Nae dien en(n)ige vanden vrinden jans van berthem roelofs sone/ gevange(n) sitten(de) in boeyen van yse(re) trecht v(er)socht hebben als/ dat de selve jan ontslagen mocht wordden op caucie en(de)/ borchtocht oft dat hem ticht en(de) aensprake gegeve(n) wordde vand(en)/ saken en(de) reden(en) sijnd(er) hachtinge(n) Soe sijn gecome(n) bijden raide/ vander stadt her lodewijck pynnock ridde(re) meye(r) van loven(en)/ vand(er) heerlich(eyt) wegen t(er) eende(r) en(de) de voirs(creven) jan van berthem met/ e(n)nigen van sijne(n) maghen en(de) vrinden t(er) ander sijde(n) Aldair de voirs(creven)/ meye(r) opdede hoe dat de selve jan voirmaels seke(re) remissie/ hadde verworve(n) t(er) and(er) plecken en(de) anders dan dat va(n) oudts/ en(de) nae den ouden ond(er)houden(e) en(de) costume(n) gewoenlijck hadde/ geweest in cont(ra)rien vand(er) officien sijnd(er) meyerien sond(er) de/ welcke die oft dier gelijke voirmaels noeyt meer en wae(re)n/ gesien en(de) alsoe in cleynich(eyt) van des(er) stadt nyet te myn dat/ soude hem selve(n) vynden alst sijne(n) tijt geve(n) soude en(de) hij en/ woude te desen male dair op sijn (con)clusie nyet maken En(de)/ aldus om te comen(en) tot ghene d(air) o(m)me hij den selve(n) ja(n)ne/ alsnu hadde doen hachte(n) was wair hoe de selve jan/ onlancx leden was gecome(n) van buyte(n) ongeroepe(n) te raide/ inden buyten raide en(de) den buyten raid gesceyden sijnde was/ de voirs(creven) jan come(n) inden huyse anthonijs zedeleers d(air) men/ wijn vercocht en(de) hadde ald(air) openbairlijck geseecht als men/ vraechde hoe dat qua(m) dat men mijne(n) hee(re) den meye(r) niet/ en hadde willen hebben tot capitayne wat soude men/ den meye(r) tot eene(n) capiteyn kiesen die sijn goet gevlucht/ hadde uut(er) stadt t(er) horst en(de) dair men tsijne(n) huys hier/ bynne(n) niet dan stoelen en(de) bancken vynden en soude soe/ men dat seyde en(de) ten ande(re)n male hoe hij ald(air) ind(er)/ selv(er) tav(er)nen oick geseecht hadde dat men seyde datt(er)/ brieve(n) vand(er) stadt wegen gescr(even) wae(re)n aen die va(n) name(n)/ rue(re)nde dat men den peys die gemaict was nyet houden/ en soude en(de) dat van dien brieve mair vijff p(er)sone(n)/ vanden raide te spreken en wisten en(de) de clerck(en) dien/ gescreve(n) hadde die hij wel noeme(n) soude en(de) dat hij/ dese woirde hadde hoire(n) segge(n) en(de) noch meer ande(re) die/ hij wel segge(n) soude woude hij welke woirde ald(us)/ bijden selve(n) janne gesproken en(de) geseecht de selve meye(r) oft
//
jan die ontkynne(n) woude p(rese)nteerde te thoene(n) hopen(de) oft hij dat/ conste gedoen dat hem de selve jan noeme(n) soude sijn segg(er)s/ en(de) de woirde die hij alsoe meer hadde hoire(n) segge(n) om d(air)aff/ te gescieden des recht wesen soude oft dat de selve jan/ de selve man sijn soude en(de) hem come(n) t(er) scharp(er) exami(n)acien/ om van hem in dien naird(er) bescheyt te weten te voirde(r)/ want hij hielt in dese woirde geco(m)mitteert te wesen/ crimen sedicii niet bet(er) dan crime(n) lese maiestat(is) en(de) om/ op hem te verne(re)n tvolck en(de) (com)motie beruerte en(de) muyterie/ te maken met meer woirden bij hem geallig(er)t bij den welke(n)/ hij tendeerde tot sijnd(er) (con)clusien te voirde(r) want hij noeyt/ en hadde gedacht noch gepeyst te vluchte(n) soe vele als de/ weerde van eene(n) lepel des hij hem gedroech tott(er) visitacie(n)/ van sijne(n) huyse t(er) horst v(er)sueken(de) dat de stadt t(er) stont/ hue(re) gedeput(er)de dair woude gaen synden hij soudt hen/ al doen opdoen en(de) welke woirde aldus op hem geseecht/ grootelijck gedroege(n) tot sijnd(er) onee(re)n schaemte(n) cleynich(eyt) en(de)/ perijkele sijns lijfs en(de) goets en(de) oic vande(n) ghene(n) vande(n)/ vijff p(er)sone(n) en(de) secretar(is) mette(n) voirs(creven) brieve belast versueken(de)/ oick dat de voirs(creven) roeloff jans vad(er) wethoude(re) wesen(de)/ dair te rechte niet sitte(n) en soude dair men spreken soude/ in dese sijns soens sake vande(n) welke(n) de v roelof/ de (con)trarie sustine(re)nde hem des gedroech totte(n) rechte Op/ dwelck de selve roeloff bij ond(er)wijsen vanden raide/ sond(er) appointeme(n)t hem guetlijck verdroech dair bij als/ richte(r) te come(n) oft opinie d(air) inne te geve(n) int p(ri)ncipael/ Op welke aensprake en(de) ticht de voirs(creven) jan dach van/ berade nam tot des donderdaichs d(air) nae en(de) ten dage/ d(air) toe dienen(de) declineerde de selve jan vande(n) gerichte/ en(de) en meynde d(air) niet te antweerde(n) mair dat hem aen/ sprake gebue(re)n en(de) ticht gegeve(n) wordden soude inde/ banck voir meye(r) en(de) sinte pet(er)sma(n)nen van loven(en) gem(er)ct/ dat hij selve sinte pet(er)sman wae(re) en(de) ticht [trecht] als sinte pet(er)s/ man selve hadde hulpen vue(re)n en(de) vo(n)nisse hulpen wijse(n)/ en(de) delibere(re)n en(de) eedt dair toe gedaen hadde des hij/ hem gedroech tott(er) wairh(eyt) dair tegen de meye(r) replice(re)nde/ hoopte want hij trecht dair hadde doen v(er)sueken en(de)/ daensprake gehoirt en(de) verwacht hadde en(de) dach van
//
verantweerden genome(n) hadde en(de) dat meer men niet bevi(n)de(n)/ en soude dat hij als sinte pet(er)sman eedt gedaen hadde hoe/ wel ja(n)ne dat geliefde te seggen(en) dat de selve jan d(air)/ antweerde(n) en(de) trecht voirt verwachte(n) soude hem des gedragen(e)/ totte(n) rechte en(de) dat de voirs(creven) roeloff oick sculdich wae(re) op/ dat incident vande(n) renvoye hem te v(er)trecken d(air)aff roelof/ de (contra)rie sustineerde en(de) hem des gedroech totte(n) rechte en(de) den/ ouden ond(er)houden(en) in dien es geappointeert aengaen(de) den incide(n)te/ van roelove dat de selve roeloff hem in des(er) saken sijne(n) sone/ aengaen(de) sculdich soude sijn te v(er)trecken sond(er) dair inne als richte(r)/ te sitten(e) mair geliefde hem sijne(n) sone raid te assiste(re)n dat/ hij dat doen mochte en(de) tprincipael aengaen(de) d(er) declinatorie(n)/ hielden de selve wethoud(er)s te henweerts totte(n) naiste(n) dage/ tot welken naisten dage mits siecten en(de) o(n)mechtich(eyt) van m(ijn)/ hee(re) den meye(r) en(de) oick absen(cie) van sijne(n) lieuxten(ant) de materie/ gecontinueert wert tot op in maendaige xix augusti/ lestlede(n) ald(air) alsdoen ind(er) selv(er) saken bijde(n) voirs(creven) raide in dien/ geappointeert es geweest gelieft den meye(r) den voirs(creven) ja(n)ne/ aen te spreken met rechte dat hij dat doen inden banc voir/ meye(r) en(de) sinte pet(er)s ma(n)nen van loven(en) Actu(m) in (con)silio opidi/ opde(n) voirs(creven) xix dach augusti