Want arnt van ned(er)hem als gheleydt nae/ des(er) stadt recht voir sijn wettich gebreck/ uut crachte van scepen(en) brieve(n) van loven(en) tot/ allen den goede(n) beyde have en(de) erve jans/ wile(n) meys soe wair die gelege(n) sijn hem met
//
brieve(n) va(n) des(er) stadt gescreve(n) aenden meye(r) van/ cumptich oft zijne(n) stadhoude(r) te vertrijcke/ alle deselve goede behoirlijck heeft doen leve(re)n/ en(de) larijse borts en(de) pauwelse meys als erfge/ namen des voirs(creven) jans wijle(n) meys dach/ van rechte te compareren inde banck voir/ meye(r) ende scepenen van loven(en) doen besceyd(en)/ oft zij hen dair teghen hadden willen/ opponeren Aldair zij op heden als ten/ verstreken(en) daighe nyet gecompareert/ en zijn noch procuroer van hue(re)n wegen/ hem dair teghen opponerende den voirs(creven)/ geleydden altijt comparerende en(de) trecht/ voirt versuekende Soe hebben scepen(en)/ van loven(en) ter manissen smeyers na dat/ hen bij rescripte mychiels der kinde(re)n als/ stadhoude(r) smeyers van cu(m)ptich behoirlijck/ gebleken heeft de voirs(creven) leveringhe/ ende dach besceydinghe geschiet te/ zijne gewesen voir een vonnesse wair/ de wederpartie des voirscreven(en) ge/ leydden nyet en compareert ten opstaen(e)/ smeyers ende der scepenen datmen/ den selven geleydden houden soude/ inde macht van sijnen beleyde scepen(en)/ brieven ende leveringhen alsoe verre/ alst noch voir scepen(en) comen es In scampno/ augusti xvii