Want joh(ann)es heyms als geleyt nae deser stadt recht voir zijn/ wettich gebreck uut crachte van scepen(en) brieve(n) van loeven(e) tot allen/ den goeden beyde have en(de) erve jans de raet matheeus de raet/ en(de) gheerts van duerne soe wair die gelegen zijn hem met oepen(e)/ brieven van deser stadt gescreven aen alle officie(re)n alle de selve goede/ heeft doen leve(re)n en(de) den selve(n) p(er)sone(n) dach va(n) rechte alhier te/ co(m)pare(re)n oft zij tegen de voirs(creven) leveri(n)ge yet hadden willen allige(re)n/ oft de voirs(creven) scepen(en) brieve impugne(re)n Tot welken daghe noch oick/ op heden als ten verstreken(en) dage va(n) rechte de voirs(creven) p(er)sonen noch/ niema(n)t van hue(re)n wegen geco(m)pareert en zijn den voirs(creven) geleydden altijt co(m)pare(re)nde en(de) trecht voirt versueken(de) soe v(er)re dat scepen(en) van/ loeven(e) ter manissen smeyers nae dat hen behoirlijc heeft gebleken/ bij resc(ri)pte jans van laethem meyers tot halen de leveri(n)ge vand(en)/ goeden matheeus de raet bij hem geschiet te zijne en(de) den selven/ matheeuse dach beteekent te zijne en(de) bij resc(ri)pte henr(ix) vand(er)/ gheeten meyers tot lu(m)pnen en(de) linthout de leveri(n)ge bij hem geschiet/ te zijne vand(en) goeden gheerts va(n) doerne en(de) hem dach beteekent/ te zijne gewesen hebben voir een vo(n)nisse datmen den voirs(creven) geleydden/ vand(en) voirs(creven) goeden houden soude inde macht va(n) zijne(n) beleyde en(de) leve/ ri(n)gen voirs(creven) alsoe v(er)re alst noch voir scepen(en) comen es in sca(m)pno p(rese)ntib[(us)]/ scab(inis) aug(usti) xx