It(em) willem vander loe van mechlen in p(rese)ncien van scepen(en)/ van loeven(en) ghestaen heeft bij zijnder rechter wetenth(eiden)/ ende onbedwonghen ghekint ende ghelijdt ope(n)baerlijc/ dat hij gheen recht sacht actie noch toeseggen en heeft/ in gheend(er) manie(re)n in gheenen goeden noch renten/ erflijc noch te live noch oic in gheenen goeden die te/ loeven(en) vliegenderve moegen heeten die roelof roelofs/ vercrege(n) geworve(n) oft ghecocht mach hebben zeder/ de doot van des voirs(creven) roelofs yerste wive die swege(re)/ was vand(en) voirs(creven) willem(me) vand(er) loe Van wat natue(re)n/ die onberuerlike goede oft rinten erflijc oft te live sijn/ moege(n) oft tot wiens live die staen moege(n) oft te/ wat plaetsen zij gelege(n) oft besedt moege(n) zijn oft onder/ wat hove oft gherichte die sorte(re)n leene eyghen oft/ erve Uutgenomen de goede ende rinte(n) erflijc oft te/ live die de voirs(creven) roelof den voirs(creven) willem(me) voirtijts/ met scepen(en) brieve(n) van loeven(en) overgegeve(n) heeft in/ al oft in deele ende soe verre de selve willem vanden/ selven roelove des heeft scepen(en) brieve oft transporte De/ welcke de voirs(creven) roelof wilt dat den selven willem(me) vast/ seker ende ongehindert bliven Bekinnen(de) de selve/ willem dat hij in gheen vanden goeden rinten oft/ vliegenderve yerst voirs(creven) die de voirs(creven) roelof tot desen/ daghe vercrege(n) mach hebben oft tot hem zijn gecome(n)/ oft die hij voirtaen ghecrigen sal moege(n) oft voirtaen/ tot hem sullen moeghen comen gheen recht deel actie/ noch toesegge(n) en heeft ende oft hij e(n)nich dair toe hadde/ dat hij dair af met allen ende geheelijc nu ende oic/ voe(r) den toecomen(de) tijt heeft gerenu(n)cieert ende verteghen/ renu(n)cieert ende vertijdt inder bester en(de) sekerster manie(re)n/ hij dat soude moeghen doen Ghelovende den selven/ roelofve van gheenen vand(en) voirs(creven) goeden oft rinten/ behalven der exceptie(n) boven gescreve(n) van nu voirtaen/ ne(m)mermeer aen te spreken in gheene(n) rechte gheestelijck/ noch weerlijck bij hem selven noch bij nieman(de) anders
//
van zijnen weghen in gheend(er) wijs Mair van des(er) kinness(en)/ en(de) quitan(cien) den selven roelofve ende zijne(n) nacomelinghe(n)/ tegen eene(n) yegelijken recht warant te zijne ende te bliven/ Ende oic op roelofs cost den selven roelofve hier af voirder/ vestich(eit) met hande en(de) monde te doen(e) voir alle hove/ ende gherichte daer dat behoeve(n) mochte tallen tiden als/ hij des van den selve(n) roelofve oft den zijne(n) versocht sal/ werde(n) Behalven alle voe(r)tractate tusschen de voirs(creven) p(ar)tie(n)/ gemaect in hue(re)r macht en(de) weerde(n) te bliven Hier wae(re)n/ over roelants roelofs aug(usti) xiii