Vander questien die voir den raide vander stadt comen es tusschen wout(er)/ vander aa poirte(r) te loeven(en) ter eender en(de) b(er)telmeeuse ghijsen den jongen/ inden name en(de) van wegen dier van bercheycke ter ande(re) uut saken/ van seke(re)n pendingen van ossen die nu ten lesten male ten versuecke/ vanden bedesetters en(de) gemeyn gebue(re)n van bercheycke voirs(creven) den voirs(creven)/ woute(re)n poirte(r) afgepant wae(re)n voir bede die zij hem eysschende/ wae(re)n alsoe de selve bertelmeeus seyde welke ossen de selve/ woute(r) als poirte(r) hadde doe(n) uutscrive(n) metter stad v(er)suecbrieve(n) to(n)rechte alsoe de/ voirs(creven) b(er)telmeeus inden name vanden voirs(creven) va(n) bercheycke hielt te/ voirde(r) want hijs hem gedroech totter instructie(n) opde bede gemaect int jaer/ van eene(n)vijftich dat de ky(n)nisse der beden aengaen(de) als q(ue)stie gebuert/ tusschen bedesetters en(de) ande(re) singulere p(er)sone gheen ingeseten(en)/ vanden ho steden zijnde behoirt der hootstad dair onder alsulken goede/ gelegen zijn dair af men die bede eyscht en(de) want dan de voirs(creven) poirte(r)/ woenachtich wae(re) te bercheycke voirs(creven) en(de) zijn goede d(air)af zij die bede/ eysschen gelegen waren ter selver plaetsen dwelck was onder de stadt/ van sh(er)toge(n)bossche als onder de naeste hootstadt soe versocht hij en(de)/ sustineerde inden name als voe(r) dat die ky(n)nisse aldair behoirde en(de)/ begheerde oick dat de he(r)en alhier visiteerden den brief die die/ van tsh(er)toge(n)bossche aen de stadt dier materien aengaen(de) hadden/ gesonden dair tegen de voirs(creven) wouter seyde dat vand(en) beden d(air)voe(r)/ die pendingen mochten zijn geschiet hij zijn deel en(de) quote hadde/ deughdelijc betaelt en(de) en was dairaf niet sculdich soe hoepte/ hij al mochten ande(re) lasten opgestelt zijn oft costen gebuert bij gebreke/ va(n) betalingen der beden dat dat niet en was bij gebreke va(n) zijnder/ betalingen en(de) alsoe en ghinc principalijc desen eysch op hem gedaen/ niet aen der selver betalingen der beden wair bij dinstructie voirs(creven)/ hier toe niet en dede noch die sake en(de) kynnesse van desen elder en behoirde/ oic soe en thoende de voirs(creven) b(er)telmeeus gheen wettige p(ro)cu(r)acie/ oft macht bijden welken hij inden name vand(en) voirs(creven) va(n) bercheycke/ dit hadde te versueken dair tegen de selve b(er)telmeeus allige(re)nde/ dede seggen dat bij hem inden name vand(en) voirs(creven) va(n) bercheycke/ bracht was den voirs(creven) brief vanden bossche wair bij het genoech/ bleec dat hij last hadde vanden selve(n) oic soude hij ofts behoeft/ wel nairde(r) bescheyt thoenen mair want hij niet entendeerde/ dan totten re(n)voye van desen ter plaetsen dair de ky(n)nisse van/ dien nae de instructien behoirt soe en behoefde hij dair toe niet/ vele p(ro)cu(r)acien te thoenen en(de) alst dat wouter betaelt soude
//
hebben zijn quote van dier bede dair op seyde b(er)telmeeus dat dat/ wel zijn mochte mair want met zijnder en(de) vele meer ander liede/ quote die doen betalen mochten en was dair gheen ghereetscap/ om volle betalinge te geschieden(e) en(de) alsoe gebuerden d(air)o(m)me sware/ costen en(de) eer de volbetalinge vand(en) beden conste gebue(re)n quam/ sulken swaren last van soudyen aldair int lant va(n) geldre haestelijc/ en(de) nootelijc te synden(e) dat bij gemeynen verdragen om meer perikels/ noots en(de) lasten te schouwen die soudye genomen wart aen de voirs(creven)/ inne gehaven pe(n)ni(n)ge alsoe dat dair o(m)me opde voirs(creven) bede d(air)af hem/ nyema(n)t aldair en weygerde poirte(r) noch ande(re) al wae(re)n d(air)vele/ meer poirters van loeven(en) dan wouter die onlanx de vrijheyt/ ae(n)genomen hadde een nyeuwe settinge hadde moete(n) gebue(re)n/ dair van he(m) de selve wouter oick billix niet en soude bevrijden/ want dit der beden en(de) des dair aen cleeft aenghinck niet/ myn dat ghinck der p(ri)ncipaelder questien ane die soe hij/ hoopte alhier niet en behoirde en(de) tendeerde alsoe tot zijnder co(n)clusien/ soe v(er)re dat nae altricacie va(n) p(ar)tien en(de) aengehoirt de/ instructie vander beden vand(en) voirs(creven) jae(re) bi bijden raide vand(er)/ stad uutgesproken wairt dat zij die sake en(de) p(ar)tien stelden/ van hen t(er) plaetsen dair die behoirde act(um) in co(n)silio opidi p(rese)ntib(us)/ ambob(us) burg(imagistro) et plu(r)ib(us) aliis de (con)silio julii xxi