Vand(er) questien gecomen bijden raide vand(er) stadt tusschen/ lijsbette(n) hacken t(er) eenre en(de) laur(eyse) le pollyn borduerwercke(r)/ t(er) ande(re) Als van zeke(re)n geleenden pe(n)ningen die deselve lijsbeth/ hem geleent hadde staen(de) bescreve(n) op eene cedulle bijd(en) voirs(creven)/ laureyse in rechte geexhibeert met gad(er)s eend(er) schalen wegen(de)/ sesse onchen i(½) ingelsche(n) d(air)af zij begeerde vande(n) selve(n) v(er)nueght/ te sijne loepen(de) deselve geleende pe(n)ninge(n) tussche(n) sesse en(de)/ seve(n) rinsgulden(en) soe in lichte(n) soe in zwae(re)n gelde inde/ selve cedulle begrepe(n) dair tege(n) de voirs(creven) laur(eys) seydt dat/ zij hem die pe(n)ninge(n) gedaen hadde op vuege en(de) manie(r)/ dat hij huer bekenne(n) soude een rinte van drie rinsguld(en)/ lijfpen(sien) seggen(de) in alsoe verre zij bereet wa(r)e tsurplus op te/ leggen(e) hij woude huer behoirlike vestich(eit) doen ind(er) maten/ hij huer die gep(rese)nteert hadde te weten(e) van zijne(n) vader en(de)/ janne vande(n) steene beyde woenen(de) te thiene(n) p(rese)nte(re)nde oick/ tselve te thoene(n) met eene(n) ma(n)ne en(de) eend(er) vrouwe(n) in gevalle/ sij he(m) dat ontki(n)nen woude en(de) d(air)mede te vrede(n) wa(r)e oft/ deylde huer dairaf den eedt dwelck de voirs(creven) lijsbeth/ ontkinde bege(re)nde als vo(r)e de voirs(creven) pe(n)ninge(n) en(de) oick de/ schale Es geappointeert bijd(er) wet voirs(creven) bij mi(n)lik(er) uutsprak(en)/ bij ov(er)geven(en) van p(ar)tien zond(er) rigue(r) van rechte om alle/ riguer en(de) eede te scouwen dat de voirs(creven) laureys bynne(n)/ drie weken naistcomen(de) vestich(eit) doen sal der voirs(creven) lijsbette(n)/ vand(en) voirs(creven) p(er)soenen oft ande(re)n goet genoech sijnde van/ eene(n) rinsscheguld(en) lijfpen(sien) den pe(n)ninck thiene te twee live(n)/ en(de) huer dair van om dat te volbringen(e) alsnu pant/ geve(n) dien hij alsd(an) wed(er) ontfange(n) sal hem opleggen(de)/ te vastelavonde d(air)nae sgheens desmen bevi(n)den sal dat/ de geleende pe(n)ni(n)gen bij lijsbette(n) geeyscht en(de) ind(er) cedulle(n)/ begrepen dlicht gelt te zwae(re)n geslagen en(de) tgelt d(air)mede/ zij de schale huer toebehoi(r)ende quite(n) sal min soude moege(n)/ dragen dan thien rinsguld(en) eens ghelt alsnu cours/ hebbende In cons(ili)[o] opidi nove(m)br(is) x