Want goirdt vand(en) berghe nu ter tijt scepen(e) va(n) loven(en)/ die als erfgename jouffr(ouwe) g(er)truyden wijlen van hondsberghe/ met scepen(en) brieve(n) van loeven(en) van deyli(n)gen houdende/ ende heffende es neghenthien oude grot(en) tornoy(sen) erffelijck/ aen ende op twee huysen neven een gelegen metten/ hoven en(de) hue(re)n toebehoirten henricx geheeten snoeck/ en(de) nu mathijs geheeten decke(re) gelegen te vredebosch ende/ aen ende op vijff dachmalen lants jans geheete(n) snoeck/ gelegen aldair opt velt geheete(n) boschvelt naist den/ goeden desselfs jans snoeck hem met bieven van/ des(er) stadt gescreve(n) aend(en) meye(r) van leefdale oft zijnen/ stadhoude(r) Alle de selve goede ende onderpande metgad(er)s/ den haeffelike(n) goeden in ende op de selve goede en(de)/ onderpande wesende soe verre die den gerechtigen/ proprietar(is) der selv(er) toebehoire(n) behoudelijck heeft doen/ leve(re)n ende der weduwen daneels wijle(n) stroebant/ en(de) hue(re)n kinde(re)n ende oic hue(re)n tegewoirdigen man/ dach van rechte alhier te compare(re)n inde banck voir/ meye(r) ende scepen(en) van loeven(en) oft zij hen d(aer)tegen/ hadden willen oppone(re)n doen bescheyden Aldair/ zij op heden als ten geco(n)tinueerden daghe van/ rechte niet gecompareert en sijn noch nyemant/ van hue(re)n wegen den voirs(creven) goirde compare(re)nde/ en(de) trecht voirt versueken(de) soe hebbe(n) scepen(en)/ van loeven(en) t(er) manissen smeyers nae dat hen/ behoirlijck heeft gebleken bij rapporte cornelis/ reyns des(er) stadt bode de voirs(creven) leveringe ende/ dachbesceydi(n)ge behoirlijck gesciet te zijne vo(n)nislijck/ gewijst hebben datmen den selve(n) goede vand(en)/ voirs(creven) goeden houde(n) soude inde macht van zijne(n) scepen(en)/ br(ieven) en(de) leveri(n)g(en) alsoe v(er)re alst noch voir scepen(en) comen es/ in scampno januarii xxi