It(em) een deylinghe en(de) scheidinghe gesciet en(de) gemaict sijnde tusscen/ jacoppen van muysen(en) ter eender zijden roelofve van deurne ende/ barbelen van muysen(en) zijnen wive suster des voirs(creven) jacops ter/ ande(re) vanden goeden en(de) pachten gebleve(n) nae d doot jacops wijlen/ van muysen(en) vader der vors(creven) jacops en(de) barbelen en(de) oic nae de/ doot jans wijlen schevel huers oems zoe verre hen die in deyling(en)/ gevallen sijn tegen aliten wijlen bachuys weduwe jans wijlen schevel/ des jonghen alst blijct in scepen(en) brieven van loeven(e) vander daet/ xiiii[c] lxxiiii nove(m)br(is) ix ende oic die hen/ toecomen ende versterven selen nae de doot yden moeder der vors(creven)/ kinde(re)n met wille en(de) (con)sente der selver moed(er) en(de) bij hue(re)n overstaene/ te deylen Sijn bleven en(de) gevallen den voirs(creven) jacoppe in/ zijnre deyling(en) die goede hier nae bescrev(en) Inden yerste(n) een huys/ en(de) hof metten toebehoirte(n) geleg(en) inde scrijnstrate dair de selve
//
jacop nu inne woent tussce(n) de goede der erfgename(n) bartelmeeus/ wijlen madea ende de goede des p(ri)oerscaps van bierbeke opden/ co(m)mer van vi l(i)b(ra) borsegelts xii stuv(er)s ende sesse saluyte(n) erffelijck/ It(em) een banc geleg(en) int vleeschuys te loeven(e) inden middelsten rey/ ten drake weert tussce(n) de banc der heylichs gheest van sinte/ g(er)trude(n) te loeven(e) en(de) de banc willems wijlen de naen op ts(er)togen/ chijs en(de) vive ponde(n) jairlix chijs borssegelts Item een vierdel/ wijngarts geleg(en) opten vogelsanc tusscen de goede jans lederbijl/ en(de) de goede jans werne(re) op een half tonne wijns ende den last/ van eender singender messen tsjaers op sinte sebastiaens outaer inder/ kercken van sinte peters te loeven(e) al ten gewoenlik(en) tiden ende t(er)mijne(n)/ te betalen Ende voirtmeer alle de goede voirs(creven) op sesse rinsche/ guld(en) te lx pl(a)c(ken) tstuc nu in borsen loepen(de) lijfpen(sien) ten live der voirs(creven)/ yden der moeder alle jae(re) deen helicht te kersmisse en(de) dander helicht/ sint jansmisse te betalen der selver yden alsoe lange als sij leven/ sal Sijn gebleven ende gevallen den voirs(creven) gehuyssce(n)/ in hue(r) deylinge die goede en(de) erffpachten h(ier) na volgen(de) Inden/ yersten twee huysen neve(n) een geleg(en) inde parijsstrate tussce(n) thuys/ geheete(n) de sterre en(de) eene(n) hof wout(er)s wijlen pauwels op twee/ rinsche guld(en) xiii st(uvers) en(de) twee sacken rocx erflic welke twee sacke(n)/ voermaels met pauwelse vyolen wive in huweliker vorweerd(en) wae(re)n/ gegeve(n) die versmolte(n) sijn oft nae de doot des vors(creven) pauwels/ versmelte(n) selen en(de) nochtan altoes den vors(creven) gehuyssce(n) roelofve en(de)/ zijne(n) wive alleene blive(n) Item twee sacken rocx erflic ts(in)t/ andriesmisse vallen(de) op drie dach(mael) lants jans oeden geleg(en) inde/ p(ro)chie van weve(r) tussce(n) de goede d(er) erfg(enamen) henr(ix) wile(n) va(n) pamele/[in ii zijde(n) de goede henr(ix) va(n) butscho(r)e op de derde en(de) de strate ald(air)] It(em) eenen sac rox erflic tsint andriesmisse vallen(de) opde goede der/ voirs(creven) aleite(n) in deyling(en) [gevallen] inde p(ro)chie van bincke(m) geleg(en) Item eene(n)/ beemt houden(de) drie boender oft dair omtri(n)t geleg(en) inde p(ro)chie va(n)/ byncke(m) ter plaetsen geheete(n) te kinderrode tusscen de goede jans cokart/ ende den goede(n) goessens berwouts opde(n) co(m)mer van/ xxiii d(enieren) grontchijs dair uut gaen(de) Item een boend(er) bosch geleg(en)
//
te bincke(m) voirs(creven) opde(n) zauwenberch op twee vate even(en)/ It(em) een half boender bosch geleg(en) opte(n) arts berch tusscen/ den goeden he(re)n lodewijcs pynnoc ridders in twee zijden/ opde weerde van ii(½) st(uvers) in alrehanden chijse Item een/ huys ende hof met xvi roeden wijngarts geleg(en) inde wijng(ar)t/ strate tusscen den goeden der erfgename(n) jans wijlen roesart/ en(de) de goede henrix vand(en) rijne op een pl(a)c en(de) een zister/ rox en(de) op de(n) last van eend(er) singender messen te doene alle/ jae(re) op sint andriesmis dach opte(n) outaer van sinte adriane/ inder kercken van sinte pet(er)s te loeven(e) Ende voirtmeer op/ elf rinsche guld(en) ten prise van lx pl(a)c(ken) tstuc lijfpen(sien) ten live/ der voirs(creven) yden der moeder Te weten de v r(insche) g(ulden) de vors(creven)/ xi rinsche gul(den) voir de vors(creven) drie boend(er) beemts en(de) de/ vi r(insche) gul(den) voir de ande(r) goede voirs(creven) vallende jairlix deen/ helicht te kersmisse en(de) dander helicht sint jansmisse soe/ lange de selve yde leve(n) sal ende nyet lange(r) hanc quoq(ue)/ et sat(is) alta(re) alt(er)i p(rout) Ende es in erfvorweerde(n) ende/ anders tussce(n) de voirs(creven) p(ar)tien ondersproken dat gheen vanden/ voirs(creven) brueder ende suster met hue(re)n man die voirs(creven) lijftocht/ aende voirs(creven) moeder gheenssins en sal mog(en) quite(n) noch/ afleggen te gheene(n) tide in al noch in deele sonder openbair/(con)sent beide der kinde(ren) Desgelix vand(er) twee rinsche guld(en)/ erflic diemen van jacops svaders tide jairlix sculdich es/ jorise de hont dair voe(r) borghe staan peter vander hoeven/ ende claes bone hebben de voirs(creven) brueder en(de) gehuysscen malcande(re)n/ gelooft ende toegeseecht dat elc sijn helicht dair af dragen/ sal ende elc den ande(re)n vand(er) helicht ontlaste(n) costeloes ende/ schadeloes Ende desgelix wairt dat de voirs(creven) aleit oft ande(r)/ nae hue(r) e(n)nigen vand(en) voirs(creven) brueder oft sust(er) vand(en) voirscr(even)
//
goeden oft rente(n) yet af wonne met rechte oft dat e(n)nighen van/ hen oft hen beyden ten ocsuyne van dien goeden e(n)nig(en) cost last/oft schede aengedaen wordden die jan wijlen schevel ende zij/ samentlijc besaten in geheelen stoele e(n)nigen cost last oft schade/ aengedaen wordde soe es in erfworweerden oic ondersproken dat/ zij malcande(re)n oic ter hant (dair) af staen selen en(de) half en(de) half tverlies/ en(de) de schade dragen cor(am) couck(eroul) ouderogge octobr(is) xi