Vander questien uutstaen(de) voir den raide alhier tusschen willem(me) lobbe/ als procur(eur) jans diericx zijns oems ter eender en(de) ja(n)ne lambrechts ter/ ande(r) zijden van seke(re)n vo(n)nissen tot b(er)them gewesen gehaelt aende/ hee(re)n scepen(en) van uccle dair van de selve willem inden name als bove(n)/ begheerde gelijc hij op ande(re)n goeden gedaen hadde want hij tot b(er)them/ bij faulten van justicien tot egheenen ynde oft execucien geraken en/ conste dat hem die bij ja(n)ne lambrechts voldaen souden werden welke/ vo(n)nissen hij tot meer stonden aldair hadde doen bliken hopen(de) nae/ de voirhandelinge die dair van geweest wa(r)e voe(r) den raide alhier/ dat jan lambrechts die dair voir oogen was toe bedwongen soude werden/ de selve vo(n)nissen te voldoen(e) aengesien te voirde(r) want hij hem op/ ande(re)n tijden oic v(er)meten hadde te bringen(e) certificacie vand(en) hee(re)n van/ uccle als dat de sake tusschen hen noch uutstaen(de) alhier gere(n)voyeert/ wa(r)e bij den hee(re)n van uccle voirs(creven) mits der faulten va(n) justicien voirs(creven) en(de)/ der litispenden(cien) alhier wesen(de) tot welken daghe jan lambrechts niet en/ co(m)pareerde en(de) want hij alsdoen niet en co(m)pareerde alhier dair zij
//
in rechte stonden vander selver saken soe hoepte willem lobbe dat/ jan versteken soude zijn nae de diligen(cie) die de selve willem gedaen/ hadde bijden hee(re)n van uccle en(de) oick nae der ontschout die de clerck/ der hee(re)n van uccle alhier der stadt gescreven heeft dair van de/ selve willem lobbe eene(n) brief dede blijken co(n)clude(re)nde als boven/ dair tegen jan lambrechts dede seggen bij zijne(n) sone willem(me)/ lambrechts als dat hij altijt ten selven tijde alhier co(m)pareerde/ en(de) hem niet geapsenteert en hadde ten selven tijde mair seyt als/ dat gebreck in ja(n)ne diericx oft zijne(n) procur(eur) hadde geweest want/ zij ten selven dage niet voldaen en hadden want alnoch oec niet/ en bleke bij certificacien der hee(re)n van uccle als dat de sake vand(en)/ selven gewijsden vo(n)nisse alhier gere(n)voyeert wa(r)e seggen(de) datmen dat/ oick niet bevi(n)den en soude en(de) concludeerde mits desen als dat willem/ lobbe inden name als boven alhier verdoolt wa(r)e gemerct dat gebreck/ in he(m) hadde geweest en(de) dat zijn vader sculdich soude zijn hiervan/ gere(n)voyeert te wordden(e) tot b(er)them aldair de vo(n)nissen geslagen/ wa(r)en om aldair rechts te plegen es get(er)mineert en(de) geappointeert/ bijden raide p(ar)tien int lange gehoirt zijnde nae vele diverse reden(en)/ bij p(ar)tien int lange v(er)haelt wesen(de) dat jan lambrechts niet vermert/ en es en(de) gelieft willem(me) lobbe inden name als boven alnoch/ eene(n) uuterliken dach te nemen(e) om te doen blijken des hij hem/ op ande(re)n tijden v(er)meten heeft gelijc voirs(creven) steet dat hij dat doen mach/ nae donschout die de hee(re)n van uccle dair van gescreven hebben/ den raide alhier om alsdan geappointeert te werden(e) soe behoiren/ sal in (con)silio opidi octobr(is) xii