Item brued(er) gheert de feyte(re) medebrued(er) des godshuys/ van ons(er) liev(er) vrouwen van gruene(n)dale bij bruessele/ canonicke(n) regulie(re)n der orden(en) s(in)t augustijns ind(en)/ busdo(m)me van cam(er)rijck hebbende en(de) thoende(n)de sp(eci)ale/ en(de) besunderde p(ro)cu(r)atie vand(en) selve(n) godshuyse te ov(er)come(n)/ ende te doene soe hem dat goetdochte in des naebescreve(n)/ steet t(er) eenre ende jan drabbe t(er) ande(re) Sijn come(n) voir/ scepen(en) van loven(en) hier nae bescreve(n) ende hebben gekint/ ende gelijdt de voirs(creven) brued(er) gheert inden name vanden/ voirs(creven) godshuyse ende de voirs(creven) jan voir hem en(de) sijne(n) erve(n)/ en(de) nacomelinge(n) dat zij met malcande(re)n v(er)accordeert/ ov(er)come(n) ende eensworden sijn aengaen(de) den twee/ ende een halff mudden rocx maten van loven(en)/ erfpachts ts(in)te andriesmesse apostels te betalen(e)/ en(de) te loeven(en) te leve(re)n die de voirs(creven) jan drabbe
//
met scepen(en) brieve(n) van loven(en) als erfgename jans/ wijle(n) van hulslair vand(er) daet xiiii[c] xxvi decembr(is)/ sede(r) heeft ende besidt op thoff geheete(n) kerstiaens/ hoff jans wijle(n) snoeck in woeni(n)gen huysen hove(n)/ wynnen(de) lande(n) beemde(n) eeussele(n) wijng(ar)den bossche(n)/ en(de) allen den toebehoirte(n) inde p(ro)chie van leefdale/ gelegen Welke goede tvoirs(creven) godshuys voir zeke(re)n/ erfpacht v(er)volght en(de) uutgewonne(n) heeft d(er) poente(n)/ conditien en(de) vorweerden hier nae bescreve(n) die de/ voirs(creven) p(ar)tien de voirs(creven) brued(er) gheert ind(en) name/ vand(en) voirs(creven) godshuyse en(de) uut crachte vand(en) voirs(creven)/ besunderd(en) p(ro)cu(r)atien die hij den voirs(creven) ja(n)ne ov(er)geg(even)/ en(de) ond(er)gelate(n) heeft Ende de voirs(creven) jan voir hem/ ende zijne(n) nacomelinge(n) malcande(re)n tot eeuwige(n) dage(n)/ geloeft hebbe(n) tond(er)houden tacht(er)volgen(e) te voldoene/ ende deen dande(r) d(aer)aff inne te staene ende garant/ te sijne tege(n) eene(n) yegelijcken Ende inden yerste(n) dat/ tvoirs(creven) godshuys van nu voirtaene den selve(n) ja(n)ne/ ende zijne(n) nacomelinge(n) oft actie hieraff hebben(de)/ de(n) selve(n) erfpacht uutreycken en(de) betale(n) sal vande(n)/ selve(n) goede(n) oft dien d(aer)aen ombeledt he(m) laten/ volge(n) ende verhalen met sijne(n) scepen(en) brieve(n) van/ loeven(en) sond(er) questie calangie oft enige (con)tradictie/ oft wed(er)seggen [va(n) e(n)nige(n)] Ende des heeft deselve jan gecon/ senteert voir hem zijne(n) erven ende nacomelinge(n)/ dat tselve godshuys den selve(n) erfpacht van twee/ ende een half mudden corens sal moege(n) quijte(n)/ ende afleggen alst den selve(n) godshuyse gelieft/ tot eene(n) male met alsulken so(m)men van pe(n)ni(n)g(en)/ alsmen gelijcke core(n)rinten bynnen des(er) stadt/ ende vrijheyt van loven(en) bevesticht van gelijcker/ ordde(r) nae de statuyten ende ordinantien/ dairop bijder selver stadt gemaict anno/ xliii ende onderhouden lossen ende afquijte(n)/ mach ende met vollen pachte cor(am) berghe/ vynck octobr(is) xxiiii