Vand(er) battacien gebuert bij jouffr(ouwe) katlijne(n) colveners/ weduwe jans wijle(n) willems gedaen inde banck/ voir meye(r) en(de) scepen(en) van loven(en) tegen henricke/ schuerbroet dair tegen zij als verweerdersse/ aldair in rechte steet ten iersten male vand(en)/ p(er)soen henricx willems den welken deselve/ schuerbroet op zijn zijde ond(er) meer ande(r) als/ getuyge tege(n) hue(r) leyden woude en(de) meynde/ te moege(n) leyden Dair tege(n) deselve weduwe/ meynde neen ende bezund(er)t aengaen(de) den/ pointe dair mede de selve schuerbroet in/ sijnd(er) aenspraken huer belaste(n) woude mette(n)/ aenveerden van wijle(n) jans willems huers/ mans have en(de) van int sterfhuys nae zijn doot/ gebleve(n) te zijne ende alsoe in zijn scult gehoud(en)/ te wesen en(de) den voirs(creven) schuerbroet als zijne(n)/ borge(n) d(aer)om te moete(n) lossen vand(er) borchtocht/ dair voe(r) hij schuerbroet desselfs wijle(n) jans/ willems huers mans borge bleve(n) was in/ div(er)s(en) manie(re)n hoepte zij dat deselve henrick
//
willems d(air)aff gheen conde dragen en soude te/ voird(er) gem(er)ct want die selve die tuge(n) soude/ oick als borge desselfs wijle(n) jans willems/ zijns brued(er)s hem selve(n) d(aer)inne oft ind(er) gelijck(er)/ saken af oft aen zwe(re)n en(de) profijte oft omp(ro)fijte/ doen mochte want belaste hij de weduwe in/ desen met zijne(n) getugenissen het gelijcke want/ hij gelijck voe(r) oick borge was voe(r) zijne(n) brued(er)/ mocht hem te voordele gebue(re)n vand(en) selve(n) henr(icke)/ schuerbroet en(de) ande(re)n borge(n) elck in des and(er)s/ sake van borchtochte(n) en(de) lossinge(n) want dat voe(r)/ gewijst wae(r) den eene(n) te vordeele wae(r) nae int/ gelijcke den ande(re)n geleert Op dwelck de voirs(creven)/ schuerbroet alt(er)ce(re)nde hoepte ende meynde wae(r)/ henrick willems bij sijne(n) eede dorste houden/ dat hij in dit stuck henr(ick) schuerbroet aengaen(de)/ wynner noch verlieser en wae(r) nu noch in toecomen(de)/ tijde dat hij billicx sijn conde drage(n) soude he(m)/ des gedragen(de) totten rechte Dair tegen de/ weduwe sustine(re)nde neen ende seggen(de) bijd(en)/ reden(en) voirs(creven) dat deselve henrick willems/ die bekinde actie van borchtochte(n) te hebben op/ zijne(n) brued(er) en(de) voe(r) hem te laste te staen niet sculdich/ en wae(r) d(aer)inne te tuygen e(m)mer op tpoint vand(en)/ aenveerde(n) vand(er) have(n) oft int sterfhuys gebleve(n)/ te zijne het en wae(r) dat hij he(m) namaels mette(n)/ gelijcke(n) pointe(n) tege(n) huer selve(n) niet behulpen en woude/ mair d(aer)aff renu(n)tie(re)n in welcken gevalle zij te/ vreden soude moege(n) sijn hem zijn conde te moege(n)/ laten dragen Es gewijst bij scepen(en) vonness(en)/ t(er) manissen smeyers wair henrick willems/ bij sijne(n) eede cleert dat hij in dese sake henr(ix)/ schuerbroet aengaen(de) wynner noch verlieser en/ es nu noch in toecomen(de) tijde(n) dat dan deselve/ henrick sijn conde dragen sal Ende deselve henrick/ d(aer)op bij eede ond(er)vraecht sijnde en(de) getuyght hebben(de)/ dat hij in des voirs(creven) henr(ix) schuerbroet sake wynner
//
noch verlieser en es nu noch in toecomen(de) tijd(en)/ nochtan d(aer)toe vuegen(de) waert dat henr(ick) schoerbroet/ tgedinge wonne mette(n) getuygenisse vand(en)/ aenveerde(n) vand(er) have(n) en(de) int sterfhuys gebleve(n)/ te zijne hij als borge van zijne(n) brued(er) soude/ oick dan op hue(r) meyne(n) te spreken ende en/ schouts niet quijte mair meynde he(m) aen hue(r)/ te v(er)richte(n) om tot sijnd(er) lossinge(n) te come(n) Ende/ als de scepen(en) voirt in desen gemaent zijn/ geweest bijde(n) meye(r) oft henrick willems/ inde depositie principael sijn conde drage(n)/ soude soe schuerbroet meynde ja oft niet/ soe de weduwe sustineerde neen mits den/ aenhancsele d(er) voirs(creven) depositien d(aer) m(er)kelijck/ bij bleeck dat desselfs henricx willems/ getugeniss(en) int principael vand(en) ae(n)veerd(en)/ vand(er) have(n) en(de) int sterfhuys gebleve(n) te zijne/ he(m) selve(n) prouffijtelijck en(de) batelijck soude/ moege(n) sijn Hebbe(n) zij met hue(re)n vonnisse/ de calangie vande(n) selve(n) henr(icke) willems gehoude(n)/ te he(m)w(er)t ende insgelijcx d(aer)nae de gelijcke calaingie/ en(de) battacie de deselve weduwe gedaen/ heeft en(de) bijde(n) gelijcken reden(en) voirs(creven) opde/ p(er)sone(n) van denijse laukens gielijse de vos/ ja(n)ne de walsche woute(re)n van holsbeke als/ executeurs henricx wijle(n) van holsbeke en(de)/ anth(onis) van wynge die de voirs(creven) schuerbroet/ alle oick leyden woude als getuygen in zijnd(er)/ saken nochtan dat zij oick alle soe de weduwe/ seyde borg(en) wae(re)n en(de) te laste stonde(n) voe(r)/ den voirs(creven) wijle(n) ja(n)ne willems en(de) he(m)/ inde(n) gelijcke(n) soude(n) moege(n) willen behulpe(n)/ tegen hue(r) inde pointe(n) voirs(creven) en(de) d(aer)enbove(n)/ oick de p(er)sone(n) van g(er)de den draye(re) den/ gardiaen vand(en) mi(n)d(er)bruede(re)n en(de) arnde de/ becke(re) die hij oick leyden woude op zijn zijde/ nochtan dat zij alle drie ende elck bezund(er)t/ de(n) selve(n) wijle(n) ja(n)ne hue(re)n man seke(r) sculde(n)/ van scepen(en) brieve(n) oft ande(r) eysschen(de) wae(re)n
//
soe de weduwe seyde ende die alle he(m) selve(n)/ aenswe(re)n en(de) vordel in hue(re)r depositien oft elck/ in des and(er)s depositie aengaen(de) den aenverd(en)/ vand(er) have(n) oft int sterfhuys gebleve(n) te sijne/ doen mochten dwelck alsoe soe sij hielt gheenss(ins)/ en behoirde Ende als alle de ande(r) getuygen/ des voirs(creven) henricx schuerbroet aenlegg(er)s ov(er)hoirt/ sijn geweest en(de) d(aer)nae oick alle alsulke(n) getuyge(n)/ als de weduwe d(aer)tege(n) op hue(r) sijde heeft wille(n)/ leyden en(de) deselve aenlegge(r) p(er)siste(re)nde in zijn/ yerste voirneme(n) gemeynt heeft he(m) te moege(n)/ behulpen met den voirs(creven) getuyge(n) d(aer)af ond(er) de/ voirs(creven) battacie de scepen(en) met hue(re)n vonnesse/ de calangie te he(m)w(er)t gehoude(n) hadde(n) en(de) v(er)sueken(de)/ d(aer)mede te moege(n) voirts vare(n) en(de) hen te leyde(n)/ oft d(aer)af d(er) scepen(en) vonnesse bijde(n) reden(en) voe(r) genoech/ bij hem in dien gealligeert en(de) de voirs(creven) weduwe/ t(er) (contra)rien gemeynt heeft neen bijde(n) reden(en) bij hue(r)/ gealligeert Soe hebben de scepen(en) van loven(en)/ t(er) manissen smeyers gewesen met vonnesse/ soe v(er)re de voirs(creven) getuyge(n) dorsten houde(n) bij hue(re)n/ eede dat sij wynners noch verliesers en sijn nu/ noch in toecomen(de) tijde(n) van des(er) saken noch de/ selve weduwe noch de hue(r) vand(en) gelijcke(n) stucke(n)/ en(de) saken niet en souden willen moyen noch ae(n)spreke(n)/ dat zij in dien gevalle hue(r) beste conde souden/ moegen dragen in scampno coram om(n)ib(us) dempto/ vynck nove(m)br(is) xv