Cond sij allen liede(n) dat mathijs jans van tielt es come(n) in jegewordich(eit)/ der scepen(en) van loven(e) ende heeft genome(n) ende bekendt dat sij [hij] genome(n) heeft/ van janne van rode de woeni(n)ge des selfs jans met neghen boende(re)n lants/ daer toe hoe(re)nde geleghen te wynghe Te houden te hebben en(de) te wynnen/ van halfm(er)te naest comende ene(n) t(er)mijn van sesse jae(re)n lang deen nae/ dand(er) daer nae staphans volgende Elx jaers dae(re)n bynne(n) op de helcht/ van alle der vrucht op de voirs(creven) j goede jaerlex wassende met sulker/ vorwerden soe wanneer de vrucht tijtverdich es dat se de wy(n)ne afdoen/ sal en(de) inden bant leve(re)n op sine(n) cost ende dan sal hi des voirs(creven) jans/ helcht inde schue(re) vue(re)n eer hi sijn helcht rue(re)n of ewech doen sal met/ alsulker vorwerde(n) soe wanneer de voirs(creven) jan sijn helcht vand(er) voirs(creven) vrocht/ doet dersschen dat dan de voirs(creven) wynne den dersschers hoe(re)n cost gheve(n)/ sal en(de) jan de dachue(re)n betale(n) Voert es vorwerde dat de voirs(creven) wy(n)ne/ jaerlex alle stroe en(de) voesteringe vande(n) voirs(creven) goede(n) comende jaerlex/ hebben sal tot sine(n) p(ro)fite te etten met sinen beesten en(de) te meste maken/ en(de) dat mest vue(re)n op tvoirs(creven) lant slants meeste(n) p(ro)fite Behoudelec dien/ dat hi daer uut jaerlex leve(re)n sal derdalfhond(er)t walms de huyse aldaer/ mede te decken en(de) alsmen die verdect [al waert datter de voirs(creven) jan va(n) rode nu hond(er)t meer cochte d(aer) op te v(er)decke(n)] soe sal de wy(n)ne den wercliede(n)/ den cost gheven en(de) jan de dachue(re)n betalen Voert es vorw(er)de dat jan/ en(de) de wy(n)ne voirs(creven) jaerlex copen selen [om int voirs(creven) hof te b(ri)nghen] xxv hope stroes Daer af dat/ jan van rode de tweedeel betalen sal en(de) de voirs(creven) mathijs terdendeel/ Voert es vorwerde dat de voirs(creven) wy(n)ne jaerlex hebben sal de beemde/ en(de) weyde des voirs(creven) jans aldaer geleghen o(m)me c rijnsche gulde(n) xl pl(acken)/ voer den gulden te s(int) m(er)tens misse te betale(n) als vervolghde schout/ It(em) sal de voirs(creven) wy(n)ne de huyse vande(n) voirs(creven) hove houde(n) vand(er) ond(er)sten/ rikelen nederwert den voirs(creven) t(er)mijn due(re)nde op sine(n) cost Item es/ sal de voirs(creven) wy(n)ne de voirs(creven) lande ten eynde van sine(n) t(er)mine laten alsoe/ hise vant in sine(n) income(n) dats te weten den rogghenart wel ende/ loflec bevreedt en(de) bezaeit met wyntercorne op vier getidege vore(n)/ de storte eens o(m)megedaen de brake geheel It(em) es vorwerde dat jan en(de)/ de wy(n)ne voirs(creven) de voir hebben selen half en(de) half doeft inden bog(ar)t/ aldaer wassende daer af dat de wy(n)ne des voirs(creven) jans helcht te loven/ leve(re)n en(de) desgelijx dbernhout dat de voirs(creven) jan op sijn goede aldaer sal/ doen maken capelleman linden febr(uarii) xxiiii