Willeken van loey? wet dat ic wael verstaen hebbe uwen brief aen mi ghesonden mentie makende van dat ic u soude meynen te evelen/ aen lijf ocht aen led(en) daer in ghij oec scrijft afdraghende dreychlike woerde tot haveloes met meer woerden inden selven uwen brief/ begrepen welker worde mi verwondert van u want ic noch daer ic af comen ben alsulc niet en sijn haddic yet tot u ocht die/ meerder ware te segghene ic en soudt te voren laten wetene en mi verwaren oec moeghdi wel weten dat ic minen oem liever hebbe/ dan u al en hatic u niet maer laet haveloes onghedreyght en(de) in vreden want mi leet ware en(de) leet sijn soude dat hij mijns oems ocht/ mijns te wers hebben soude oec heeft mijn oem wel alsoe wise raeds liede als haveloes es hadde hijs te doene en(de) oec alsoe goede vriende/ maer heeft uwe neve recht tot enighen goeden dat mach hij vervolghen ter stat daer hijt sculdech es te doene en(de) wes hem trecht/ m(er) des en sal hem nieman ondanc weten