he(re)n va(n) viler iii m(ud)[de] aen de kijnde(re) henri/ noyens iii m(ud)[de] en(de) aen jan clarisse(n) (½) m(ud)[de] sond(er) cost des voirs(creven)/ laureys en(de) dat op cost des voirs(creven) laureys te loeven(en) leve(re)n It(em)/ sal de voirs(creven) wynne de(n) voirs(creven) t(er)mijn lang dueren(de) de voirs(creven)/ lande wynne(n) werve(n) en(de) mesten wel en(de) loflijc gelijc reengenote(n)/ bove(n) en(de) beneden also wel de verste als de naeste en(de) die late(n)/ tsijne(n) afscheyde(n) alsoe hij die vynden sal Te wete(n) de(n) wynter/aert houden(de) v boend(er) It(em) sal de voirs(creven) wynne de huysinge vanden/ voirs(creven) hove houden vand(er) under underster rijkelen ned(er)weert in/ goeden state It(em) is vorwerde dat de voirs(creven) wynne op tvoirs(creven) bosch niet/ meer rechts hebben en sal dan inde weye en(de) tscaerhout mach/ hij eens afhouwen tsijne(n) p(ro)ffite It(em) sal de voirs(creven) wynne alle tstroe/ vande(n) voirs(creven) goede(n) comen(de) jairlijcx bringe(n) int voirs(creven) hoff ende/ met zijne(n) beeste(n) ette(n) en(de) te meste maken en(de) dat mest vue(re)n/ op de voirs(creven) lande tslants meeste(n) p(ro)ffite It(em) waert dat dair/ e(n)nige boome v(er)droechde(n) die sal de wynne moege(n) uutrode(n) en(de)/ te hemwert neme(n) en(de) voir elke(n) sette(n) ii pote(n) vande(n) selve(n)/ aerde It(em) sal de voirs(creven) wynne tsijne(n) leste(n) jare bezayt late(n) viii/ boend(er) lants te wyntercoren d(air) af sal hij te hemw(er)ts behoude(n)/ de drie boend(er)e gelege(n) te poullonfosse sond(er) yet d(air) af te geve(n)/ en(de) dand(er) vijf boende(re) sal hij goet doen alsdan xvii m(ud)[de] corens/ mate(n) va(n) loeven(en) It(em) als de wynne tvoirs(creven) core(n) lev(er)t sal de voirs(creven)/ laur(eys) hem en(de) de zijne hue(re)n montcost gheve(n) In(de) su(n)t fideiuss(ores) rixo/ de raetshove(n) de hoxhe(m) flor(inus) alcus va(n) glymes joh(ann)es smet va(n)/ torrebaix le beghines en(de) henr(icus) moys van torrebaix s(ain)tron et p(rim)[(us)]/ oud(erogghe) maes ja(nuarii) xviii